Ezequiel
Templupita pashtamuq yaku imano kashqan
47 Tsaypitanami tsay runa templu punkuman kutitsimarqan. Tsaychömi rikarqä punku quiciunpita yaku pashtaykämuqta.* *Altarpa sur kaq lädunpa pasarmi inti jeqamunan kaq lädupa yaku aywaykaqta rikarqä. 2 Nirkur ruri kaq patiupita y jatun kaq patiupita norti kaq lädu punkupa waqtayaq jorqarkamarmi inti jeqamunan kaq lädu punkuman chayatsimarqan. Tsaychöpis punkupita sur kaq lädunpa yaku yarqaykämuqtami rikarqä.
3 Tsaypitami cordilta aptakurkur inti jeqamunan kaq lädupa aywar pitsqa pachak (500) metruta tsay runa tupurqan. Tsay tupushqan kaqpa pasatsimaptin utsuputüyaqlami yaku karqan. 4 Yapay pitsqa pachak (500) metruta tupurkur pasatsimaptinmi qonqurnïyaqna yaku karqan. Tsaypita yapay pitsqa pachak (500) metruyaq tupurkur pasatsimaptin tseqläyaqnami yaku karqan. 5 Yapay pitsqa pachak (500) metrupitanaqa manami chakilapa päsayta kamäpakurqänatsu. Tsaymi atska yaku kaptin nadyaypana pasarqä. 6 Tsaypitanami kayno nimarqan: “Lapan rikashqaykita shumaq tantiyakuy”.
Nirkurmi mayu kuchulanpa kutitsimarqan. 7 Kutirmi mayupa ishkan kuchunkunacho atska yörakunata rikarqä. 8 Tsaymi kayno nimarqan: “Kay yaku inti jeqamunan kaq lädupami aywaykan. *Arabá pampapa pasarmi *Kachi Lamarman chayaykan. Tsayman chayarmi pochquq yakuta ali yakuman tikratsinqa. 9 Kay yaku maymanpis chayashqan kaqchöqa tukuy niraq uywakunami kawanqa. Pochquq yakuta mishkiq yakuman tikratsiptinmi tsaytsika pescädukunapis kanqa. Kay yaku maymanpis chayashqanchöqa lapanmi kawanqa.
10 “En-gadi partipita En-eglaim partiyaqmi kay mayu kuchunkunacho pescädu tsariqkunapis redninkunata tsakitsinqa. Mediterráneo Lamarchönöraqmi tukuy casta pescädukuna tsaytsika kanqa. 11 Sinigankuna y qochankunami itsanqa kashqannöla pochquq kanqa.
12 “Kay mayupa ishkan kuchunkunapapis tukuy casta früta yörakunami winanqa. Raprankunapis mana shushuypami imayyaqpis wayunqa. Templupita yarqamuq yaku kuchuncho karmi wayuyninpis tiempulancho poqunqa. Tsay wayuyninmi mikunapaq kanqa y raprankunanami jampipaq kanqa”.*
Israel nacionpa lindërunkuna imano kashqanpis
13 TAYTA DIOSMI kayno nin: “Kanan tantiyatsishayki chunka ishkay trïbu Israel runakuna posisionta chaskiptin lindërunkuna maypa maypa kananpaq kashqanta.* Josépita miraqkunaqa ishkay trïbupaq kashqantanömi posisionta chaskipäkunqa.* 14 Wakin trïbukunaqa tsay tamäñulatami posisionta chaskinqa. Unay ayluykikunata kay nacionta qoykushqa kaykaptïmi kay nación qamkunapa kanqa.
15 “Norti kaq lädupami Israel nacionpa lindërun Mediterráneo jatun lamarpita qalaykur Hetlón markapa aywaq nänipa aywaranqa hasta Zedad partiyaq. 16 Tsaypitami aywaranqa Hamat, Berota y Sibraim partikunapa. Sibraim parti kaykan Damascupita Hamatman aywaqchömi. Nirkur aywaranqa Hazar-haticón partipa. Tsay parti tinkuykan Haurán partiwanmi. 17 Tsaymi norti kaq lädupa tinkuq lindëru aywaranqa Mediterráneo Lamarpita Hazar-enán partiyaq. Tsay kanqa Damasco norti kaq läducho y Hamat sur kaq läduchömi.
18 “Inti jeqamunan kaq lädupanami Israel nacionpa lindërun aywaranqa Haurán partipa y Damasco partipa. Tsaypita Jordán mayupa aywarar inti jeqamunan kaq lädu lamar* nawpan Tamar markayaqmi chayanqa. Jordán mayu kay tsimpanchömi Israel nación kanqa y wak tsimpanchönami Galaad kanqa.
19 “Sur kaq lädupanami Israel nacionpa lindërun kanqa Tamar markapita qalaykur Cadescho kaykaq Meriba yakupa pasar Mediterráneo jatun lamaryaq. Tsaynömi sur kaq lädupa lindërun kanqa.
20 “Inti jeqanan kaq lädupanami Mediterráneo Lamar kuchunpa Israel nacionpa lindërun kanqa. Norti lädupa aywaranqa hasta Hamat partiman chayashqanyaqmi. Tsaynömi inti jeqanan kaq lädupa lindërun kanqa.
Posisionta aypunakushqan
21 “Nacionnikita chunka ishkay Israel trïbupura aypunakärinki. 22 Nirkur cada trïbu chaskishqancho runakuna posisionta chaskinanpaq suerti jitaypa aypunakunki. Qamkunacho yuriq jäpa runakunatapis tsurinkuna kaptinqa tsayno aypupäkunki. Markaykicho yuriq jäpa runakunata Israel runatanöna rikapäkunki. Tsaymi marka mayikikunata chakrata aypushqaykinöla paykunatapis aypupäkunki. 23 Maychöpis tashqan trïbuchömi jäpa runakunapis posisionta chaskipäkunqa”. TAYTA DIOSMI tsayno nin.