Jueces
Judá y Simeón trïbu runakuna Adoni-bezecta prësu tsarishqan
1 Josué wanuptinnami Israel runakuna TAYTA DIOSTA tapukurqan kayno nir: “¿Mayqan trïbu runakunataq cananeo runakunawan pelyaq puntata aywanqa, Tayta?”
2 Tsawraqa TAYTA DIOS kayno nirqan: “Judá trïbu runakunami puntata aywapäkunqa. Cananeo runakuna tashqan markakunata paykunatami qoykushaq”.
3 Tsaymi Judá trïbu runakuna Simeón trïbu runakunata kayno nirqan: “Noqakunata aypumashqan particho kaykaq cananeo runakunawan pelyaykäshilämay. Tsaynölami noqakunapis pelyäshishaykipaq qamkunata töcashushqayki particho”.
Tsayno niptinmi paykunawan Simeón trïbu runakuna aywarqan pelyäshinanpaq.
4 Bezecman yaykur cananeo y ferezeo runakunawan pelyaptinmi TAYTA DIOS yanaparqan ushakätsinanpaq. Tsaymi chunka waranqa (10,000) runakunata wanutsipäkurqan. 5 Tsaycho taq cananeo y ferezeo runakunapa mandaqnin rey karqan Adoni-bezec. Payta y paywan kaykaq runakunatapis lapantami vincipäkurqan. 6 Qeshpiykaqta taripaykurmi Adoni-bezecta prësu tsariykur makinpa y chakinpa maman dëdunta roqurqan. 7 Tsawraqa rey Adoni-bezec kayno nirqan: “Noqapis qanchis chunka (70) reykunapa chakinpa y makinpa maman dëduntami roqurqä. Paykunami mësäpita shikwashqa mikuyta mikur kawapäkurqan. Tsayno rurashqäpitami noqatapis Tayta Dios kanan castigaykäman”.
Tsaypitanami rey Adoni-bezecqa Jerusalénman apaykuptin tsaycho wanurqan.
Hebrónman y Jerusalénman Judá trïbu runakuna yaykushqan
8 Jerusalénman pelyaq aywarmi tsaycho taq runakunata Judá trïbu runakuna lapanta espädawan wanurkatsir wayinkunatapis rupatsipäkurqan. 9 Tsaypitanami *Neguevcho, jalqakunacho y *Sefelacho taq cananeo runakunawan pelyaq aywapäkurqan.* 10 Nirkurnami aywapäkurqan Hebrón markacho taq cananeo runakunawan pelyapäkunanpaq.* Tsay markapa unay jutinmi karqan Quiriat-arba. Tsaychömi wanutsirqan Sesai runakunata, Ahimán runakunata y Talmai runakunata.
Debir markata Otoniel vincirkur qechushqan
11 Tsaypitanami Debircho taq runakunata atacananpaqna yaykapäkurqan. Tsay markapa unay jutinmi karqan Quiriat-sefer. 12 Tsaymi Caleb kayno nirqan: “Pipis tsay markaman pelyaq yaykuykur vinciq kaqtami warmi tsurï Acsawan tätsishaq”.
13 Tsayno niptinmi Cenazpa tsurin Otoniel tsay markaman yaykuykur tsaycho taqkunata vincirqan. Paykunata vincirkuptinnami Calebqa tsurin Acsawan tätsirqan. Otonielqa karqan Calebpa shulka wawqinpa tsurinmi.
14 Papäninpa wayinpita yarquykashqanchönami Otonielqa warmin Acsata kayno nirqan: “Papänikita ruwakamuy chakrata rikatsimänantsipaq”.
Tsawraqa bürrunpita Acsa urarpuptin papänin Caleb kayno tapurqan: “¿Imatataq munaykanki, hïja?”
15 Tsaymi Acsaqa kayno nirqan: “Ruwakuläshayki, papä. *Neguevcho chakrata rikatsimashqaykinöla pukyuyuq chakrakunatapis rikaykatsilämay”.
Tsayno niptinmi papänin rikatsirqan jana läducho y ura läducho pukyuyuq chakrakunata.
Judá y Benjamín trïbu runakuna cananeo runakunata vincishqan
16 Ceneo runakunami Moiséspa suedrun Hobabpita miraq runakuna karqan. Paykunami Judá trïbuman talukaykur Palmëra Markapita aywapäkurqan Judá trïbu runakuna chaskishqan chunyaq jirkaman. Tsayqa *Neguevcho kaykaq Arad cercanchömi karqan. Tsaychömi Judá runakunawan talukashqa tarqan.
17 Tsaypitanami Judá trïbu runakuna Simeón trïbu runakunawan Sefatcho taykaq cananeo runakunata atacar chipyaq asulapäkurqan. Tsaymi tsay markapa jutinta churaparqan Horma* jutin kanananpaq. 18 Tsaynölami Gazacho, Ascalóncho y Ecróncho taq runakunata vincirkur chakrankunatapis qechupäkurqan.
19 TAYTA DIOS yanapaptinmi Judá trïbu runakunaqa jalqakunacho taq runakunata wanutsipäkurqan. Costacho taq runakunatami itsanqa wanutsiyta mana kamäpakurqantsu, fiërrupita rurashqa guërra carrëtankuna kaptin. 20 Moisés nishqannölami Hebrón partita Calebta qoykurqan. Tsayman chayaykurmi Anacpa kimsa tsurinkunapita miraqkunata qarqurqan.
21 Benjamín trïbu runakunaqa Jerusaléncho taq jebuseo runakunata qarquyta manami kamäpakurqantsu. Tsaymi jebuseo runakunaqa kananyaqpis Benjamín trïbu runakunawan Jerusaléncho tarkaykan.
Manasés y Efraín trïbu runakuna Bet-el markaman yaykushqan
22 TAYTA DIOS yanapaptinmi Josépita miraq runakuna* Bet-el markacho taq runakunata atacar vincipäkurqan. 23 Manaraq atacarmi tsay markaman runakunata kacharqan imano kashqantapis rikapakamunanpaq. Nawpataqa tsay markapa jutin karqan Luz. 24 Rikapakuqkuna chayaykurmi tsay markapita yarqaykämuq runawan tinkur kayno nipäkurqan: “Markaman maypa yaykapäkunäpaq rikatsimaptikiqa manami wanutsishaykitsu”.
25 Tsayno niptinmi mayninpa yaykunanpaqpis rikatsirqan. Tsaymi rikapakuqkuna kutiykur wilaptin Israel runakuna yaykuykur tsaycho taqkunata espädanwan lapanta wanutsipäkurqan. Markaman imano yaykunanpaq rikatsiq runata y aylunkunatami itsanqa promitishqanno mana wanutsirqantsu. 26 Tsay runa heteo runakuna tashqan kaqman aywakurmi markata sharkarkatsir jutinta churaparqan Luz jutin kananpaq. Kananyaqpis tsay markapa jutin tsaylami kaykan.
Mayqan mayqan markakunata mana qechushqan
27 Manasés trïbu runakuna manami qarquyta kamäpakurqantsu Bet-seán, Taanac, Dor, Ibleam y Meguido markakunacho taq runakunata y tsay markakunapa nawpankunacho taq runakunatapis. Tsaymi cananeo runakunaqa jinala tsay markakunacho tarkaykan. 28 Tsaypita Israel runakuna atskaman mirarmi cananeo runakunata ashmaytano arutsir munaynincho tsarararqan. Paykunata qarquytami itsanqa mana kamäpakurqantsu.
29 Efraín trïbu runakunapis manami qarquyta kamäpakurqantsu Gezercho taq cananeo runakunata. Tsaymi tsay cananeo runakuna Efraín trïbu runakunawan talukashqa tarkaykan.
30 Zabulón trïbu runakunapis Quitrón y Naalal markakunacho taq cananeo runakunata qarquyta mana kamäpakurmi ashmaytano arutsir munaynincho tsarararqan. Tsaymi cananeo runakuna Zabulón trïbu runakunawan talukashqa tarkaykan.
31 Aser trïbu runakunapis Aco, Sidón, Ahlab, Aczib, Helba, Afec y Rehob markakunacho taq runakunata manami qarquyta kamäpakurqantsu. 32 Tsaymi cananeo runakunawan talukashqa tarqan.
33 Neftalí trïbu runakunapis Bet-semes y Bet-anat markakunacho taq cananeo runakunata qarquyta mana kamäpakurmi munaynincho tsararar arutsirqan. Tsaymi cananeo runakuna Neftalí trïbu runakunawan talukashqa tarkaykan.
34 Dan trïbu runakunataqa amorreo runakuna manami kachaparqantsu costacho kaykaq posisionninman yaykunanta. Tsaymi jalqaman kutipäkurqan tsaycho tänanpaq. 35 Tsaynöpami amorreo runakunaqa tarqan Heres, Ajalón y Saalbim markakunacho. Qepataraqmi Josépita miraq Efraín y Manasés trïbu runakuna munayniyuq rikakur tsaycho taykaq amorreo runakunata munaynincho tsararar arutsirqan. 36 Amorreo runakunapa lindërunqa aywararqan Acrabimpita qalaykur hasta Selapita mas janaqanyaqmi.