1 Crónicas
Israel runakunapa mandaqnin rey David kashqan
11 Tsaypitami lapan Israel runakuna Hebrón markaman juntakaykur Davidta kayno nipäkurqan: “Noqakunaqa yawarniki karmi rey kanaykita munapäkü. 2 Rey Saúl mandaykashqan witsanpis qammi Israel soldädukunata pushararqayki guërracho pelyapäkunanpaq. Tsaynöpis rey kanaykipaqmi TAYTA DIOS kayno nishushqanki: ‘Qamtami akrashqä kuyashqä Israel runakunapa mandaqnin rey kanaykipaq. Tsaymi uysha mitsiqno Israel runakunata shumaq rikankipaq’ ”.
3 Tsayno nipäkuptinmi mandaqnin rey kananpaq TAYTA DIOSPA nawpancho Israel mayor runakunawan *pactuta David rurarqan. Tsaychömi Samuelta TAYTA DIOS nishqannöla* Davidpa umanman aceitita winapäkurqan mandaqnin rey kananpaq.
Jerusalén markata David acaparashqan
4 Tsaypitami lapan Israel soldädukunawan rey David aywarqan Jerusalén markata atacananpaq. Jebuseo runakuna tsaycho taptinmi tsay markata reqipäkurqan Jebús jutiwan. 5 Jebúsman chayaykuptinmi tsaycho taq runakuna Davidta kayno nirqan: “Qamkunaqa manami imanöpapis kayman yaykamuyta kamäpakunkipaqtsu”.
Tsayno niykaptinpis Davidqa jebuseo runakunata vincirkur *Sión jirkancho kaykaq jiruruypa perqashqa Jerusalén markata tsarikurkurqan. Tsaypita patsami kananyaqpis tsay markata *Davidpa Markan nipäkun.
6 Manaraq atacarmi soldädunkunata rey David kayno nirqan: “Mayqaykipis jebuseo runakunata puntata atacaq yaykuqtami soldädükunapa capitannin kananpaq churashaq”.
Tsayno niptinmi Sarviapa wawan Joab puntata yaykur jebuseo runakunata atacarqan. Tsaymi soldädukunapa capitannin kananpaq rey David Joabta churarqan.
7 Tsayno acapararkurmi Davidqa Siónpitana Israel runakunata mandarqan. Tsaymi runakuna nipäkun Davidpa Markan kashqanta. 8 Nirkurnami wayikunata David ruratsirqan Milo patak perqapita hasta marka kuchunyaq. Joabnami tsay markacho wakin kaq wayikunata altsatsirqan. 9 Lapanta mandaq TAYTA DIOS yanapaptinmi David mas munayniyuq rikakurqan.
Davidpa ali chölunnin kaq kimsa soldädunkuna
10 David rey kaykaptin soldädukunapa capitanninkuna karqan ali chölulantaqmi. Paykunami Davidta imachöpis yanaparqan. Profëtawan TAYTA DIOS wilakatsishqannölami tsay capitankuna y lapan Israel runakuna payta churapäkurqan rey kananpaq.
11 Davidpa mas ali chölunnin kaq soldädunkuna kimsami karqan. Punta kaqmi karqan Hacmonipa tsurin Jasobeam. Paymi karqan tsay kimsa soldädukunapa capitannin. Juk kutichömi Jasobeamqa lanzanwan wanutsirqan kimsa pachak (300) soldädukunata.
12 Tsaypitanami karqan Dodupa tsurin Eleazar. Paymi karqan tsay kimsa ali chölunnin kaq soldäducho juknin. Payqa karqan Ahohí markapitami. 13 Israel runakunawan guërrata rurananpaq filisteo runakuna Pasdamimcho juntakaptin Eleazarpis tsaycho Davidwan kaykarqan. Cebäda chakracho pelyaykashqanpitami filisteo runakunapita Israel runakuna qeshpir aywakärirqan. 14 Tsayno qeshpiptinpis cebäda chawpinman ichiykurmi Eleazarqa filisteo soldädukunata vincirqan. Tsaynöpami Israel runakunata TAYTA DIOS yanaparqan filisteo runakunata vincipäkunanpaq.
15 Juk kutichömi filisteo runakuna campamentunta ruraykur Refaim pampacho karkaykarqan. Davidnami Adulam machaycho pakaraykarqan. Tsaymanmi Kimsa Chunka nishqan soldädunpita kimsa mas ali chölunnin kaq soldädunkuna aywarqan paywan tinkunanpaq 16 Beléncho juk punta filisteo soldädukuna kaptinmi tsay machayman David pakakurqan. 17 Kimsa ali chölunnin kaq soldädunkuna chayaykuptinmi David kayno nirqan: “Belén marka punku yaykunacho kaykaq pukyupita ¡pilaraq yakuta apapaykamanman upurkunäpaq!”
18 Tsayno niptinmi filisteo soldädukuna Beléncho kaykaptinpis tsay ali chölunnin kaq kimsa soldädukuna pakaylapa yaykuykur pukyupita yakuta apaparqan David upunanpaq. Yakuta apapaptinpis David manami upurqantsu. Tsaypa trukanqa TAYTA DIOSPAQ pampaman jichashpanmi kayno nirqan: 19 “Kay yakuta upurqa wanuytapis mana mantsaypa apamuq runakunapa yawarninta upuqnöchari kashaq”.
Tsayno nirmi David mana upurqantsu. Tsay yakuta apaparqan kimsa ali chölunnin kaq soldädukunami.*
Kimsa Chunka nishqan alinnin kaq soldädukuna
20 Kimsa Chunka nishqan alinnin kaq soldädukunapa capitanninmi karqan Joabpa wawqin Abisai. Juk kutichömi kimsa pachak (300) contran soldädukunawan pelyashpan lanzanwan lapanta Abisai wanutsirqan. Tsaynöpami kimsa ali chölunnin kaq soldädukuna respitashqa kashqanno Abisaipis respitashqa karqan. 21 Abisaiqa Kimsa Chunka nishqan soldädukunapita mas reqishqa karmi paykunapa capitannin karqan. Tsayno karpis manami tinkurqantsu kimsa ali chölunnin kaq soldädukunamanqa.
22 Benaíapis alinnin soldädumi karqan. Payqa Cabseel markapita Joiadapa tsurinmi karqan. Alinnin soldädu karmi Moab nacionpita pelyayta ali yachaq ishkay soldädukunata wanutsirqan. Tsaynöpis juk junaq rajuykaptinmi jatunkaray pözuman yaykurir leonta wanutsirqan. 23 Paymi ishkay metru pulan jatunkaray Egipto runata wanutsirqan. Tsay runapa lanzanpis karqan telarpa pilukunannömi. Lanzanwan atacaykaqtami Benaíaqa qeruwan wiruykälar lanzanta qechurqan. Nirkurmi tsay lanzalanwan kikinta wanutsirqan. 24 Joiadapa tsurin Benaía tsayno rurashqanpitami kimsa ali chölunnin kaq soldädukuna respitashqa kashqanno paypis respitashqa karqan. 25 Kimsa Chunka nishqan soldädukunacho respitädu karpis Benaíaqa manami tinkurqantsu kimsa ali chölunnin kaq soldädukunamanqa. Paytami David churarqan cuidaqnin soldädunkunapa capitannin kananpaq.
26 Kimsa Chunka nishqan alinnin kaq soldädukunapa jutinkunami kaycho qelqaraykan:
Joabpa wawqin Asael;
Belén markapita kaq Dodupa tsurin Elhanán;
27 Harod markapita kaq Samot;
Pelón markapita kaq Heles;
28 Tecoa markapita kaq Iquespa tsurin Ira;
Anatot markapita kaq Abiezer;
29 Husa markapita kaq Sibecai;
Ahohí markapita kaq Ilai;
30 Netofa markapita kaq Maharai;
Netofa markapita kaq Baanapa tsurin Heleb;
31 Gabaa markapita kaq Ribaipa tsurin Itai (Gabaaqa Benjamín trïbu runakuna tashqanchömi kaykan);
Piratón markapita kaq Benaía;
32 Gaas raqrapita kaq Hurai;
Arba markapita kaq Abiel;
33 Barhum markapita kaq Azmavet;
Saalbón markapita kaq Eliaba;
34 Gizón markapita kaq Hasempa tsurinkuna;
Arar markapita kaq Sagipa tsurin Jonatán;
35 Arar markapita kaq Sacarpa tsurin Ahíam;
Urpa tsurin Elifal;
36 Mequera markapita kaq Hefer;
Pelón markapita kaq Ahías;
37 Carmel markapita kaq Hezro;
Ezbaipa tsurin Naarai;
38 Natánpa wawqin Joel;
Hagraipa tsurin Mibhar;
39 Amón nacionpita kaq Selec;
Beerot markapita kaq Naharai (paymi Sarviapa wawan Joabpa armankunata puritsir yanaparqan);
40 Itri markapita kaq Ira;
Itri markapita kaq Gareb;
41 heteo runa Urías;
Ahlaipa tsurin Zabad;
42 Rubén trïbupita kaq Sizapa tsurin Adina (payqa Rubén trïbucho mandaq karqan; paywanmi kimsa chunka (30) soldädukuna karqan);
43 Maacapa tsurin Hanán;
Mitni markapita kaq Josafat;
44 Astarot markapita kaq Uzías;
Aroer markapita kaq Hotampa tsurin Sama y Jehiel;
45 Simripa tsurin Jediael;
Jediaelpa wawqin Joha (paykunaqa Tiz markapitami karqan);
46 Mahav markapita kaq Eliel;
Elnaampa tsurinkuna Jerebai y Josavía;
Moab nacionpita kaq Itma;
47 Eliel;
Obed;
Soba markapita kaq Jaasiel.