2 Crónicas
Yanapananpaq rey Hiramta Salomón ruwakushqan
2 (1.18) TAYTA DIOSPA templunta y kikinpa palaciunta sharkatsiyta qalaykunanpaqmi Salomónqa 2 (1) qanchis chunka waranqa (70,000) ashtaqkunata churarqan. Tsaynölami pusaq chunka waranqa (80,000) runakunata churarqan jalqacho rumita laqlamunanpaq y kimsa waranqa soqta pachak (3,600) runakunata churarqan capatazninkuna kananpaq.
3 (2) Nirkurmi Tiro nacionpa mandaqnin rey Hiramman runakunata Salomón kacharqan kayno ninanpaq: “Rey Salomónmi kayno nin: ‘Papänï David palaciunta sharkatsinanpaq qeruta apatsimushqaykino noqapaqpis cedru qerukunata apaykatsilämuy. 4 (3) Tsay qerukunata apaykatsilämunki TAYTA DIOSNÏPA wayinta sharkatsinäpaq. Tsay wayichömi payta adorar ali asyaq* inciensuwan qoshtatsipäkushaq y *sagrädu tantatapis qaqaylanpa churapäkushaq. Tutapa y tardipami rupatsina sacrificiuta tsaycho rupatsipäkushaq. Tsaynölami rupatsipäkushaq jamay junaqkunacho, lulu killa fiestakunacho y TAYTA DIOSPA wakin fiestankunachöpis. Tsay fiestakunata imaypis rurapäkunäpaqmi TAYTA DIOS nirqan.
5 (4) “ ‘Ima diospitapis Tayta Diosnintsi mas munayniyuq kaptinmi wayintapis ruratsishaq jatunta y kuyaylapaqta. 6 (5) Jana patsapis tsayjinanpa tsikankaray kaykar Tayta Dios tänanpaq mana aypaykaptinqa ¡ima tamäñutaraq wayinta sharkaykatsïman! Tsayno kaykaptinqa ¡pitaq kä wayinta sharkatsinäpaq!* Imano kaptinpis nawpancho inciensuwan noqakuna qoshtatsinaläpaqpis sharkatsishaqmi.
7 (6) “ ‘Tsaymi qamta ruwakü imaykatapis rurayta yachaq runata kachaykamunaykipaq. Payqa qoripita, qellaypita, broncipita, fiërrupita, granäti tëlapita, puka tëlapita y azul tëlapita imaykatapis rurayta yachaq katsun. Tsaynöpis katsun imaykatapis dibujayta yachaq. Tsay runami kay Judácho y Jerusaléncho kaykaq minkaynïkunawan yanapanakur lapanta ruranqa. Tsay minkaynïkunataqa papänï Davidmi unayna minkakurqan.
8 (7) “ ‘Markaykicho taq runakuna qeru mutuyta alimi yachan. Paykunawan Líbanupita mututsipaykalämay cedru qerukunata, ciprés qerukunata y sándalo qerukunata. Qeru mutuqkunata yanapananpaqmi minkaynïkunata kachamushaq. 9 (8) Tayta Diospa templun jatun y kuyaylapaq kananpaq kaykaptinqa tsaytsikatami qerukunata nistashaq. 10 (9) Qeru mutuqkuna mikunanpaqmi apatsimushaq chusku millón chusku pachak waranqa (4’400,000) kïlu trïguta, chusku millón chusku pachak waranqa kïlu cebädata, chusku pachak chusku chunka waranqa (440,000) litru vïnuta y chusku pachak chusku chunka waranqa litru olïvu aceititapis’ ”.
11 (10) Tsawraqa Tiro nacionpa mandaqnin rey Hiram Salomónman cartata apatsirqan kayno nir: “Kushikümi Israel runakunata kuyashpan paykunapa mandaqnin rey kanaykipaq TAYTA DIOS churashushqaykipita”.
12 (11) Mastapis cartancho Hiram kayno nirqan: “Kay patsatapis y jana patsatapis kamaq TAYTA DIOS alabashqa kaykulätsun. Israel runakunata kuyaq Dios karmi rey Davidpa tsurin kaptiki yanapaykäshunki shumaq yachaq, tantiyakuq y yarpachakuq kanaykipaq. Tsayno tantiyakuq karmi TAYTA DIOSPA templunta y palaciuykitapis shumaq sharkatsinkipaq.
13 (12) “Tsaymi kanan kachaykämü Hiram-abita. Payqa alimi yachan imaykatapis rurayta. 14 (13) Paypa mamanqa Dan trïbupitami kaykan y papäninnami Tiro markapita kaykan. Ima aruytapis payqa yachanmi. Tsaymi qoripita, qellaypita, broncipita, fiërrupita, rumipita, qerupita, granäti tëlapita, azul tëlapita, lïnu tëlapita y puka tëlapita imaykatapis rurayta yachan. Munashqaykinömi imaykatapis dibujapäshunki. Papäniki David minkakushqan runakunawan juntumi pay arunqa.
15 (14) “Trïguta, cebädata, olïvu aceitita y vïnuta apatsimunaykipaq nishqaykinöla apaykatsilämuy, tayta. 16 (15) Aykatapis munashqaykitami Líbanupita cedru qerukunataqa jorqatsipämushayki. Lamar kuchunman chayaykatsirmi tsay qerukunata shinrirkur balsatano yakulanpa Jope markayaq apatsimushaq. Tsaypitanami Jerusalénman ashtatsinki”.
17 (16) Papänin rey David censatsishqannömi Salomónpis Israel nacioncho taykaq jäpa runakunata censatsirqan. Censarkatsirmi musyarqan pachak pitsqa chunka kimsa waranqa soqta pachak (153,600) jäpa runakuna Israelcho tashqanta. 18 (17) Tsay runakunapita qanchis chunka waranqa (70,000) runakunata churarqan kamariylanta imatapis ashtananpaq, pusaq chunka waranqa (80,000) runakunata churarqan jalqacho rumita laqlananpaq y kimsa waranqa soqta pachak (3,600) runakunata churarqan capatazninkuna kananpaq.