Isaías
Babiloniapita kacha aywaqkunata Ezequías chaskikushqan
2 Reyes 20.12-19; 2 Crónicas 32.27-31
39 Tsay witsanmi Babilonia nacionpa mandaqnin rey Merodac-baladán musyarqan rey Ezequías pasaypa antsa qeshyaykashqanpita aliyashqanta. (Merodac-baladánqa Baladánpa tsurinmi karqan.) Tsaymi cartakunata y regäluta apatsirqan.
2 Kachakuna chayaptinmi Ezequías kushishqa chaskikurqan. Paykunatami rikatsirqan qellayninta, qorinta, chanin cuestaq perfüminta, olïvupita rurashqa aceitinta, armankunata y churakunan wayikunacho lapan imaykankunatapis. Palaciuncho kaqta y mandashqan nacioncho kaqtaqa lapantami rikatsirqan.
3 Tsaymi profëta Isaías rey Ezequíasman aywaykur kayno nirqan: “Tsay runakunaqa ¿maypitataq shamushqa? Y ¿imatataq nishushqanki?”
Tsayno tapuptin Ezequías kayno nirqan: “Paykunaqa shapäkamushqa Babilonia nacionpitami”.
4 Niptinmi Isaías yapay kayno tapurqan: “Palaciucho ¿imatataq rikapäkushqa?”
Tsawraqa Ezequías kayno nirqan: “Palaciucho kaqkunata y churakuna wayicho kaqkunatami lapanta rikatsishqä”.
5 Tsawraqa Ezequíasta Isaías kayno nirqan: “Kanan wilashayki lapanta mandaq TAYTA DIOS imata nishqantapis. 6 TAYTA DIOSMI kayno nin: ‘Tiempu chayamunqanami Babilonia nacionpita soldädukuna kay markata atacarkur palaciucho rikatsishqayki riquëzakunata apakärinanpaq. Unay ayluykikuna shuntashqanta y qam shuntashqaykitapis lapantami apakärinqa. Tsayno apakuptinmi kaychöqa wayralana tumaykanqa. 7 Qampita miraqkunatapis wakintaqa Babilonia nacionmanmi apakärinqapaq. Tsayman chayaykatsirmi reypa ashmaynin kananpaq olqu kaqkunata capapäkunqa’ ”.*
8 Tsaymi rey Ezequíasqa Isaíasta kayno nirqan: “TAYTA DIOS nishqanta alimi wilamashqanki”.
Shonqulanchöna yarparmi kayno nirqan: “Tsawraqa kawashqäyaq imapis manami pasanqaraqtsu”.