Ezequiel
Egipto runakunata castigananpaq nishqan
29 Babiloniaman prësu apapäkamashqan chunka wata cumplinanpaq ishkay killa pishiykaptinmi chunka ishkay junaqcho TAYTA DIOS kayno nimarqan: 2 “Runapa tsurin, Egipto nacionpa mandaqnin rey Faraón kaq lädupa rikärir wilakuy paypa y Egipto runakunapa contran kashqäta.* 3 Wilakur kayno ninki:
“ ‘TAYTA DIOSMI kayno nin:
Egipto nacionpa mandaqnin rey Faraón, contraykimi kaykä.
Mayu chawpincho jatunkaray mantsakuypaq uywanömi kaykanki.
Tsayno karmi Nilo mayu kikikipa kashqanta niykanki.
Tsaynöpis niykanki tsay mayuta kikiki rurashqaykitami.
4 Tsayno niykaqtami noqa shamur jatun anzuëluwan shimipita shequmushayki.
Mayupita jorqamuptïmi tsaytsika pescädukuna escämaykiman laqakashqa yarqapäkamunqa.
5 Nirkurmi janaykicho laqaraykaq pescäduntinta chunyaq jirkacho kacharishaykipaq.
Tsaycho jitaraptiki manami pipis shuntashunkipaqtsu.
Munti uywakuna y wiskulkunami mikupäkushunkipaq.
6 Tsaynöpami Egipto runakunapis tantiyakärinqa TAYTA DIOS kashqäta.
“ ‘Yanapanaykipaq Israel runakuna yärakushuptikipis shoqush tukrunölami kashqanki.*
7 Aptarkushuptiki pakikarmi paykunata chiklaskunpa tsalkushqanki.
Tuknakushuptikipis pakikaptikimi tunir tseqlanta pakikushqa.
8 “ ‘Tsaymi TAYTA DIOS kayno nin: Egipto nación, qamcho taq runakunatapis y uywakunatapis espädäwanmi chipyaq ushakätsishaq. 9 Nilo mayuta kikiki rurashqaykita nishqaykipita y tsay mayu qampa kashqanta nishqaykipitami pipis mana tänan chunyaqman tikratsishaykipaq. Tsaynöpami TAYTA DIOS kashqäta musyanki.
10 “ ‘Egipto nación, qampapis y mayuykikunapapis contraykimi kaykä. Qamta ushakätsirmi pasaypa chunyaqta kacharishaykipaq. Migdol markapita Sevene markayaq y tsaypita Etiopía tinkuq lindërunyaqmi ushakätsishaykipaq. 11 Chusku chunka (40) watayaqmi pasaypa chunyaq kankipaq. Manami runapis ni uywakunapis tsaycho purinqatsu.
12 “ ‘Wakin nacionkunata ushakätsishqäpitapis mas peormi qamta ushakätsishayki. Markaykikunatapis wakin markakunapita peormi raqälatana kacharishaq. Chusku chunka (40) watayaqmi tsaynöla kankipaq. Qamcho taykaq runakunatapis maytsay nacionkunamanmi qarqurishaq.
13 “ ‘TAYTA DIOSMI kayno nin: Chusku chunka (40) watapitaraqmi Egipto runakunata may nacionman qarqushqäpita shuntamushaq. 14 Paykunata prësu apashqanpita shuntarkamurmi unay aylunkuna yurishqan Patros partiman apashaq. Tsaychömi pipis mana cäsushqa nación kanqa. 15 Pasaypa walkaqyätsiptïmi wakin nacionkunanönatsu munayniyuq kanqa. Tsaymi wakin nacionkunata munayninman churanqanatsu.
16 “ ‘Egiptupa mandaqnin Faraónmanqa Israel runakuna manami yapay yärakunqanatsu. Tsaymi tantiyakärinqa Faraónman yärakur conträ sharkapäkushqanta. Tsaynöpami TAYTA DIOS kashqäta musyapäkunqa’ ”.
Egipto runakunata Nabucodonosor vincinanpaq nishqan
17 Babiloniaman prësu apapäkamashqan ishkay chunka qanchis (27) wata qalaykunan killami TAYTA DIOS kayno nimarqan: 18 “Runapa tsurin, Babilonia nacionpa mandaqnin rey Nabucodonosor soldädunkunawan Tiro nación runakunata atacashpan aläpami nakapäkushqa. Tsaymi soldädunkunapa umankunapis paqla rikakushqa y waqtankunapis shuplushqa.* Tsayno arurpis vinciyta mana puëdir manami imatapis jorqushqatsu.
19 “Tsaymi TAYTA DIOS kar kayno nï: Babilonia nacionpa mandaqnin rey Nabucodonosor Tiro markapita imatapis mana jorqushqa kaptinmi Egipto nacionta vincinanpaq kamakätsishaq. Tsaymi Egipto runakunapa riquëzankunata y imaykankunatapis apakushpan tsaywan soldädunkunata päganqa. 20 Noqa kachaptïmi Tiro markata atacaq aywashqa. Tsaymi kananqa Egiptumanna kachashaq tsaypita imaykantapis apakunanpaq”. TAYTA DIOSMI tsayno nin.
21 “Tsay witsanmi Israel nacionta yanapashaq unay munayniyuq kashqanno yapay munayniyuq kananpaq. Ezequiel, tsaynölami qamtapis yanapashayki wilakuynïta wilakuptiki Israel runakuna shumaq chaskikärinanpaq. Tsayraqmi TAYTA DIOS kashqäta musyapäkunqa”.