Efesios
Éfeso markacho taq yärakuq mayinkunaman apóstol Pablo cartata apatsishqan
Carta qalaykunan
1 Éfeso* markacho salvashqa kaqkuna:
Noqa Pablo, Jesucristupa *apostolnin kanäpaq Tayta Dios akramashqa kaptinmi qamkunapaq kay cartata apaykätsimü. Jesucristo munashqanno kawarmi qamkunaqa Tayta Diospana karkaykanki. 2 Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki.
Tayta Diosta agradëcikushqan
3 ¡Señor Jesucristupa Papänin Tayta Dios alabashqa kaykulätsun! Jesucristucho kaptintsimi gloriacho kaykaq lapan bendicionninkunata qomashqantsi. 4 Kay patsata manaraq kamarmi Jesucristuman churamashpantsi Tayta Dios akramarqantsi paypa nawpancho jutsaynaq y *santu kanantsipaq. 5 Kuyamashpantsimi kikin munashqanno destinamarqantsi Jesucristo kayninpa wamran kanantsipaq. 6 Kuyashqan Tsurinwan tsayno destinamashqantsipitami imaypis payta alabashun.
7 Kuyapäkuq karmi Tsurinpa yawarninwan rantimashpantsi lapan jutsantsikunata perdonamashqantsi.* 8 Pasaypa kuyapämashpantsimi y yachayta qomashpantsimi 9 runakuna mana musyashqanta Tayta Dios musyatsimashqantsi. 10 Tsaymi musyatsimashqantsi jana patsacho kaqkunata y kay patsacho kaqkunatapis pay destinashqan junaq Jesucristupa makinman lapanta churananpaq kashqanta.
11 Kikin munashqanno lapantapis ruraq karmi noqantsitapis Jesucristucho kaptintsi Tayta Dios destinamashqantsi herenciantsita* chaskinantsipaq. 12 Paymi kamakätsishqa Israel runakuna Jesucristuman puntata yärakur payta alabapäkunanpaq.* 13 Qamkunapis ali wilakuyninta mayarmi Jesucristuman yärakur salvakärishqanki. Tsaynöpami promitishqan Espíritu Santuwan* Tayta Dios shonquykita sëllashushqanki. 14 Espíritu Santuta qomashpantsimi Tayta Dios musyatsimantsi herenciantsita qomänantsipaq kashqanta y wamran kanantsipaq rantimashqantsita. Tsayno salvamashqantsipitami imaypis payta alabashun.
Wawqi panikunapaq Tayta Diosta manakushqan
15 Tsaymi Señor Jesucristuman shumaq yärakärishqaykita musyar y wawqi panikunawan kuyanakushqaykita musyar 16 Tayta Diosta qamkunapaq manakur imaypis agradëcikü. 17 Tsaynöpis Señornintsi Jesucristupa Papänin munayniyuq Tayta Diostami manakü Espíritu Santuwan tantiyatsishuptiki payta *reqipäkunaykipaq. 18 Shonquykicho tsayno tantiyatsishuptikimi musyapäkunkipaq Tayta Dios qayashushpayki imapaq salvashushqaykita, pasaypa ali herenciata chaskishqaykita* 19 y payman yärakuqkunata munayninwan shumaq yanapashqanta. 20 Tsay munayninwanmi Jesucristuta kawarirkatsimur gloriacho alawqa kaq nawpanman jamatsishqa.* 21 Tsaynöpami Jesucristuta Tayta Dios churashqa kay vïdacho y juk vïdachöpis munayniyuq kananpaq. Tsaymi *angilpitapis, *supaypitapis y pïmay runapitapis mas munayniyuq kaykan.
22 Tsayno munayniyuq kaptinmi lapan imaykatapis paypa munayninman Tayta Dios churashqa.* *Iglesiata kuyarmi payta churashqa lapanpapis mandaqnin kar uman kananpaq. 23 Noqantsinami iglesian kar cuerpun kaykantsi.* Tsaymi imaypis yanapaykämantsi munashqanno kawanantsipaq. Paypa makinchömi lapanpis kaykan.