2 Crónicas
Judá nacioncho Acaz rey kashqan
28 Mandayta qalaykushqan witsan Acazqa ishkay chunka (20) watayuqmi kaykarqan. Payqa chunka soqta watami Jerusalénpita mandarqan. Acazqa manami unay aylun Davidnötsu TAYTA DIOS munashqanta rurarqan. 2 Tsaypa trukanqa Israel nación reykunanömi *Baal ïdulukunata metalpita fundiykatsir adorarqan. 3 Tsay ïdulukunapaqmi Ben-hinom raqracho inciensuwan qoshtatsirqan. Tsaynölami tsurinkunatapis sacrificiupaq tsaycho rupatsirqan. Tsayno rurarmi TAYTA DIOS unay qarqushqan mana Israel runakunano pasaypa jutsata rurarqan. Tsay runakunatami TAYTA DIOS markankunapita qarqurqan Israel runakuna chayanan witsan. 4 Tsaynölami Acazqa markakunacho kaykaq *altarkunacho, jirkankunacho y copösu yörakuna sikinchöpis sacrificiukunata rupatsir inciensuwan qoshtatsirqan.
5 Tsayno jutsata rurashqanpitami TAYTA DIOS kachaykurqan Siria nacionpa mandaqnin reypa munayninman. Tsaymi Siria runakuna atacashpan vincirkur atska Judá runakunata Damascuman prësu apakärirqan.
Tsaynölami Israel nacionpa mandaqnin reypa munayninmanpis Judá runakunata Tayta Dios entregarqan. Tsaymi tsay reypis soldädunkunawan atacar Judá runakunata wanutsir usharqan. 6 Tsaynöpami Remalíaspa tsurin Peka juk junaqlacho soldädunkunawan wanutsirqan pachak ishkay chunka waranqa (120,000) Judá runakunata. Tsay wanuq runakuna karqan ali chölulantaqmi. Paykuna tsayno wanurqan unay aylunkuna yärakushqan TAYTA DIOSTA mana cäsukushqanpitami.*
7 Pelyay yachaq Zicripis wanutsirqan Judá nacionpa mandaqnin reypa tsurin Maasíasta, palaciuncho mandaq Azricamta y reypa capitannin Elcanata. Zicriqa Efraín trïbu runami karqan. 8 Israel soldädukunami prësu tsarirkur apakärirqan ishkay pachak waranqa (200,000) Judá runakunata. Tsay prësukuna karqan Judá runakunapa warminkuna, olqu tsurinkuna y warmi tsurinkuna. Tsaynölami paykunapa lapan imaykantapis apakurkur Samaria markapa kutikärirqan.
9 Israel nacionchömi kaykarqan TAYTA DIOSPA profëtan Obed. Paymi Israel soldädukuna Samariaman kutirkaykaptin taripaykur kayno nirqan: “Unay ayluykikuna yärakushqan TAYTA DIOSMI Judá runakunapita pasaypa rabyashqa kar munaynikiman churamushqa. Tsayno kaptinpis qamkuna mana kuyapaypa wanutsipäkushqaykitami TAYTA DIOS rikashqa. 10 Kananqa yarparkaykanki Judápita y Jerusalénpita apamushqayki warmitapis olqutapis ashmaynikipaq tsararayta. Tsayno rurarqa ¿manatsuraq qamkunapis TAYTA DIOSNINTSITA rabyanarkaykätsinki? 11 Kanan nishqäta shumaq mayapäkamay. Ayluyki kaykaptinqa prësu apamushqaykikunata kutitsipäkuy. TAYTA DIOS pasaypa rabyashqami kaykan”.
12 Tsayno niptinmi Johanánpa tsurin Azarías, Mesilemotpa tsurin Berequías, Salumpa tsurin Ezequías y Hadlaipa tsurin Amasa tantiyakärirqan lutanta rurapäkushqanta. Paykunaqa Efraíncho* autoridäkunami karqan. Tsaymi guërrapita kutimuq soldädukunaman aywaykur 13 kayno nirqan: “Prësu apamushqayki runakunata ama yaykatsimuytsu. Yaykatsimuptikiqa masmi jutsayuq rikakushunpaq. Pasaypa jutsayuq kaptintsiqa Tayta Dios fiyupa rabyashpan castigamäshunchari”.
14 Tsayno niptin soldädukunaqa prësu aparkaykashqan runakunata manana yaykatsirqantsu. Tsaynölami apaykashqan imaykankunatapis autoridäkunapa y mayor runakunapa nawpanman churaykurqan. 15 Tsawraqa soldädukuna prësu apamushqan runakunata kuyapar tsay chusku autoridäkuna kamariparqan röpakunata y lanqikunatapis jatikärinanpaq. Tsay röpakunaqa soldädukuna guërrapita apapäkamushqanmi karqan. Nirkur mikuyta y yakutapis kamariparkur guërracho malograkamushqanta aceitiwan jampiparqan. Aywayta mana puëdiqkunataqa bürruman muntarkatsirmi aylunkunaman kutitsirqan palmërakuna kashqan Jericó markayaq. Tsayno kutirkatsirmi paykuna kutikärirqan Samaria markaman.
16 Tsay witsanmi Asiria nacionpa mandaqnin reyman rey Acaz kachata kacharqan yanapananpaq ruwakuq. 17 Tsayno ruwakurqan edomita runakuna Judá nacionman yaykuykur wakin runakunata wanurkatsir wakinta prësu apakärishqa kaptinmi. 18 Tsaynölami filisteo runakunapis Judá nacionman yaykuykur *Sefelacho kaykaq markakunata y *Neguevcho kaykaq markakunata acapararqan. Tsaynöpami acapararqan Bet-semes markata, Ajalón markata, Gederot markata, Soco markata, Timna markata, Gimzo markata y nawpancho kaq markakunatapis. Nirkurnami tsay markakunacho tarqan. 19 Tsaynöpami Judá runakunata TAYTA DIOS penqayman churarqan Acaz mana cäsukushqanpita y jutsata rurapäkunanpaq Judá runakunata shakyätsishqanpita.
20 Asiria nacionpa mandaqnin rey Tiglat-pileserpis yanapananpa trukanqa Acazta atacarqan. 21 Tsayno atacarqan yanapananpaq Acaz pägaykaptinpis. Payta pägananpaqmi qellayta y wakin chanin cuestaqkunata jorqurqan TAYTA DIOSPA wayinpita, kikinpa palaciunpita y autoridäkunapa wayinkunapita. 22 Asiriapita shamuq rey tsayno atacaptin pasaypa nakaykarpis rey Acazqa TAYTA DIOSTA mana cäsukur masraqmi jutsata rurarqan. 23 Tsayno karmi Damasco runakuna adorashqan dioskunapaq sacrificiukunata rupatsirqan kayno yarpashpan: “Siria runakunata* yanapaykarqa noqatapis sacrificiukunata rupatsiptï yanapamanqami”. Tsayno rurashqanpitami Acazta y Israel runakunata pasaypa desgracia pasarqan.
24 Tsaynölami TAYTA DIOSTA templuncho pipis mana adorananpaq Acazqa tsaycho kaykaq manëjukunata shuntarkur lapanta pakir usharqan. Templu patiuman yaykuna punkukunatapis wichqatsirqanmi. Nirkurna juk dioskunata adorapäkunanpaq Jerusalén markapa esquïnankunacho altarkunata ruratsirqan. 25 Tsaynölami Judá nacioncho kaykaq lapan markakunachöpis altarkunata ruratsirqan juk dioskunata inciensuwan tsaycho qoshtatsipäkunanpaq. Tsaykunata rurarmi unay aylunkuna yärakushqan Tayta Diosta pasaypa rabyanätsirqan.
26 Rey Acaz imata rurashqanpis qalaykunanpita ushananyaq qelqaraykan Judá runakunapa y Israel runakunapa mandaqnin reykunapa acta librunchömi. 27 Wanuykuptin pampapäkurqan Jerusaléncho kaykaq panteonman. Itsanqa manami pampapäkurqantsu Israel nacionpa mandaqnin reykuna pamparashqan panteonmanqa. Acazpa trukannami tsurin Ezequías rey karqan.*