2 Samuel
Gabaón runakuna Saúlpa aylunkunata wanutsishqan
21 David rey kashqan witsanmi kimsa wata muchuy karqan. Muchuy imanir kashqanta musyananpaq David manakuptinmi TAYTA DIOS kayno nirqan: “Kay muchuyqa kaykan Saúl y aylunkuna Gabaón runakunata mana kuyapaypa wanutsishqanpitami”.
2 Tsaymi Gabaón runakunata rey David qayatsirqan paykunawan parlananpaq. Paykunaqa manami Israel runakunatsu karqan, sinöqa amorreo runakunapita miraq runakunami. Paykunapa unay aylunkunatami Israel runakuna promitipäkurqan Gabaón runakunata mana wanutsipäkunanpaq.* Tsayno kaptinpis Gabaón runakuna tashqan markakunata Israel runakunapa y Judá runakunapa kananpaq shuntayta munarmi tsaycho taq atska runakunata Saúl wanutsirqan.
3 Tsaypitanami Gabaón runakunata David kayno tapurqan: “Ayluykikunata Saúl wanutsishqanpita ¿imatataq ruräman? Tsaynöpis ¿imatataq ruräman noqakunapaq TAYTA DIOSTA manakärinaykipaq?”
4 Tsayno niptinmi Gabaón runakuna kayno nipäkurqan: “Saúlpa aylunkunapita manami qellaytatsu ni qoritatsu munapäkü. Tsaynöla manami munayniyuqtsu karkaykä kikïkunapa yarpayniläpita Israel runata wanutsipäkunäpaq”.
Tsayno niptin David kayno nirqan: “Tsawraqa ¿imata ruranätataq munarkaykanki?”
5 Tsawraqa kayno nipäkurqan: “Saúlmi Israel nacioncho tänäta mana munashpan lapanïta ushakätsimayta munarqan. 6 Tsayno ruramashqanpita Saúlpa tsurinkunata karpis o wilkankunata karpis qanchis runakunata apapäkamuy wanutsipäkunäpaq. Paykunatami TAYTA DIOSPA nawpancho* wanurkatsir qerukunacho warkarätsishaq. Tsayno wanutsipäkushaq TAYTA DIOS akrashqan Saúlpa markan Gabaachömi”.
Tsawraqa rey David kayno nirqan: “Tsayno kaptinqa wanutsipäkunaykipaq apapämushayki”.
7 TAYTA DIOSPA jutincho Jonatánwan *pactu rurashqanta* cumplirmi Jonatánpa tsurin y Saúlpa wilkan Mefi-bosetta Gabaón runakuna wanutsinanta David mana munarqantsu. 8 Saúlpa tsurin kaq Mefi-bosetta y wawqin Armonitami itsanqa apaparqan wanutsipäkunanpaq. Paykunapa mamanqa karqan Ajapa tsurin Rizpa. Tsaynöpis apaparqan Saúlpa warmi tsurin Merabpa* pitsqa wawankunata wanutsipäkunanpaq. Paykunapa taytanqa Barzilaipa tsurin Adrielmi karqan. Adrielqa Mehola markapitami karqan. 9 Tsay qanchis runakunata Gabaón runakunaman apapaptinmi TAYTA DIOSTA adorakuna jirkancho wanurkatsir qerukunapa puntancho warkarätsirqan. Tsay qanchis runakunata wanutsipäkurqan cebäda cosëcha qalaykunanpaqna kaykaptinmi.
10 Tsawraqa ayakuna warkaraykashqanman Ajapa tsurin Rizpa aywaykurmi jatun rumi jananman cotenciata qeshtarqan. Tsayman jamaykurmi wiskulkuna y munti uywakuna mana mikunanpaq paqaspa junaqpa washäkurqan. Tsayno washäkurqan cebäda cosëcha qalaykushqanpita tamya killa chayamushqanyaqmi.
11 Saúlpa *concubïna warmin Rizpa tsayno täparaykashqanta Davidta wilaptinmi 12 Galaad particho kaykaq Jabes markaman aywaykur Saúlpa y tsurin Jonatánpa tulunkunata shuntamurqan.
Nawpatami filisteo runakuna Saúlta y Jonatánta Gilboacho wanurkatsir Bet-sán pläzacho ayankunata warkupäkurqan. Tsaypitami Jabes runakuna suwarkur markanman apapäkurqan pampapäkunanpaq.* 13 Tsaypitami Saúlpa y tsurin Jonatánpa tulunkunata Jabes markapita David shuntatsimurqan. Tsaynölami Gabaón runakuna wanutsishqan qanchis runakunapa tulunkunatapis shuntatsimurqan. 14 Shuntarkatsimurmi Saúlpa y tsurin Jonatánpa tulunkunata churapäkurqan Saúlpa taytan Cispa tulunkuna churarashqan sepultüraman. Tsay sepultüraqa karqan Benjamín trïbu runakuna tashqan Zela markachömi. Rey David nishqannöla lapanta rurapäkuptinmi Israel runakunata Tayta Dios yanaparqan mikuyninkuna alina wayunanpaq.
Chusku jatusaq runakunata wanutsipäkushqan
15 Filisteo runakuna Israel runakunata yapay atacaptinmi soldädunkunawan David aywarqan pelyapäkunanpaq. Pelyaykashqancho David pasaypa utikaptinmi 16 Isbi-benob jatusaq casta runa Davidta qatipaykarqan wanutsiyta munar. Tsay runapa lanzanmi lasarqan kimsa kïlupita masraq. Espädanpis mushuqlami karqan. 17 Davidta tsarinanpaq kaykaptinmi Sarviapa wawan Abisai cörriyla aywaykur filisteo runata wanutsirqan. Tsaypitami soldädunkuna Davidta kayno nipäkurqan: “Kananpitaqa amana noqakunawan guërraman aywaynatsu, tayta. Pelyacho wanutsishuptikiqa Israel nacioncho atskiynaqnöchari rikakärishaqpaq”.
18 Tsaypita Gob partichönami filisteo runakunawan yapay guërrata rurapäkurqan. Tsaychömi jatusaq casta Saf jutiyuq runata Sibecai wanutsirqan. Sibecaiqa Husa markapitami karqan.
19 Tsaypita yapaymi Gobcho filisteo runakunawan guërrata rurapäkurqan. Tsaychömi Belénpita kaq Jaare-oregimpa tsurin Elhanán wanutsirqan Gat markapita kaq Goliatta. Goliatpa lanzanpis telar qeruno rakumi karqan.
20 Gat markacho yapay guërra kaptinmi jatusaq casta filisteo runa yarqamurqan Israel runakunawan pelyananpaq. Paypa cada makincho y cada chakincho soqta dëdun kaptinmi ishkay chunka chusku (24) dëdunkuna karqan. 21 Paytami Israel runakunata achäquita ashipaykaptin Davidpa wawqin Simeapa* tsurin Jonatán wanutsirqan.
22 Tsay chusku jatusaq filisteo runakunami karqan Gat markapita Refa aylu runakuna. Paykunatami David y soldädunkuna wanutsipäkurqan.