Jeremías
Ishkay canasta hïgusta revelacioncho Jeremías rikashqan
24 Judá nacionpa mandaqnin rey Joacimpa tsurin Jeconíasta, Judá nación autoridäkunata, *artesänukunata y herrërukunata Babilonia nacionpa mandaqnin rey Nabucodonosor nacionninman apakuptinmi* TAYTA DIOS revelamarqan templu punkucho ishkay canastawan hïgus kaykaqta. 2 Jukaq canastachöqa punta poquq hïgus maypis mikukuypaqmi karqan. Jukaq canastachönami pasaypa melanaypaq ismushqa hïguskuna karqan.
3 Tsaymi TAYTA DIOS kayno tapumarqan: “Jeremías, ¿imatataq rikaykanki?”
Tsawraqa kayno nirqä: “Hïgustami rikaykä. Juk canastachömi kaykan maypis mikukuypaq ali hïgus. Jukaq canastachönami kaykan melanaypaq pasaypa ismushqa hïgus”.
4 Tsaymi TAYTA DIOS kayno nimarqan: 5 “Israel runakunata kuyaq TAYTA DIOS kaynömi nin: ‘Babilonia* runakunapa nacionninman prësu apatsishqä Judá runakunata ali hïgustanömi rikashaq. 6 Ima desgraciapitapis tsapashpämi Judá nacionman shuntamur ali kawananpaq yanapashaq. Yapayqa manami ushakätsishaqnatsu ni qarqushaqnatsu. 7 TAYTA DIOSNIN kashqäta tantiyananpaqmi paykunata shumaq tantiyatsishaq. Paykunami kuyashqä runakuna kanqa. Noqanami paykunapa Diosnin kashaq. Lapan shonqunwan yapay yärakamaptinmi tsayno kanqa.
8 “ ‘Judá nacionpa mandaqnin rey Sedequíasta, yanapaqninkunata, Jerusaléncho quëdaq runakunata y Egiptuman qeshpiq runakunatami itsanqa ismushqa hïgusno kananpaq churashaq. Noqa TAYTA DIOSMI tsayno nï. 9 Tsay runakunata castigashqäta musyarmi maytsay nacioncho taq runakunapis mantsakanqa. Maymanpis qarqushqäman chayaptin pïmaypis manakaqman churar jamurpanqa y asipanqa. Pasaypa maldicionädumi kanqapaq. 10 Nacionnincho chipyaq ushakashqanyaqmi wakinkuna guërracho wanunqa, wakinkuna yarqaypita wanunqa y wakinkunanami pesti qeshyawan wanunqa. Tsayno ushakanqa unay aylunkunata y kikinkunata tsay nacionta qoykushqa kaptïpis’ ”.