Ezequiel
Templu rurincho imano kashqanpis
41 Nirkurmi Lugar Santuman tsay runa pushamarqan. Punku ishkan lädupa perqata tupuptinmi anchun karqan kimsa metru. 2 Punkupa anchunta tupuptinnami karqan pitsqa metru. Punkupa cada läduncho kaykaq perqakunapa largunta tupuptinmi karqan ishkay metru pulan. Yaykuna punkupita frentincho kaq punkuyaq karqan ishkay chunka (20) metrumi. Tsay cuartupa anchunmi karqan chunka metru.
3 Tsaypitami pushamaq runa ruri kaq cuartuman yaykurqan. Tsay punku perqata ishkan lädupa tupuptinmi anchun karqan juk metru. Punkupa anchunta tupuptinnami karqan kimsa metru. Punkupa cada läduncho kaykaq perqakunapa largunta tupuptinmi karqan kimsa metru pulan. 4 Ruri kaq cuartupa cada lädunta tupuptinmi largunpis anchunpis chunka metru karqan. Nirkurmi pushamaq runa kayno nimarqan: “Kay cuartuqa Lugar Santïsimumi kaykan”.
Templuman laqaraykaq cuartukuna
5 Nirkur tsay runa tupurqan templupa perqanta. Tupuptinmi anchun karqan kimsa metru. Tsaynöpis tumariqmi templuman laqaraq cuartukuna karqan. Tsay cuartukunapa anchunmi karqan ishkay metru. 6 Cuartukunaqa karqan kimsa chunkami (30). Tsay cuartukuna karqan ishkay altusniyuqmi. Altuskuna kananpaqmi templu waqtan perqacho patakkuna karqan. Tsay patakkunamanmi cuartukunapa terrädunkunata churarqan. Tsaymi terräduta churananpaq templuta mana uchkurqantsu.
7 Altuscho y janan kaq altuscho cuartukunaqa pampacho cuartukunapita mas anchumi karqan. Altusman y janan kaq altusman witsänanpaqmi wenqu escalëra karqan.
8 Tsaynöpis templu waqtanpa kimsa metru altu cimientu tumaraqtami rikarqä. Tsay cimientu jananchömi templu waqtacho kaykaq cuartukuna karqan.
9 Cuartukunapa perqanpa anchunmi karqan ishkay metru pulan. Tsaymi tsay cuartukunapita 10 cürakunapa cuartunkunayaq karqan chunka metru libri. Cürakunapa cuartunkunaqa templu waqtanpa tumariqmi karqan. 11 Templucho laqaraykaq cuartukunapa punkunkunami jäkuq lädupa karqan. Jukaq punkumi rikararqan norti kaq lädupa y jukaq punkunami rikararqan sur kaq lädupa. Templu waqtanpa tumaparämuq jäkuq kaqpa anchunmi ishkay metru pulan karqan.
Templupa qepancho kaq wayi
12 Templu qepanchömi jatunkaray wayi karqan. Tsay wayi rikararqan frentincho kaykaq patiu lädupami. Tsay wayipa anchunmi karqan kimsa chunka pitsqa (35) metru. Largunnami karqan chusku chunka pitsqa (45) metru. Wayipa perqanpa anchunmi karqan ishkay metru pulan.
Templuta tupushqan
13 Tsaypitanami templuta tupurqan. Tupuptinmi karqan pitsqa chunka (50) metru largu. Tsaynöpis templu qepancho kaykaq patiuta, wayita y perqata tupuptinmi karqan pitsqa chunka (50) metru largu. 14 Templupa anchunta y punkun patiupa anchunta tupuptinmi karqan pitsqa chunka (50) metru. 15 Nirkur tupurqan templu qepancho kaykaq jatun wayita. Tsay wayiqa frentincho kaykaq patiupami rikararqan. Tupuptinmi tsay wayi karqan ishkan lädu cuartuntin pitsqa chunka (50) metru.
Templu rurin imano kashqanpis
Templu rurin y yaykunanpis 16 entablashqami karqan. Tsaynölami quiciunkunapis, rëjashqa ventänakunapis y lapan perqakunapis pampapita ventänayaq y ventänapita janamanpis entablashqa karqan. 17 Mas ruri kaq cuartupa y wakin cuartukunapa lapan perqankunachöpis 18 *querubinkuna y palmërakunami dibujararqan. Juk querubín y juk palmëra, juk querubín y juk palmërami tumariq dibujararqan.
Tsay querubinkunaqa nawpaqpa y qepapa qaqlayuqmi karqan. 19 Jukaq qaqlanqa runapa qaqlan niraqmi karqan. Tsay kaq qaqlanmi rikaraykarqan jukaq palmëra kaqpa. Jukaq qaqlannami leonpa qaqlan niraq karqan. Tsay kaq qaqlannami rikaraykarqan jukaq lädu palmëra kaq lädupa. Intëru templuchömi tsayno dibujaraykarqan. 20 Querubinkuna y palmërakunami intëru templu perqacho pampapita punku jananyaq dibujararqan.
21 Templuman yaykuna quiciunkunami karqan chusku esquïnayuq.
Diospa nawpancho kaykaq mësa
Lugar Santïsimuman yaykunachömi 22 qerupita rurashqa *altar karqan. Altunmi karqan juk metru pulan. Largun y anchunpis juk metrumi karqan. Tsay altarpa esquïnankuna, janankuna y jamaräkunanpis qerupita rurashqami karqan. Tsaymi pushamaq runa nimarqan: “Kayqa TAYTA DIOSPA nawpancho kaykaq mësami”.
Templucho punkukuna kashqan
23 Lugar Santuman y Lugar Santïsimuman yaykunapis punkuyuqmi karqan. 24 Cada punku ishkay höjayuqmi kaykarqan wak läduman kay läduman kichananpaq. 25 Perqakunacho dibujaraqnölami tsay punkukunachöpis *querubinkuna y palmërakuna dibujaraykarqan.
Templuman yaykuna punkuqa tablawanmi qataraykarqan.
26 Yaykuna cuartukunapis ventänayuqmi karqan. Tsaychöqa palmërakunalami dibujaraykarqan.
Templuman laqaraykaq cuartukunaqa karqan qerupita rejïllayuqmi.