Deuteronomio
25 “Piwanpis rimanakurqa autoridäman ishkan aywanqa. Autoridäkunanami jutsaynaq kaqta kacharinqa y jutsayuq kaqta castiganqa. 2 Astashqa kananpaq kaptinqa pampaman lätaykatsirmi jutsata rurashqanman tupu juez astatsinqa. 3 Ima kaptinpis chusku chunka (40) makipita mastaqa ama astapäkunkitsu.* Masta astaptikiqa penqaypaqmi kanqa.
4 “Ëracho arutsir töruta ama shenqalwankitsu.*
5 “Tsay wawqila juk wayicho taykaptin wawqin tsuriynaq wanuptinqa wawqinmi viüdawan tanqa. Tsaynöpami cumplinqa wawqinpa viüdanwan tänanpaq kaykaq leyta. Tsay viüda manami juk runawanqa tanmantsu. 6 Tsay viüdacho punta kaq tsurinmi wanuq wawqinpa jutinta aparanqa. Tsaynöpami wanuqpa jutin Israelcho mana qonqakanqatsu.*
7 “Tsay runa cuñädanwan tayta mana munaptinqa marka punkuman aywaykur mayor runakunaman cuñädan quejakunqa. Paykunatami kayno ninqa: ‘Cuñädü manami munantsu wawqinpa jutin Israel nacioncho aywaränanta. Manami munantsu ley nishqanno noqawan tayta’. 8 Tsawraqa mayor runakuna qayaykatsir cuñädunta ninqa cuñädanwan tänanpaq. Paykuna niptinpis tayta mana munaptinqa 9 cuñädan viüda mayor runakunapa nawpancho cuñädunpa lanqinta qechunqa. Nirkur qaqlanman toqaparkur kayno ninqa: ‘Kaynömi rurantsi pï runapis wawqinpa jutinta aparänanta mana munaq kaqtaqa’. 10 Tsaypita patsami tsay runata y paypita miraqkunatapis ‘qara chakikuna’ nipäkunqa.
11 “Ishkay runakuna pelyaykaptin jukninpa warmin chayaykur runanta washashpan contranpa runtunpita aptakurkuptinqa 12 tsay warmipa makinta mana kuyapaypa roqupäkunki.
13 “Imata rantirpis o imata rantikurpis balanzaykiwan ama engañankitsu. 14 Tsaynöla tupuykipis complëtu kanqa. 15 Balanzayki exactu kaptin y tupuykipis complëtu kaptinmi TAYTA DIOS qoykushunaykipaq kaykaq nacioncho atska wata ali kawapäkunkipaq. 16 Balanzawan y tupukunawan suwakuptikiqa TAYTA DIOS pasaypami rabyakun.*
Amalecita runakunata ushakätsinanpaq nishqan
17 “Qamkuna ama qonqapäkuytsu Egiptupita shapäkamuptiki amalecita runakuna contrayki kashqanta. 18 Yarpapäkuy utikashqa karkaykaptiki taripaykushushpayki qepakashqa kaykaq runakunata atacashqanta. Amalecita runakunaqa Tayta Diostapis mana *mantsakuypami tsayno atacashurqayki. 19 Qoykushunaykipaq kaykaq nacioncho contraykikunata ushakätsinaykipaq TAYTA DIOS yanapashuptiki amalecita runakunatapis mana qonqaypa ushakätsinki.*