Job
Tantiyakuypita parlashqan
28 Qellay mïnaqa reqishqa partilachömi kaykan.
Tsaynölami qori tsulutsikunapis reqishqa partilacho kaykan.
2 Alpacho kaykaqtami fiërrutapis jorquntsi.
Rumicho kaykaqtami cobritapis rakintsi.
3 Runaqa mïnata uchkurmi atskikurkur mayyaqpis yaykun.
Tsaypitami tukuy niraq mineralkunata jorqamun.
4 Tsay mïnakunataqa jäkuq jirkakunachömi kichan.
Pipis mana yaykushqanmanmi waskakunawan watakurkur yaykun.
5 Patsa janancho mikuy wayuptinpis patsa rurinchöqa nina rupaykaqnömi kaykan.
6 Tsaypitami zafiro rumitapis jorqapäkun.
Oqtishqan ñutqu alpachöpis qorimi kaykan.
7 Tsay partitaqa manami ankapis ni condorpis rikantsu.
8 Tsaymanqa manami jirka uywakunapis chayantsu.
Ni leonkunapis tsaychöqa manami purintsu.
9 Runaqa qaqakunatami uchkun.
Niykälarmi puntakunatapis talamaykälar ushan.
10 Qaqakunachömi uchkuta ruran.
Tsaychömi tukuy niraq tesörukunata tarin.
11 Oqtiykälarmi mayu maypita yarqamushqantapis tarin.
Uchkushqanpitami pipis mana rikashqanta jorqamun.
12 Patsa rurincho tsaykunata tarirpis ¿maychöraq yachayta y tantiyakuyta tarinman?
13 Runaqa manami musyantsu tantiyakuq kay lapanpitapis mas ali kashqanta.
Tantiyakuq kaytaqa manami lutalatsu tarintsi.
14 Wanwanyaykaq uchkukunapis kaynömi nin: “Tantiyayqa manami kaychötsu”.
Lamarpis kaynömi nin: “Noqa kaqchöpis tantiyayqa manami kantsu”.
15 Tantiyakuytaqa manami qoriwanpis ni qellaywanpis rantintsitsu.
16 Ni Ofirpita apamushqan mas ali kaq qoriwanpis manami rantiyta kamäpakuntsu.
Ni ali kaq ónice rumiwanpis ni ali kaq zafiro rumiwanpis manami rantiyta kamäpakuntsu.
17 Tantiyakuymanqa qoripis ni diamantipis manami tinkuntsu.
Manami alinnin kaq alhäjawanpis trukayta puëdintsitsu.
18 Yachayqa coral rumipitapis y kuyaylapaq perlaskunapitapis masmi välin.
Tsaymanqa mas kuyaylapaq rumikunapis manami tinkuntsu.
19 Tantiyakuymanqa Etiopíapita apamushqan topaciupis manami tinkuntsu.
Manami alinnin kaq qoriwanpis rantiyta kamäpakuntsu.
20 ¿Maychöraq tarintsi tantiyakuyta?
Tsaynöpis ¿maychöraq kaykan yachay?
21 Runakuna mana rikananchömi pakaraykan.
Päriypa puriqkunapa mana rikananchömi pakaraykan.
22 Infiernupis y wanuypis kaynömi nin:
“Yachaypaqqa parlaqlatami mayashqä”.
23 Tayta Dioslami musyan tantiyakuy maycho kashqantapis.
Paylami musyan maycho tarinantsipaq kashqantapis.
24 Payqa kay patsata kuchu kuchumi rikaykan.
Kay patsacho ima kashqantapis lapantami musyaykan.
25 Tayta Diosmi wayratapis kalpata qoshqa.
Paymi kamakätsishqa yaku mayyaqla chayananpaqpis.
26 Paymi nishqa imay tamya tiempu kananpaqpis.
Tsaynölami nishqa räyukuna y elquykuna kananpaqpis.