Salmos
Yanapananpaq Tayta Diosta manakushqan
(1-2) Cantaqkunapa mandaqninpaqmi. Liriu waytakuna nishqan tönuwan kay testimoniu salmuta cantapäkunki. David qelqashqan salmu. Yachatsinapaqmi. Naharaim particho y Soba particho taq Aram runakunawan pelyashqanta yarparmi kay salmuta qelqarqan. Tsaynöpis kay salmuta qelqarqan Joab tsaypita kutir chunka ishkay waranqa (12,000) edomita runakunata Kachi Pampacho wanutsishqanta yarparmi.*
60 (3) Tayta Dios, rabyakushpaykimi noqakunata mana yanapamankinatsu.
Kananqa yapay yanapaykalämay.
2 (4) Qammi noqakunata castigamar kay patsata siksikyätsir kichakätsishqanki.
Kananqa kichakashqa kaykaqkunata wichqaykulayna.
3 (5) Noqakunata nakaymanmi churaykamashqanki.
Castigamaptikimi vïnuta upyashqa runano upatakashqa karkaykä.
4 (6) Qamta *mantsakuykaptïqa chikimaqnïkuna manaraq flëchamaptin qeshpikärinäpaq yanapaykalämay. Selah
5 (7) ¡Munaynikiwan noqakunata salvaykalämay!
Tsaynöpami kuyashqayki runakuna kar librina kapäkushaq.
6 (8) Templunchömi Tayta Dios kayno nirqan:
“Siquem partita y Sucot pampata qamkunatami kushishqa qoykushayki.
7 (9) Galaad runakuna y Manasés runakuna tashqanpis noqapami kaykan.
Efraín runakunaqa pelyacho tsapakunä cascumi kaykan.
Judá runakunaqa mandanä värami kaykan.
8 (10) Moab nacionqa maylakunä lavatoriumi kaykan.
Edom nacionmanmi lanqïta jitarishaq.
Filisteo runakunata vinciykurmi pasaypa kushikushaqpaq”.
9 (11) Murallashqa markata atacanäpaq noqakunata ¿piraq pushamanman?
Edom nacionta atacanäpaq ¿piraq chayaykatsimanman?
10 (12) Tayta Dios, kacharimaptikiqa manami pipis kantsu noqakunata yanapamänanpaq.
Mananachaq soldädükunatapis yanapankinatsu.*
11 (13) Runa yanapamashqanqa manakaqlapaqmi kanqa.
Chikimaqnïkunata supaynin apatsinäpaq yanapaykalämay.
12 (14) Tayta Dios yanapamaptintsiqa asulashunmi.
Paymi chikimaqnintsikunata ushakätsinqa.*