Oseas
Israel runakuna castigashqa kananpaq nishqan
13 Nawpataqa Efraín runakuna yätsiptin Israelcho wakin trïbukuna chaskikuqmi.
Tsayno kaykarpis *Baal diosta adorarmi Efraín runakunaqa wanushqanöna karkaykan.
2 Jutsa ruraytaqa manami kacharipäkuntsu.
Qellayta fundirkatsirmi munashqanno ïdulukunata rurarkaykätsin.
Nirkurmi kayno nipäkun: “Ïduluntsipaq sacrificiuta rupatsipäkushun”.
Tsayno nirmi turitu niraq ïduluta mutsapäkun.
3 Tsaymi tutapa pukutaypis y shulyapis elqakäkuqno elqanqa.
Tsaki oqshata wayra apakushqanno y hornupita qoshtay yarqur elqakaqnömi elqanqa.*
4 TAYTA DIOSMI kayno nin:
“Egiptucho unay ayluykikuna kashqanpita patsami TAYTA DIOSNIKI kaykä.
Noqalami qamkunapa salvadorniki kaykä.
Tsayno kaykaptïqa imamanpis ama ‘diosnï’ nir yärakäriytsu.*
5 “Unay ayluykikuna chunyaq jirkapa puriptin noqami ali rikarqä.
6 Qamkunaqa putsuy putsuy mikuyta kamariptïmi ali chölu tukärishqanki.
Tsaymi qonqaykamar mana cäsukärimashqankitsu.*
7 Tsayno kapäkushqaykipitami leonno y nänicho tigri pakakuykur atacaqno atacashayki.
8 Wawankunata suwapaptin ösu atacashqannömi qamkunatapis ushakätsishayki.
León atacar ushaqnömi pasaypa ushakätsishaykipaq.
Fiyu uywanömi pedäzu pedäzu ushakätsishayki.
9 “Israel runakuna, yanapaykaptïpis conträ kaptikimi ushakätsishayki.
10 Unay ayluykikunami manakärirqan mandashuqniki reykuna kananpaq.*
Kananqa ¡maychötaq tsay rey kaykan salvashunaykipaq!
Autoridänikikunapis ¡maychötaq karkaykan yanapashunaykipaq!
11 Mandashuqniki reykunata churapänäpaq manakamaptinmi rabyashqa karpis reyta churaparqä.*
Kananqa qamkunapitapis rabyashqa karmi mandashuqniki reyta elqätsishaq.*
12 “Qamkuna jutsata rurashqaykikunaqa lapanmi librucho apuntaraykan.
13 Wachay nanaywan warmi nakashqannömi qamkunapis nakapäkunkipaq.
Wachay nanay tsariptinpis yurinanpaq mana kamakaq y caprichüdu wamranömi karkaykanki.
Tsay wamra mamanpa pachancho jatikashqa kar wanushqannömi qamkunapis wanunkipaq.
14 “¿Wanuypita salvashaykitsuraq?
¡Manami salvashaykitsu!
¡Wanuy! ¡Ushakätsinaykipaq yarqamuy!
¡Sepultüra! ¡Ultakurkunaykipaq shamuy!
Tsay runakunata manami kuyapäshaqtsu.*
15 “Israel runakuna, pasaypa rïcuyashpayki kuyaylapaq waytano kaptikipis ushakätsishaykipaqmi.
Akaq wayra chunyaq tsaki jirkapita shamur yakuta y pukyukunata tsakitsishqannömi qamkunata ushakätsishaykipaq.
Contraykikuna shamurmi riquëzaykikunata y alhäjaykikunatapis qechurishushpayki apakärinqapaq.
16 (14.1) Samaria marka asulashqami kanqa.
Conträ rikakushqaykipitami espädawan wanutsishunkipaq.
Tsurikikunatapis pampamanmi saqtarinqapaq.
Chichu warmikunapa pachantapis qasharqärinqami”.