Lucas
Pilatuman Jesústa apapäkushqan
Mateo 27.1-2, 11-14; Marcos 15.1-5; Juan 18.28-38
23 Tsaypitanami Pilatuman lapan autoridäkuna Jesústa apapäkurqan. 2 Tsaychönami Pilatuta kayno nipäkurqan: “Kay runatami taripäkushqä nacionnintsipa contran sharkunanpaq runakunata shimita jatipaykaqta. Manami munantsu impuestuta mandaq *Césarpaq pägapäkunanta. Tsaynöpis niykan Cristo kar rey kashqantami”.
3 Tsaymi Jesústa *Pilato kayno tapurqan: “¿Rasunpaku Israel runakunapa mandaqnin rey kaykanki?”
Tsawraqa Jesús kayno nirqan: “Rasun kaqtami niykanki”.
4 Tsawraqa mandaq cürakunata y tsaycho juntaraykaq runakunata Pilato kayno nirqan: “Kay runapa ima jutsantapis manami tarïtsu”.
5 Tsayno niptin masraqmi nipäkurqan: “¡Kay runaqa autoridäkunapa contran sharkapäkunanpaqmi runakunata shimita jatipaykan! Galileapita qalaykur kay Judeachönami shimita jatipaykan”.
Herodesman Jesústa apapäkushqan
6 Tsayta mayar *Pilato kayno tapurqan: “¿Galileapitaku kay runa?”
7 “Awmi” nipäkuptinmi Galileacho mandaq Herodesman Jesústa apatsirqan juzgananpaq. Tsay junaqkunaqa Herodespis Jerusalénchömi kaykarqan.
8 Jesúspita parlashqanta mayashpanmi y milagru ruraykaqta rikayta munarmi nawpapita patsa Herodes reqiyta munarqan. Tsaymi Jesústa rikaykur kushikurqan. 9 Tsaycho yaparir yaparir Herodes tapuptinpis Jesús manami imatapis rimakurqantsu. 10 Tsaychömi mandaq cürakuna y ley yachatsiqkunapis Jesúspa contran imaykatapis nipäkurqan. 11 Tsawraqa reypa cäpanta ayluparkurmi soldädunkunawan Herodes asipashpan Jesústa manakaqman churapäkurqan. Nirkurnami Pilato kaqman kutitsirqan. 12 Tsay junaqmi Herodeswan Pilato chikinakushqanpita amistarqan.
Jesústa wanutsinanpaq Pilato mandashqan
Mateo 27.15-26; Marcos 15.6-15; Juan 18.39—19.16
13 Jesústa kutitsiptinnami mandaq cürakunata, autoridäkunata y lapan runakunata qayaykatsir 14 *Pilato kayno nirqan: “Qamkunaqa kay runata apamushqanki kayno nipäkushpaykimi: ‘Autoridäkunapa contran sharkapäkunanpaq runakunata shimita jatipaykan’. Tsayno niptikipis nawpaykicho tapur manami ima jutsantapis tarishqätsu nipäkushqaykinöqa. 15 Herodespis ima jutsantapis mana tarirmi kayman kutitsimushqa. Kay runa manami ima jutsatapis rurashqatsu wanutsishqa kananpaq. 16 Tsaymi astarkatsilar kacharishaq”.
17 [Cada watami *Pascua fiestacho Pilato juk prësuta kachariq.*] 18 Jesústa kachariyta munaptinmi lapan qaparparqan kayno nir: “¡Tsay runaqa wanutsun! ¡Barrabásta kachariyqa!”
19 Barrabásqa carcilcho wichqaraykarqan gobiernupa contran Jerusaléncho sharkushqanpita y runata wanutsishqanpitami.
20 Tsaymi runakunata Pilato yapay nirqan Jesústa kacharinanpaq. 21 Niptinpis masraqmi qaparar kayno nipäkurqan: “¡Crucificay! ¡Crucificay!”
22 Tsawraqa Pilato yapay kayno nirqan: “Kay runa ¿ima mana alitataq rurashqa? Wanunanpaqqa manami ima jutsantapis tarïtsu. Astarkatsilar kacharishaq”.
23 Tsayno niptinpis crucificashqa kananta munarmi masraq qaparparqan. [Mandaq cürakuna y] tsaycho kaq runakuna tsayno qaparpaptinmi Pilato awnirqan. 24 Tsaymi runakuna manakushqanno Jesústa wanutsinanpaq nirqan. 25 Gobiernupa contran sharkushqa kaykaptinpis y runata wanutsishqa kaykaptinpis runakuna munashqannölami Barrabásta kacharirqan. Jesústami itsanqa wanutsinanpaq paykunapa makinman kachaykurqan.
Jesústa crucificashqan
Mateo 27.32-44; Marcos 15.21-32; Juan 19.17-27
26 Jesústa crucificananpaq aparkaykaptinmi chakrapita kutiykämurqan Simón jutiyuq runa. Payqa Cirene nacionpitami karqan. Paytami nirqan Jesús apaykashqan cruzta umrurkur Jesúspa qepanpa apananpaq.
27 Atska runakunami Jesúspa qepanta aywapäkurqan. Tsaynölami atska warmikunapis lakikushpan waqaraykar aywapäkurqan. 28 Tsay warmikunata rikaykurmi Jesús kayno nirqan: “Jerusalén warmikuna, ama noqapaqqa waqapäkuytsu. Tsaypa trukanqa kikikikunapaq y wawaykikunapaq waqapäkuy. 29 Fiyupa nakay junaqkuna chayamunqanami. Tsay witsanmi runakuna kayno nipäkunqa: ‘¡Ima kushishqaraq kaykan qoluq warmikuna y itita mana chuchuq warmikuna!’ 30 Tsay witsanmi runakuna pasaypa nakar puntakunata kayno nipäkunqa: ‘¡Jukla ushakänäpaq janäman juchumuy!’ Qaqakunatapis kaynömi nipäkunqa: ‘¡Jukla nitipäkamay!’* 31 Loqyuraykaq yörata kayno ruraykarqa tsakishqa qerutaqa ¡imataraq rurapäkunqa!”*
32 Jesústawanmi ishkay jutsasapa runakunatapis crucificananpaq apapäkurqan. 33 Calavëra nishqanman chayaykatsirnami Jesústa crucificarqan. Apashqan jutsasapa runakunatami juknin kaqta Jesúspa alawqanman y jukaqtana itsuqninman crucificarqan.
34 [Tsay hörami Jesús kayno nirqan: “Kay runakunata perdonaykulay, papä. Manami musyapäkuntsu imata ruraykashqantapis”.]
Soldädukunanami Jesúspa röpanpaq suertita jitapäkurqan mayqanpis gänaq kaq apakunanpaq.*
35 Tsaycho runakuna rikarpaykaptinmi autoridäkuna Jesústa asipar kayno nipäkurqan: “Tayta Dios akrashqan Cristo kaykarqa jukta salvashqannöla mä kanan kikinpis salvakutsun”.
36 Tsaynölami soldädukunapis asipashpan pochquq vïnuta shoqutsiyta munar 37 kayno nipäkurqan: “Israel runakunapa mandaqnin rey kaykarqa mä kikiki salvakuy”.
38 Cruzpa puntanchömi juk letrëru kayno nirqan: “Kay runaqa Israel runakunapa mandaqnin reymi”. [Tsay qelqararqan griëgucho, latíncho y hebreo idiömakunachömi.*]
39 Tsaynölami crucificaraykaq jukaq runapis Jesústa manakaqman churar kayno nirqan: “Tayta Dios kachamushqan Cristo karqa mä kikiki salvakurir noqakunatapis salvapäkamay”.
40 Tsayno niptinmi juknin kaq olqüparqan kayno nir: “Qampis payno nakaykarqa ¿manaku Tayta Diosta *mantsakunki? 41 Noqantsiqa jutsantsikunapitami nakaykantsi. Payqa manami ima jutsatapis rurashqatsu”.
42 Nirkur Jesústa kayno nirqan: “Mandayta qalaykurqa noqata yarparkalämanki, tayta”.
43 Tsayno niptinmi Jesús kayno nirqan: “Rasunpami kayno nï: Kananpitaqa paraísuchömi noqawan kankipaq”.
Jesús wanushqan
Mateo 27.45-56; Marcos 15.33-41; Juan 19.28-30
44 Pulan junaqpita malway intiyaqmi patsa tsakakurkurqan. 45 Intipis manami atsikyarqantsu. Tsay hörami templu rurincho kaq cortïnapis pulanpa rachikäkurqan.* 46 Tsaypitami lapan kalpanwan Jesús qayakur nirqan: “¡Papä! ¡Makikimanmi almäta kachaykamü!”* Tsayno nirkushpanmi wanurqan.
47 Tsaykunata rikaykurmi soldädukunapa capitannin Tayta Diosta alabar kayno nirqan: “¡Rasunpami kay runaqa jutsaynaq kashqa!”
48 Tsaycho kaykaq runakunapis fiyupa lakikurmi pëchunta kutaraykar aywakärirqan.* 49 Jesúswan reqinakuqkunami karulapita lakishqa rikarpaykarqan. Paykunawanmi Galileapita qatiraq warmikunapis karkaykarqan.
Jesústa pampapäkushqan
Mateo 27.57-61; Marcos 15.42-47; Juan 19.38-42
50 Juk runami karqan José jutiyuq. Payqa Israel runakunapa autoridäninmi y Tayta Dios munashqanno kawaq ali runami karqan. 51 Judeacho kaykaq Arimatea markapitami karqan. Paypis Tayta Dios *mandaykashqantami shuyaraykarqan. Wakin autoridäkuna Jesústa wanutsinanpaq wilanakäriptinpis payqa manami munarqantsu. 52 Paymi *Pilato kaqman aywaykur manakurqan kayno nir: “Jesúspa ayanta kachapaykalämay pampanäpaq”.
53 Awniptinmi Jesúspa ayanta cruzpita jorqurir lïnupita rurashqa säbanaswan piturqan. Nirkurmi manaraq pipis pampakushqan qaqacho uchkushqa sepultüraman pamparqan. 54 Tsayno pamparqan jamay junaqpaq kamarikunan junaq ushaykaptinnami. Jamay junaq qalaykunanpaqna kaykarqan.*
55 Galileapita Jesúswan shamuq warmikunami Josépa qepanpa aywar sepultüra maycho kashqanta y Jesúspa ayanta imano pampashqantapis rikapäkurqan. 56 Tsaypita wayinkunaman kutiykärishpanmi ali asyaq* jachakunata y perfümita kamarikärirqan Jesúspa ayanman winapänanpaq. Kamarikurkurnami mandamientu nishqanno jamay junaq kaptin jamapäkurqan.