2 Samuel
Tayta Diospa babulninta Jerusalénman David apayta munashqan
6 Tsaypitami kimsa chunka waranqa (30,000) alinnin kaq Israel soldädukunata David shuntarqan. 2 Paykunawanmi Judácho kaq Baala* markaman aywapäkurqan Tayta Diospa babulninta Jerusalénman apapäkunanpaq. Babul janancho ishkay *querubín chawpinchömi lapanta mandaq TAYTA DIOSPA trönun kaykan.*
3 Tayta Diospa babulnin karqan Abinadabpa wayinchömi.* Tsay wayiqa karqan juk jirkanchömi. Wayipita jorqurirmi mushuq carrëtaman babulta churarkur Abinadabpa tsurinkuna Uza y Ahío apapäkurqan. 4 Carrëtapa nawpaqnintanami Ahío aywarqan. 5 Babulta apaptinmi Israel runakunawan Davidpis aywarqan qatswaraykar pasaypa kushishqa. TAYTA DIOSTA alabashpanmi arpakunata, *salteriukunata, panderëtakunata, shaqshaqyaqkunata y platïllukunatapis tukaraykar aywapäkurqan.
6 Nacónpa ëran kaqman chayaykur törukuna trancakar upaksaptinmi Uzaqa babul ishkinaptin tuknarqan. 7 Tsayno tuknaptinmi TAYTA DIOS pasaypa rabyakushpan Uzata jinan höra wanutsirqan. Tsaymi Uza wanur babul nawpanman tunirqan.*
8 Uzata TAYTA DIOS wanutsiptinmi David pasaypa rabyakurqan. Tsaypitami tsay ërapa jutinta churaparqan Pérez-uza* jutin kananpaq. Tsay jutilami hasta kananyaqpis kaykan. 9 Tsay junaqmi TAYTA DIOSTA mantsakushpan David kayno nirqan: “¡Kakulätsun, tayta! TAYTA DIOSPA babulninta ¡imapaqtaq apashaqpis!”
10 Tsayno nirmi tsay babulta *Davidpa Markanman mana aparqannatsu. Tsaypa trukanqa paytakurqan Gat markapita kaq Obed-edompa wayinmanmi. 11 Kimsa killayaqmi babul tsaycho paytakararqan. Tsaymi Obed-edomta y aylunkunata TAYTA DIOS lapanchöpis yanaparqan.*
Tayta Diospa babulninta Jerusalénman David apatsishqan
12 Tsaypitanami rey Davidta wilapäkurqan TAYTA DIOSPA babulnin Obed-edompa wayincho kaptin lapanchöpis ali yanapashqanta. Tsaymi TAYTA DIOSPA rabyaynin pasashqanta tantiyakushpan David tsayman aywaykur TAYTA DIOSPA babulninta Jerusalénman kushishqa apatsirqan. 13 Jerusalénman apapäkunanpaq yarqurkaykaptinmi Davidqa töruta y werannin carnita pishtarkur sacrificiupaq rupatsirqan. Tsayno rupatsirqan babulta apaqkuna soqta japayta japarkuptinmi. 14 Davidmi lïnupita rurashqa *efodnin jatishqa TAYTA DIOSPA babulninpa puntanta kushikushpan qatswaraykar aywarqan. 15 Tsaynömi Davidwan lapan Israel runakuna Jerusalénman babulta apapäkurqan. Tsaychömi kushikuypita qaparpashpan *cornëtakunata tukapäkurqan.
16 TAYTA DIOSPA babulninta *Davidpa Markanman* yaykaykätsiptinmi wayi ventänapita watqaykur Saúlpa tsurin Mical rikarqan Davidta TAYTA DIOSPA nawpancho qatswaraykar kushishqa aywaykaqta. Rey kaykar saltaypa saltar qatswaykaqta rikarmi shonqulancho jamurparqan.
17 Markaman chayaykatsirmi TAYTA DIOSPA babulninta churapäkurqan David sharkatsishqan toldu rurinman. Nirkurnami uywakunata David pishtarkatsir rupatsina sacrificiuta y jawka kawakuy sacrificiutapis TAYTA DIOSPA nawpancho rupatsipäkurqan. 18 Rupatsiyta usharkurmi lapanta mandaq TAYTA DIOSTA Israel mayinkunapaq manakur Davidqa Diospa jutincho bendicionta qorqan. 19 Nirkurmi olqutapis warmitapis lapan Israel runakunata aypurqan juk tantata, pedäzu aytsata y päsaslan atipay juk biscöchuta. Tsayta mikukurkurnami runakuna wayinpa kutikärirqan.
20 Tsaynölami Davidpis wayinman kutikurqan aylunkunata bendicionta qonanpaq.* Wayinman yaykuraykaptinmi Saúlpa tsurin Mical yarqarkamur kayno nirqan: “Israel nacionpa mandaqnin rey kaykarqa ashmay warmikunapa nawpancho shumaqmi qatswaraykar shamushqanki, ¿aw? ¡Mana tantiyakuq runanömi pasaypa penqakuypaq sikiki rikakashqanyaq qarikaypa qarikar qatswashqanki!”
21 Tsawraqa David kayno nirqan: “Noqaqa TAYTA DIOSPA nawpanchömi qatswashqä. Paymi Israelcho rey kanäpaq taytaykipa trukan akramashqa. Israel runakunapa mandaqnin rey karmi TAYTA DIOSPA nawpancho imaypis tsayno qatswashaq. 22 Tayta Diosta adorar qatswashqäpita jamurpämaptikipis masraqmi payta adorashaq. Imata yarpaptikipis tsay ashmay warmikunaqa respitamanqami”.
23 Davidta tsayno jamurpashqanpitami Mical qoluq rikakurqan.