Salmos

81 (2) ¡Tayta Diosta kushishqa alabashun!

Paymi ima desgraciapitapis tsapämantsi.

Jacob yärakushqan Tayta Diosta kushishqa alabashun.

 2 (3) Panderëtakunata tukapalanpa cantashun.

Arpatapis y *salteriutapis waqay waqaytaraq tukapalanpa alabashun.

 3 (4) Lulu killachöpis y llena killachöpis *cornëtata tukapäkushun.

Tsay junaqkuna jatun fiestata rurapäkushun.*

 4 (5) Israel runakuna alabanantsipaqmi Jacob yärakushqan Tayta Dios nimarqantsi.

 5 (6) Egiptupita jorqarkamurmi alabapäkunanpaq Josépita miraq unay ayluntsikunata Tayta Dios nirqan.

Imaypis mana mayashqä voztami* kayno nimuqta mayarqä:

 6 (7) “Pasaypa nakaykätsishuptikimi qamkunata jorqamurqä.

Roqu bürruntano aruykätsishuptikimi qamkunata jorqamurqä.

 7 (8) Fiyupa lakikur manakamaptikimi salvarqä.

Bunruruykaq pukutay rurinpitami contestamurqä.

Meriba yaku nawpanchömi qamkunata probarqä.* Selah

 8 (9) “Kuyashqä runakuna, anyapashqäta shumaq wiyakäriy.

Israel runakuna, ima aliraq kanman cäsukamaptiki.

 9 (10) Ima ïdulutapis ama tsararaytsu.

Juk nacionkuna adorashqan dioskunata ama adorapäkuytsu.*

10 (11) Noqami Egiptupita jorqamuq TAYTA DIOSNIKI kaykä.*

Manakamashqaykitaqa imatapis putsuy putsuymi kamaripäshaykipaq.

11 (12) “Tsayno promitiykaptïpis qamkunaqa manami cäsukamashqankitsu.

Israel runakuna kaykarpis manami wiyakamashqankitsu.

12 (13) Tsayno kashqaykipitami shonquyki munashqanno kawakärinaykipaq qamkunata kacharishqä.

13 (14) Kuyashqä runakuna, ¡ima aliraq kanman wiyakamaptiki!

Israel runakuna, ¡ima aliraq kanman cäsukamaptiki!

14 (15) Cäsukamaptikiqa elaqpitami contraykikunata ushakätsïman.

Chikishuqnikikunata maynami castigäman karqan”.

15 (16) TAYTA DIOSQA lapan chikiqninkunatami vincinqa.

Paykunataqa imayyaqpis castiganqami.

16 (17) Kuyashqan runakunatami itsanqa alinnin trïguta kamaripanqa.

Abëjapa mishkintapis ajayashqanyaq mikunanpaqmi kamaripanqa.