Salmos
Yapay yanapananpaq Tayta Diosta manakushqan
(1) Cantaqkunapa mandaqninpaqmi. Liriu waytakuna nishqan tönuwan kay testimoniu salmuta cantapäkunki. Asaf qelqashqan salmu.
80 (2) Israel runakunapa mitsiqnin Tayta Dios, mayaykalämay.
Qamqa uysha mitsiqnömi Josépita miraqkunata ali rikaykanki.
*Querubinkuna chawpincho jamaraykashqaykipita mayaykalämay.*
2 (3) Efraín, Manasés y Benjamín trïbu runakunata yanapaykulay.
Shamur munaynikiwan salvaykalämay.
3 (4) Tayta Dios, nawpata yanapamashqaykinöla kananpis noqakunata yanapaykalämay.
Mana rabyakuylapa salvaykalämay.
4 (5) Munayniyuq TAYTA DIOS, kuyashqayki runakuna ruwakuykäshuptikiqa ¡imayyaqraq rabyashqala kaykanki!
5 (6) Lakikuylawanmi noqakunapa shonqüpis mana mikanannatsu.
Fiyupa waqarmi weqiläkunatana ultarküpis.
6 (7) Vecïnü nación runakuna kushipämänanpaqmi kachapäkamashqanki.
Chikimaqnïkunapis asiparkaykämanmi.
7 (8) Munayniyuq Tayta Dios, nawpata yanapamashqaykinöla kananpis noqakunata yanapaykalämay.
Mana rabyakuylapa noqakunata salvaykalämay.
8 (9) Egiptupitami üva plantata* apamurqayki.
Juk nación runakunata qarqurirmi plantarqayki.
9 (10) Chakrata shumaq kamarirkur plantaptikimi sapitsarqan.
Ali winarmi kay nacionman juntarqan.
10 (11) Copösuyarmi jirkakunatapis lantuyninwan tsaparqan.
Rämankunawanmi jatusaq cedru yörakunatapis tsaparqan.
11 (12) Rämankunaqa lamaryaqmi chayarqan.
Tsintsimushqanpis Éufrates mayuyaqmi chayarqan.
12 (13) Kananqa ¿imanirtaq qenchankunata talamarishqanki?*
Nänipa pasaq jäpa runakunapis wayuynintami palakurkun.
13 (14) Sima kuchikunami* jarur ushaykan.
14 (15) Munayniyuq Tayta Dios, kutiykalämuy.
Jana patsapita yanapaykalämay.
Shamur plantashqayki üvata shumaq rikaykulay.
15 (16) Kikikimi tsay üvata plantarqayki.
Tsintsimuqkuna shumaq winananpaq kikikimi uryarqayki.
16 (17) Tsay üva plantaykitami chipyaq rupatsir ushapäkushqa.
Tsayno rurashqanpita castigaykulay.
17 (18) Rey kananpaq churashqayki runata itsanqa yanapaykulay.
18 (19) Noqakunaqa qammanmi imaypis yärakamushaq.
Salvamaptikimi jutikita joqarir alabapäkushayki.
19 (20) Munayniyuq TAYTA DIOS, nawpata yanapamashqaykinöla kananpis yanapaykalämay.
Mana rabyakuylapa salvaykalämay.