Génesis
Egiptuman Jacob aywashqan
46 Lapan imaykantapis apakurkurmi Israelqa* Egiptuman aywakurqan. Beersebaman chayaykurmi papänin Isaac yärakushqan Tayta Diosta adorashpan uywata pishtarkur *altarcho rupatsirqan. 2 Tsay tsakaymi Israelta Tayta Dios revelar kayno nirqan: “¡Jacob, Jacob!”
Tsaymi Jacobqa kayno nirqan: “¿Imata, Tayta?”
3 Tsawraqa Tayta Dios kayno nirqan: “Noqaqa papäniki yärakushqan Diosmi kaykä. Ama mantsakuytsu Egiptuman aywayta. Tsaychömi qampita miraqkunaman bendicionnïta churashaq atskaman mirar juk nación rikakunanpaq. 4 Egiptuman aywaptikipis qamtaqa yanapashaykimi. Wanuptikipis tsuriki Joséqa nawpaykichömi kaykanqa. Tsaypitapis qampita miraqkunata Egiptupita kikïmi jorqamushaq”.
5 Tsayno niptin Beersebapita Egiptuman aywakurmi Faraón apatsishqan carrëtakunaman tsurinkuna witsätsirqan papänin Jacobta, pishi wamrankunata y warminkunatapis. 6 *Canaáncho ashmashqan kaqtaqa wäkankunata y uyshankunata qatikurkur y lapan imaykankunatapis apakurkurmi Egiptuman aywakärirqan.* 7 Tsaynöpami lapan tsurinkunawan y wilkankunawan Egiptuman Jacob chayarqan.
8 Egiptuman aywaq Israel runakunaqa kaynömi karqan:
Jacobpa qechpa tsurin Rubén;
9 Rubénpa tsurinkuna Hanoc, Falú, Hezrón y Carmi;
10 Simeónpa tsurinkuna Jemuel, Jamín, Ohad, Jaquín, Zohar y Saúl (Saúlqa karqan cananea warmipa wawanmi);
11 Levípa tsurinkuna Gersón, Coat y Merari;
12 Judápa tsurinkuna Er, Onán, Sela, Fares y Zara (Erwan Onánqa Canaánlachönami wanurqan);
Farespa tsurinkuna Hezrón y Hamul;
13 Isacarpa tsurinkuna Tola, Fúa, Job y Simrón;
14 Zabulónpa tsurinkuna Sered, Elón y Jahleel.
15 Paykunami karqan Jacobpa warmin Leapa wawankuna y wilkankuna. Leapa olqu wawankunaqa lapanpis Padan-aramchömi yurirqan. Tsaynölami wawan Dinapis tsaycho yurirqan. Leapa wawankuna y wilkankuna karqan kimsa chunka kimsa (33) warmipis y olqupis.
16 Tsaynöpis Egiptuman aywarqan Gadpa tsurinkuna Zifión, Hagui, Ezbón, Suni, Eri, Arodi y Areli;
17 Aserpa tsurinkuna Imna, Isúa, Isúi y Bería (paykunapa paninmi karqan Sera);
Beríapa tsurinkuna Heber y Malquiel.
18 Paykunami karqan Zilpapa wawankuna y wilkankuna. Zilpaqa karqan Leapa ashmayninpaq taytan Labán qoykushqanmi. Zilpapa wawankuna y wilkankuna karqan chunka soqta warmipis y olqupis.
19 Tsaynöpis Egiptuman aywarqan Jacobpa warmin Raquelpa wawan José y Benjamín.
20 Josépami warmin Asenatcho tsurinkuna karqan Manasés y Efraín.* Paykunaqa yurirqan Egiptuchömi. Asenatqa karqan On markacho taq cüra Potiferapa tsurinmi.
21 Benjamínpa tsurinkunami karqan Bela, Bequer, Asbel, Gera, Naamán, Ehi, Ros, Mupim, Hupim y Ard.
22 Paykunami karqan Jacobpa warmin Raquelpa wawankuna y wilkankuna. Paykunaqa karqan chunka chuskumi.
23 Tsaynöpis Egiptuman aywarqan Danpa tsurin Husim;
24 Neftalípa tsurinkuna Jahzeel, Guni, Jezer y Silem.
25 Paykunami karqan Bilhapa wawankuna y wilkankuna. Bilhaqa karqan Raquelpa ashmayninpaq taytan Labán qoykushqanmi. Tsay warmipa wawankuna y wilkankuna karqan qanchismi.
26 Egiptuman Jacob chayarqan tsurinkunawan wilkankunawan soqta chunka soqtami (66). Tsayqa karqan tsurinpa warminkunata mana yupaylapami. 27 Josépa tsurin Egiptucho ishkaymi yurirqan. Paykunatawan yupaptinmi Egiptucho Israel runakuna karqan qanchis chunkana (70).*
Gosénman Jacob chayashqan
28 Gosénman chayaykarmi tsurin Judáta Jacob kacharqan Joséta kayno wilananpaq: “Papänintsiwan tinkuqshi aywanki”.
Tsaypitanami Gosénman Jacob chayarqan. 29 Josénami cawalluwan qarachana carrëtanta alistarkatsir papäninwan tinkuq aywarqan. Papäninwan tinkuykurmi makalanakurkur waqapänakurqan. 30 Tsawraqa Joséta Israel kayno nirqan: “Qamwan tinkushqächönaqa jina wanukushaqnapis”.
31 Tsaypita wawqinkunata y wakin aylunkunata José kayno nirqan: “Aywä Faraón kaqman chayamushqaykita wilanäpaq. Paytami kayno nishaq: ‘*Canaánpitami chayamushqa papänï, wawqïkuna y wakin aylükunapis. Paykunaqa shakärimushqa noqawan nawpa nawpala tänanpaqmi. 32 Tsaymi uyshankunata, cabrankunata y wäkankunata qatishqa chayapäkamushqa. Tsaynölami lapan imankunatapis apakärimushqa. Paykunaqa uywa ashmakuylatami yachapäkun’. 33 Faraónta tsayno wilaptïmi qamkunata qayaykur imacho arupäkushqaykitapis tapushuptikiqa 34 kayno nipäkunki: ‘Noqakunaqa unay aylükunanöpis wamra kashqäpita patsa uywa ashmaylatami yachapäkü’. Tsayno wilaptikimi uysha mitsiq runakunata Egipto runakuna melanaptin Gosén particho tänaykipaq nishunki”.