Job
Job mana yachaq kashqanta Tayta Dios tantiyatsishqan
38 Tsawraqa huracán wayra rurinpita Jobta TAYTA DIOS kayno nimurqan:
2 “¿Pitaq kanki lutanta ruraq kashqäta nimänaykipaq?
¿Pitaq kanki mana tantiyakuypa rimanaykipaq?*
3 Rasunpa yachaq karqa tapuptï contestamänaykipaq shumaq kamarikuy.*
4 ¿Maychötaq karqayki kay patsata kamashqä höra?
Rasunpa yachaq kashpaykiqa ¡mä nimay!
5 Qam ¿musyankiku kay patsa ima tamäñu kananpaq pï nishqantapis?
¿Musyankiku kay patsata cordilwan pï tupushqantapis?
6 ¿Ima jananchötaq kay patsa jamaraykan?
¿Pitaq kay patsa jamaränanpaq ali rumita cimientunman churashqa?
7 Tsay hörami waraq qoylarkuna lapanpis cantapäkurqan.
Tsaynölami *angilnïkunapis pasaypa kushikärirqan.
8 “Patsapita lamar yaku pashtamushqan höra ¿pitaq kuchunta churapashqa tsaypita mana yarqamunanpaq?
9 Lamarpa röpanno kananpaq noqami pukutayta churapashqä.
Tsaynöpis tsaparänanpaq tsakaytami churapashqä.
10 Lamar mayyaqla chayananpaqpis noqami señalta churapashqä.
Tsaypita mana yarqamunanpaqmi punkunta llävirkushqä.
11 Nirkurmi kayno nishqä: ‘Kayyaqlami chayamunki.
Mayjina altuta pulchaqyarpis kaypita ama pasankitsu’.*
12 “¿Imaylaqa patsa waränanpaq qam mandashqankiku?
13 Patsata warätsiptïmi suwakuna y wanutsikuqkuna mantsakur pakakärin.
14 Jirkakuna imano kashqanpis rikakanmi.
Röpapanömi colorninkunapis rikakan.
15 Patsa waraptinqa manami suwakunapis suwakunnatsu.
16 “¿Lamar rurinman qam yaykushqankiku?
¿Rikashqankiku lamar yaku maypita pashtamushqantapis?
17 ¿Reqinkiku wanushkunapa alman kaykashqan yaykuna punkuta?
18 ¿Musyankiku kay patsa ima tamäñu kashqantapis?
Rasunpa musyarqa mä wilamay.
19 “¿Maypataq näni aywaraykan atsikyaypa wayinman?
¿Maychötaq tsakaypa wayin kaykan?
20 Atsikyayta y tsakayta kay patsapa kuchunyaq ¿apayta kamäpakunkimantsuraq?
Tsaykunata wayinman yapay ¿kutitsinkimantsuraq?*
21 Tsakaypis y atsikyaqpis manaraq kaptin yurishqa karchari tsaykunata musyanki, ¿aw?
22 “¿Qam chayashqankiku raju churaräkunan kaqman?
¿Runtu tamya churarashqanman chayashqankiku?
23 Tsaykunataqa churaraykätsï guërra kaptin conträkunata atacanäpaqmi.*
24 “¿Maypitataq atsikyay yarqamun?
¿Imanötaq inti jeqamunanpita wayra intëru patsaman mashtakan?
25 “¿Pitaq löcu tamya chayamunanpaq jana patsapita kay patsayaq sekyata rurapan?
¿Pitaq räyukuna y elquykuna shamunanpaq nänita rurapan?
26 ¿Pitaq jäkuq jirkakunaman tamyatsimun?
27 ¿Pitaq patsata ushmatsin qewakuna winananpaq?
28 “¿Pitaq tamyapa taytan?
¿Pipa tsurintaq shulya kaykan?
29 ¿Pitaq tsururupa maman?
¿Pitaq qasapata wachashqa?
30 ¿Pitaq rumino kananpaq lamar yakuta tintitsin?
31 “Qamqa Pléyades qoylarkunata ¿watayta kamäpakunkimanku?
Orión qoylarkunatapis wataraykaqta ¿paskankimantsuraq?*
32 Qoylarkunata hörancho ¿yarqatsimunkimantsuraq?
¿Qamku pusharanki Llama qoylarkunata y Tsakwa qoylarkunata?
33 “¿Musyankiku jana patsapa leyninkuna imano kashqantapis?
¿Nishqaykinöku kay patsacho lapanpis rurakan?
34 Tamyamunanpaq pukutaykunata ¿ordenayta yachankiku?
35 Räyu mayninman chayananpaq mandaptiki ¿cäsushunkiku?
36 “Gälluta y pishqukunata ¿pitaq yachayta qoshqa?
37 ¿Pitaq shumaq tantiyakuq kaykan pukutayta yupananpaq?
¿Pitaq tamyata tamyatsimun?
38 Tamyamuptinmi kurpakunapis latun.
39 “Leonkuna mikunanpaqpis ¿qamku uywakunata apapanki?
León malwakuna yarqanaptinpis ¿qamku mikuyta qaranki?
40 Pakakunancho punuraykaptin o shatakunacho uywata tsarinanpaq ¿qamku mikuyta kamaripanki?
41 Cuervukuna* mikuyta ashir wakpa kaypa puriptin ¿qamku mikuyta kamaripanki?
Pushapankuna mikanar manakamaptin ¿qamku mikuyta ashtapanki?