Isaías

59 Ama yarpapäkuytsu salvashunaykipaq TAYTA DIOS munayniynaq kashqanta.

Payqa manami upatsu kaykan manakärishqaykita mana mayashunaykipaq.

 2 Tsaypa trukanqa jutsaykikunami jatun perqano paypita rakiykäshunki.

Tsaymi jutsata rurapäkushqaykipita Tayta Diosnintsi mana rikärishunkinatsu.

Manakuptikipis manami mayashunkitsu.

 3 Wanutsikuq kapäkuptikimi makikikunapis yawarlana kaykan.

Dëduykikunapis runa wanutsiqmi kaykan.

Shimikikunapis pasaypa lulakuylatami riman.

Qalluykikunapis mana alikunalatami riman.

4 Manami pipis alita rurananpaq yarpachakuntsu.

Demandakurpis manami rasun kaqtaqa rimapäkuntsu.

Autoridäkunapis lulakuq kaqtami criyipäkun.

Manami pipis rasun kaqtaqa rimantsu.

Jutsa rurayman churakashqami karkaykan.

 5 Likanta pachka awaqno y culebrapa runtunta oqlaqnömi karkaykan.

Tsay runtukunata mikuq kaqqa wanunqami.

Runtuta pakiptinqa culebrakunami yarqamunqa.*

 6 Röpata rurananpaq pachkapa likan mana ali kashqannömi tsay runakuna lapan rurashqanpis mana ali kaykan.

Mana ali ruraykunalapaqmi paykunaqa mishkipäkun.

 7 Tsaymi mana alita rurananpaq jukla cörripäkun.

Jutsaynaq runata wanutsinanpaq warakaylami aywapäkun.

Mana alita ruranalanpaqmi yarpachakurkaykan.

Maypa aywarpis lutankunalatami rurapäkun.*

 8 Ali kaway imano kashqantapis manami musyapäkuntsu.

Manami imatapis alitaqa rurapäkuntsu.

Paykuna kawashqanno kawarqa manami pipis ali kawayta tarinqatsu.*

9 Tsaymi salvakuyta munarpis mana kamäpakuntsitsu.

Runa mayintsiwan ali kawaytapis mana puëdintsitsu.

Atsikyaqta shuyaraptintsipis tsakaylami kaykan.

Atskichöno kawayta munarpis tsakaychönömi kawaykantsi.

10 Qaprakuna perqata yataylapa puriqnömi karkaykantsi.

Rikayta mana puëdiq runa lamkaylapa puriqnömi kaykantsi.

Pulan junaqpis tsakaypa takakaykaqnömi kaykantsi.

Kawaykarpis wanushqanömi kawaykantsi.

11 Pasaypa lakikur ösunömi waqaykantsi.

Paluma waqaqnömi lakishqa ataykantsi.

Ali kawayta shuyarpaptintsipis manami chayamuntsu.

Salvakuyta munarpis manami salvakuntsitsu.

12 Imaypis jutsata rurarmi Tayta Diosta rabyanätsintsi.

Lapan rurashqantsikunapis jutsayuq kashqantsitami wilakuykan.

Jutsa rurayta kachariyta mana kamäpakurmi musyantsi jutsayuq kashqantsita.

13 TAYTA DIOSNINTSITA mana cäsukurmi nishqankunata mana rurantsitsu.

Lutanta ruranantsipaq y runa mayintsita engañanantsipaqmi wilanakuykantsi.

14 Juezkunapis ali runapa contranmi sharkapäkun.

Alita rurananpaq manami pipis yarpannatsu.

Rasuntanöraq rimarmi pïmaytapis criyitsipäkun.

Pïmaypis suwapänakurmi kawarkaykan.

15 Lapanpis lulakunmi.

Ali runakunataqa carcilmanmi wichqapäkun.

Tsayta rikarmi TAYTA DIOS pasaypa rabyakun.

16 Mana alikunata rurapäkuptin pipis mana michaqta rikarmi Tayta Dios fiyupa rabyakun.

Tsaymi nakaqkunapa favornin kikin Tayta Dios sharkushqa.*

17 Pelyacho tsapakuna chalëcutami jatikushqa.

Tsay chalëcuqa ali rurayninkunami kaykan.

Tsaynöpis umanman jatikushqan cascuqa salvacionmi kaykan.*

Runa mayinta nakatsiqkunata castigananpaq pasaypa rabyashqami yarqushqa.

18 Lutanta rurashqanman tupumi castiganqa.

Pasaypa rabyar contrankunata merecishqanman tupumi castiganqa.

Lamar kuchun markakunacho taqkunatapis castiganqa.

19 Cargashqa mayu bötiypa bötir shamuqnöraqmi Tayta Dios shamunqa castigananpaq.

Tsaymi inti jeqamunan lädupita inti jeqanan läduyaq TAYTA DIOSTA *mantsakärinqa.

20 TAYTA DIOSMI kayno nin:

“Juk salvakuqmi *Siónman shamunqa.

Jacobpita miraqkuna jutsa rurayta kachariptinqa lapantami salvanqa”.*

21 TAYTA DIOSMI kayno nin:

“Paykunawan *pactuta rurarmi kayno nishaq:

‘Espïritümi qamkunawan imaypis kaykanqa.

Kay pactutami imaypis qamkuna yarparanki.

Manami imaypis qonqankipaqtsu.

Tsurikikunapis wilkaykikunapis manami qonqanqatsu’ ”.