Apocalipsis
Tayta Diospa ishkay wilakuqninkuna
11 Tsaychömi shoqushpita rurashqa värata *ángel aptaparkamar kayno nimarqan: “Jerusalénpa ayway Tayta Diospa templunta y *altarta tupumunaykipaq.* Nirkur yupamunki tsaycho adoraq runakunata. 2 Templu waqtancho kaykaq patiuta itsanqa ama tupumunkitsu. Tsay patiuta kachariykushqä mana cäsukamaq runakuna munaynincho tsararänanpaqmi. Paykunami chusku chunka ishkay (42) killa* *sagrädu Jerusalén markata munaynincho tsararanqa.* 3 Tsay witsanmi ishkay wilakuqnïkunata noqa nishaq juk waranqa ishkay pachak soqta chunka (1,260) junaq* wilakuynïta wilakunanpaq. Paykunaqa qachqa röpan jatishqami wilakärinqa”.*
4 Tsay ishkay wilakuqkunaqa kay patsata kamaq Tayta Diospa nawpancho kaykaq ishkay olïvukuna y ishkay candelabrukunami kaykan.* 5 Pipis paykunata wanutsiyta munaptinqa shiminpita nina yarqamurmi rupar ushanqa. Tsaynömi wanunqa paykunapa contran sharkuqkunaqa. 6 Tsay ishkay wilakuqkunaqa munayniyuqmi kanqa tamyatapis mana tamyatsimunanpaq,* yakutapis yawarman tikratsinanpaq* y munashqan höra pesti qeshyawan runakunata ushakätsinanpaqpis.
7 Tayta Dios munashqanno wilakuyninta wilakur usharkuptinnami wanwanyaykaqpita *anticristo yarqamur* paykunapa contran sharkur wanutsinqa.* 8 Wanutsiptinmi ayankuna jatun markapa pläzancho jitaranqa. Tsay markachömi Señor Jesucristutapis wanutsipäkurqan. Tsay markatami Sodomano* y Egiptuno kashqanta nipäkun. 9 Kimsa junaq pulanyaqmi maytsay marka runakunapis, maytsay trïbu runakunapis, ima idiömata rimaq runakunapis y maytsay nación runakunapis wanushqa jitarpaykaqta rikapäkunqa. Ayankunatapis pampananta manami kachapanqatsu. 10 Tsay wilakuqkuna aläpa rabyanätsishqa kaptinmi runakuna kushikushpan regäluta jukninpis jukninpis aypunakunqa.
11 Wanushqa jitarpaykashqanpita kimsa junaq pulantami tsay ishkay wilakuqninkunata Tayta Dios kawaritsimunqa. Tsayta rikaqkuna lapanmi pasaypa mantsakanqa. 12 Kawarirkamurnami kayno nir jana patsapita qayakamuqta mayanqa: “¡Kayman shapäkamuy!” Chikiq runakuna rikarpaykaptinmi pukutay rurinpa jana patsaman aywakärinqa.* 13 Tsay höra patsa fiyupa siksikyaptinmi* tsay markacho cada chunka wayipita juk wayi juchunqa y qanchis waranqa (7,000) runakuna wanupäkunqa. Kawaykar quëdaqkunaqa pasaypa mantsakashqami Tayta Diosta alabapäkunqa.
14 Ishkay kaq nakay pasaptinpis juk masraqmi chayamunanpaq kaykan.
Qanchis kaq ángel cornëtata tukamushqan
15 Qanchis kaq *ángel *cornëtata tukamuptinmi jana patsacho *angilkuna qayakur kayno nimushqan mayakämurqan:
“¡Lapan nacionkunapis Señornintsi Tayta Diospa y Cristupa makinchönami karkaykan!
¡Paymi imayyaqpis rey kanqa!”*
16 Tsaymi Diospa nawpancho kaykaq ishkay chunka chusku (24) mayor runakuna trönunkunacho jamaraykashqanpita lätakuykur Tayta Diosta adorashpan 17 kayno nipäkurqan:
“Lapanpaq munayniyuq Tayta Dios, qamtami agradëcikärï.
Unaypitami kaykanki, kananpis kaykankimi [y shamunaykipaqnami kaykanki].
Lapantami munaynikicho tsararaykanki.
Kananqa qamnami mandayta qalaykushqanki.
18 Qamta cäsukuyta mana munarmi maytsaychöpis runakuna pasaypa rabyakärirqan.
Kananqa kikikimi rabyakur wanushkunata juzgankipaq.*
Tiempu chayamushqanami sirvishuqniki profëtakunata y qamman yärakur *mantsakushuqnikikunata rïcu kaptinpis waktsa kaptinpis premiuta qonaykipaq.*
Runa mayinta wanutsiqkunataqa ushakätsinkipaqmi”.
19 Tsaymi jana patsacho kaykaq templu kichakaptin rikarqä tsaycho kaykaq *Pactu Babulta. Elquypis, räyupis y runtu tamyapis fiyupami karqan. Kay patsapis fiyupami siksikyarqan.*