2 Samuel
Davidpa contran Seba sharkushqan
20 Tsaychömi kaykarqan Bicripa tsurin Seba. Sebaqa Benjamín trïbu fiyu runami karqan. Paymi *cornëtata tukashpan Davidpa contran sharkur kayno nirqan:
“¡Israel runakuna, wayintsikunapa kutikushun!
¡Davidqa manami mandamaqnintsi rey kanmantsu!
¡Isaípa tsurin Davidpitaqa manami imatapis chaskishuntsu!”*
2 Tsayno niptinmi Israel runakuna Davidta kachariykur Bicripa tsurin Sebapa qepanpa aywakärirqan. Judá runakunami itsanqa rey Davidwan Jordán mayupita Jerusalénman aywapäkurqan.
3 Jerusalénman David kutiykurmi palaciuta täpananpaq kachashqan chunka *concubïna warminkunata* juk wayiman churaykurqan. Munashqankunata kamariparpis manami paykunawan David punurqannatsu. Tsaymi tsay warmikunaqa viüdano täkurqan wanunanyaq.
4 Nirkurnami Amasata rey David kayno nirqan: “Kananpita kimsa junaqta Judá soldädukunata shuntarkur paykunawan kayman kutimunki”.
5 Tsawraqa Amasa aywarqan soldädukunata shuntamunanpaq. Tsayno kaptinpis kimsa junaqlacho shuntamuyta mana kamäpakurmi jukla mana kutimurqantsu. 6 Amasa mana kutimuptinmi Abisaita David kayno nirqan: “Absalónpita masmi problëmaman Seba churamäshun. Kaycho kaykaq soldädükunata jukla pushakurkur qatipay wanutsinaykipaq. Manaraq taripaptiki paqta ali murallashqa markaman chayaykur pakakunman”.
7 Tsayno niptinmi cereteo soldädukunata, peleteo soldädukunata, tsaycho kaykaq alinnin kaq soldädukunata y Joabpa soldädunkunata pushakurkur Joabwan Abisai Jerusalénpita aywapäkurqan Bicripa tsurin Sebata qatipashpan. 8 Gabaóncho jatun rumi kaykashqanman chayaykaptinnami Amasa yarqamurqan paykunawan tinkunanpaq. Joabqa pelyananpaq kaq röpan jatishqa y tseqlanman cuchillun jatishqami purirqan. Amasaman tinkuq aywarmi tsay cuchilluta pakaylapa jorqurirqan. 9 Nirkurmi Joab kayno nirqan: “¿Alilaku kaykanki, wawqi?”
Tsayno nishpanmi alawqa kaq makinwan shaprapita tsarirqan qaqlancho mutsananpaqno. 10 Jukaq makincho cuchillun aptaraykashqanta Amasa mana tantiyaptinmi Joabqa tuksiriykurqan ashashninpis pampaman qotukaqpaq. Jinan höra wanuptinmi yapay mana tuksirqannatsu. Nirkurnami Joab y wawqin Abisai Bicripa tsurin Sebata wanutsinanpaq qepanta aywapäkurqan.
11 Aya jitaraykaqpa nawpanman ichiykurmi Joabpa juk soldädun kayno nirqan: “¡Joabta y Davidta yanapayta munaqkunaqa Joabwan aywapäkushun!”
12 Tsayno niptinpis nänicho pasaypa yawarlana Amasa wanushqa jitaraptinmi tsaypa pasaq soldädukuna ichiykur rikapaykarqan. Tsaymi tsay soldäduqa nänipita juk läduman tsutaykur cäpawan tsapaykurqan. 13 Juk läduman witirkatsiptinmi Joabwan aywaq soldädukuna Bicripa tsurin Sebata qatipäkurqan.
14 Tsayyaqmi lapan trïbu Israel runakuna tashqankunapa pasar Seba chayarqan Abel-bet-maaca markayaq. Tsaychömi Bicripita miraq aylunkunawan talukarkur yaykapäkurqan tsay markaman. 15 Tsaypitana soldädunkunawan Joab chayapäkurqan Abel-bet-maacaman. Marka punkun shumaq wichqaraptinmi yaykuyta mana kamäpakushpan marka murälla waqtanman rumikunata y alpata qoturqan. Tsaypa witsarkurnami lapan soldädukuna murällata juchutsiyta qalaykurqan. 16 Tsayno rurapäkushqanta rikaykurmi juk astüta warmi qayakurqan kayno nir: “¡Taytakuna! ¡Tayta Joabta niykulay kayman shamunanpaq! Paywanmi parlayta munaykä”.
17 Tsawraqa Joab chayaykuptinmi warmi kayno tapurqan: “¿Qamku kaykanki Joab?”
Tsawraqa Joab nirqan: “Aw, noqami kaykä”.
Tsayno niptin warmi nirqan: “Nishqäkunata shumaq mayaykalämay, tayta”.
Tsawraqa Joab nirqan: “¿Imataq kaykan nimänaykipaq?”
18 Niptin warmi nirqan: “Unay runakuna kaynömi nipäkuq: ‘Yätsikuqta tariyta munarqa Abel markapa* aywatsun’. Tsay nishqannölami kay markachöqa ali yätsikuqta pipis tarin. 19 Tsaynölami kay markacho pïmaywanpis ali kawapäkü. Rey nishqantami imaypis rurapäkü. Kay markano ali markaqa juk ishkaylami Israel nacioncho kaykan. TAYTA DIOSPA herencian kay marka kaykaptinqa ¿imanirtaq juchurkaykätsinki?”
20 Tsayno niptin Joab kayno nirqan: “¡Tsaytaqa ama yarpaytsu! Manami kay markata ushakätsinäpaqtsu shapäkamushqä. 21 Tsaypa trukanqa shapäkamushqä Efraín jalqakunacho taq Bicripa tsurin Sebata wanutsinäpaqmi. Payqa rey Davidpa contran sharkushqanpitami kayman amparakamushqa. Tsay runata wanurkatsirmi kay markapita aywakärishaq”.
Tsayno niptinmi warmi kayno nirqan: “Tsayno kaptinqa Sebapa umanta marka murälla jananpa jitapämushayki”.
22 Tsayno nirmi tsay warmiqa Sebata wanutsipäkunanpaq marka mayin runakunawan parlakurqan. Nirkurmi Sebapa umanta roquriykur jitamurqan marka murälla jananpa. Jitamuptinnami cornëtata Joab tukatsirqan soldädunkuna markata manana atacananpaq. Tsawraqa lapan soldädukuna wayinpana kutikärirqan. Joabnami Jerusalénman kutikurqan rey David kaqman.
Davidpa yanapaqninkuna pï pï kashqanpis
2 Samuel 8.15-18; 1 Crónicas 18.14-17
23 Joabmi karqan Israel nacioncho lapan soldädukunapa capitannin. Joiadapa tsurin Benaíanami karqan cereteo soldädukunapa y peleteo soldädukunapa capitannin. 24 Adorammi karqan rey Davidpa aruqninkunapa capataznin. Ahiludpa tsurin Josafatmi karqan Israelcho ima pasashqankunatapis qelqaq. 25 Sevanami karqan Davidpa secretariun. Sadocwan Abiatarmi karqan cürakuna. 26 Jairpita miraq Irapis Davidpa cüranmi karqan.