Isaías
Israel runakuna mana cäsukuq kashqan
48 Jacobpita miraq Israel runakuna, nishqäta mayapäkamay.
Qamkunaqa TAYTA DIOSPA jutinchömi imatapis promitipäkunki.
Tsaynöpis nipäkunki kuyashuqniki Diosta sirvishqaykita.
Tsayno nirpis janan shonqulami paypa jutinta joqarirkaykanki.
2 Qamkunaqa *sagrädu Jerusaléncho tashqaykipitami kushikurkaykanki.
Tsaynöpis nirkaykanki kuyashuqniki Tayta Diosman yärakärishqaykitami.
Paypa jutinqa lapanta mandaq *Yahwehmi kaykan.
3 Tayta Diosmi kayno nin:
“Imapis manaraq pasaptinmi wilakatsirqä pasananpaq kaqkunata.
Wilakatsishqänölami lapanpis elaqpita pasashqa.
4 Musyämi chukru shonqu kashqaykita, kunkaykipis fiërruno chukru kashqanta y urkuykipis broncino chukru kashqanta.
5 Tsayno kaptikimi pasananpaq kaqkunata unayna wilakatsirqä.
Wilakatsishqäno pasaptinmi tantiyapäkunki takaypa y fundiypa ruratsishqayki ïdulukunaqa ima pasananpaq kaqtapis mana musyashqanta.
6 Wilakatsishqäno kashqanta mayaykar y rikaykarqa ¿imanirtaq mana tantiyapäkunkitsu rasun kaqta niykashqäta?
“Kanan mastapis wilashayki.
Tsayqa mana musyashqayki kaqkunami kaykan.
7 Tsaytaqa imaypis manami yarpapäkushqankitsu ni mayapäkushqankitsu.
Mayna musyashqaykitapis manami nipäkunkipaqtsu.
8 Tsaytaqa manami imaypis mayapäkushqankiraqtsu.
Kananyaqpis tsaykunata manami musyapäkushqankiraqtsu.
“Qamkunaqa yurishqaykipita patsa mana cäsukuqmi kashqanki.
Puyñu rinri karmi ïdulukunata adorar imaypis mana cäsukamashqankitsu.
9 Tsayno kaptikipis adoramänayki raykumi rabyarpis awantakushqä.
Alabamänayki kashqami pacienciakur qamkunata mana ushakätsishqätsu.
10 “Mana ushakätsirpis qamkunata nakatsishqämi.
Hornucho tsulutsir qellaypa qanranta jorquqnömi jutsaykikunapita maylashqä.
11 Juk dioskunata adoranaykipa trukan noqata adoramänaykipaqmi tsayno perdonashqä.
Noqa manami munätsu juk dioskunata adorar manakaqman churamänaykita”.*
Kuyashqan runakunata salvananpaq Tayta Dios nishqan
12 “Jacobpita miraq runakuna, mayapäkamay.
Qayashqä Israel runakuna, wiyapäkamay.
Noqa japalämi Dios kaykä.
Unaypita patsa imayyaqpis Diosmi kaykä.*
13 Makïwanmi kay patsata kamashqä.
Alawqa kaq maki paltäwanmi jana patsatapis tupushqä.
Jutinpa niptilämi lapanpis yurishqa.
14 “Lapayki juntakashpayki shumaq mayapäkamay.
Persia nacionpa mandaqnin rey Cirutami akrashqä munashqäta rurananpaq.
Paymi yarpashqäno Babilonia nación runakunata ushakätsinqa.
Tsayta manami mayqan ïdulupis musyashqatsu ni wilakushqatsu.
15 “Noqami Ciruta qayaykur kachashqä.
Tsaymi lapanta rurananpaq yanapashaq.
16 Lapayki shapäkamuy tsay nishqäta mayanaykipaq.
Unaypita patsami tsayno kananpaq kaqta wilashqä.
Rikaraykaptïmi lapanpis nishqänöla kanqa”.
TAYTA DIOS tsayno nishqanta wilakunäpaqmi Espïritunta noqaman kachamushqa.
17 Salvashuqniki karmi Israel runakunapa *santu TAYTA DIOSNIN kayno nishunki:
“Noqami TAYTA DIOSNIKI kaykä.
Noqami ali kaqkunata yachatsir munashqäno kawapäkunaykipaq ali nänipa pusharaykä.
18 Mandamientükunata cäsukurqa jawkami kawapäkunkiman karqan.
Ali kawashqaykiqa mayu mana tsakiypa aywaqnömi kanman karqan.
Lamar qatinaylanpa pulchaqyashqan aywaqnömi alilata imaypis rurapäkunkiman karqan.
19 Lamar kuchuncho aquyshanöraqmi qampita miraqkuna yupaytapis mana atipaypaq kanman karqan.*
Manami imaypis qamkunata ushakätsïmantsu karqan.
Nawpäpitapis manami qarqümantsu karqan”.
20 ¡Babiloniapita qeshpir aywakäriy!*
¡Salvakushqaykita maytsaychöpis kushishqa wilakäriy!
Wilakur kayno nipäkuy:
“¡Sirviqnin Jacobpita miraqkunata TAYTA DIOSMI salvashqa!
21 Chunyaq jirkapa pushamuptinpis manami yakunarqantsu.
Mana yakunänanpaqmi qaqapita tsaytsika yakuta pashtatsimurqan”.*
22 Itsanqa TAYTA DIOS kaynömi nin:
“Fiyu runakunaqa manami imaypis jawka kawanqatsu”.*