2 Tesalonicenses
Jesucristo kutimunanpaq kashqan
2 Wawqi panikuna, Señor Jesucristo kutimur shuntamänantsipaq kashqanta shumaq tantiyakärinaykitami munapäkü.* 2 Noqakuna mayapäkushqä qamkuna kaqcho lutan yachatsikuqkuna kayno nir yachatsipäkushushqaykitami: “Jesucristo kutimunanpaq kaq tiempu chayamushqanami”.
Tsay runakunaqa nirkaykan tsayno yachatsipäkunanpaq Espíritu Santu revelashqanta. Tsaynöpis nirkaykan kikï tsayno nishqäta y cartächöpis tsayno yachatsishqäta. Tsayno nipäkushuptikipis ama criyipäkuytsu. 3 Imata nishuptikipis ama chaskipäkuytsu. Jesucristo kutimunanpaqqa puntata atska runakunami Tayta Diospa contran sharkapäkunqa. Tsaynöpis *anticristuraqmi yurimunqa. Paytami Tayta Dios infiernuman qaykunqa.
4 Anticristuqa manami munanqatsu Tayta Diosta ni imatapis runakuna adorapäkunanta, sinöqa kikinta adoranantami munanqa. Tsaynöpis payta adorapäkunanpaqmi Dios tukushpan Tayta Diospa templunman yaykuykur jamakunqa.* 5 ¿Manaku yarpapäkunki tsayno kananpaq kashqanta mayna wilashqäta?
6 Kanan qamkuna musyankimi anticristo manaraq yurimunanpaq ima tsaparaykashqantapis. Tsayno tsaparanqa tiempu cumplishqanyaqmi. 7 Manaraq shamuptinpis *Satanásqa maynami runakunata mana tantiyakayla engañaykan Tayta Diosta mana cäsukärinanpaq. Tsaparaykashqanta Tayta Dios jorquriptinnami anticristo yurimunqa. 8 Paytami Señor Jesucristo chipchipyaykar kutimur juk pükayla ushakätsinqa.
9 Jesucristo manaraq kutimuptinmi Satanáspa munayninwan anticristo tukuy niraq milagrukunata ruranqa.* 10 Tsaynöpami infiernuman qaykushqa kananpaq destinashqa kaqkunata engañanqa. Paykunaqa Jesucristupa wilakuyninta mana chaskikurmi salvakärinqatsu. 11 Mana chaskikärishqanpitami Tayta Dios paykunata pantakätsinqa anticristuta chaskikärinanpaq. 12 Tsaynöpami Tayta Diosta mana cäsukur jutsa ruraqkuna lapanpis infiernucho nakapäkunqa.
Salvashqa kanantsipaq Tayta Dios akramashqantsi
13 Wawqi panikuna, qamkunataqa Tayta Diosmi kuyashushpayki qalaykunanpita akrashushqanki salvashunaykipaq. Kananqa Jesucristupa wilakuyninta chaskikur payman yärakäriptiki y Diospa makincho kawapäkunaykipaq Espíritu Santu yanapashuptikimi salvakärishqanki. Tsaypitami Tayta Diosta imaypis agradëcikurkaykä. 14 Paymi qayashushqanki ali wilakuyninta wilapaptï salvashqa kanaykipaq. Tsaymi Señor Jesucristo chipchipyaykar kutimur pushakushuptiki qamkunapis nawpancho kushishqa kawapäkunkipaq.
15 Wawqi panikuna, tsayno kananpaq kaykaptinqa Tayta Diosman shumaq yärakur ama qonqapäkuytsu cartawanpis y shimipapis yätsishqäkunata.* 16 Kikin Señor Jesucristo y kuyamaqnintsi, imaypis shakyätsimaqnintsi y nawpanman pushamaqnintsi Papänintsi Tayta Dios 17 yanapaykuläshunki mana lakikärinaykipaq, pïmaytapis ali shimilaykipa parlapänaykipaq y ali kaqkunata rurapäkunaykipaq.