Isaías

34 Maytsay nacioncho taqkuna, mayamänaykipaq shapäkamuy.

Maytsay markacho taqkunapis, juntakämuy.

Kay patsa y kay patsacho kaqkunapis, lapayki mayapäkamay.

 2 Lapan nacionkunapitami TAYTA DIOS rabyashqa kaykan.

Nacionkunapa soldädunkunapitapis rabyashqami kaykan.

Paymi lapan nacionkunata chipyaq ushakätsinqa.

 3 Wanushkunapa ayankuna ismur pasaypa asyarmi jitarpanqa.

Raqrakunapapis yakunöraqmi yawar aywanqa.

 4 Ciëlucho kaqkunapis tsulurmi ushakanqa.

Röllu luylukaqnömi ciëlupis luylukanqa.

Qoylarkunapis tsakishqa rapranömi shikwamunqa.

Üva yörapa y hïgus yörapa tsakishqa raprannömi shikwamunqa.*

5 Tayta Diospa espädan jana patsapita shamurmi Edom nación runakunata ushakätsinqa.

Paykunata castigar ushakätsinanpaqmi Tayta Dios destinashqa.

 6 Runakunata ushakätsirmi TAYTA DIOSPA espädan yawarlana y wiralana kanqa.

Bosra markacho runakunata wanutsirmi TAYTA DIOSPAQ sacrificiuta pishtapakuqno kanqa.

TAYTA DIOSPA espädan uyshakunapa y chïvukunapa yawarninwan pasaypa pichushqami kanqa.

Carnikunapa ruru wiranwan nitishqami kanqa.

 7 Tsaychömi töruno kalpasapa runakunapis wanupäkunqa.

Turituno ali chölu mözukunapis chipyaqmi ushakanqa.

Maytsaychöpis yawarmi mashtaranqa.

Alpapis wirawan pichushqa karmi wiswinqa.

8 Tsay witsanmi *Sión runakunapa contrankunata TAYTA DIOS ushakätsinqa.

 9 Ushakätsiptinmi contrankuna tashqan nacioncho raqrakunapa yaku aywananpa trukanqa breana* aywanqa.

Alpapis azufrimanmi tikranqa.

Chakrakunapis breanöraqmi rupanqa.

10 Paqasta junaqta nina rupaptinmi qoshtaypis mana ushakaypa sharkunqa.

Tsayno ushakätsiptinmi imayyaqpis chunyaqlana kanqapaq.

Tsaypaqa manami pipis purinqanatsu.*

11 Tsaychöqa tanqa pelïcanu y erïzulanami.*

Tukukuna y akakluykunalami qeshwankunata tsaycho rurapäkunqa.

Tayta Dios chipyaq asulaptinmi imapis tsay nacioncho kanqanatsu.

12 Manami reypis ni autoridäkunapis mandananpaq kanqanatsu.

13 Palaciukunachöpis shirakawan cardón kashakunalanami muntiyaypa winanqa.

Murallashqa markakunachöpis ishanka y kashakunalanami juntanqa.

*Chacalkuna täkunan y *avestruzpa wawankuna punukunalannami kanqa.

14 Jirka uywakunawan *hienakunami tsaycho tanqa.

Jirka cabrakunalanami tsaycho waqapänakunqa.

Chushiqlanami pipis mana mantsatsiptin tsaycho täkunqa.

15 Tukupis tsaychömi runtunta oqlanqa.

Pashtatsishqan chipshankunatapis tsaychömi oqlaranqa.

Wiskulkunapis tsaychömi mirapäkunqa.

16 Tsayta musyanaykipaq TAYTA DIOS qelqatsishqan rölluta liyipäkuy.

Tsaycho qelqarashqannölami lapanpis chinan orqu kanqa.

Tayta Dios nishqannölami tsay uywakuna tsaycho tanqa.

Tsaycho kananpaqmi Espïritun shuntanqa.

17 Kikinmi tsaycho tänanpaq tsay uywakunata churanqa.

Tsaymi imaypis tsaycho tanqa.