Ezequiel

Samaria y Jerusalén markakuna tsay nanala kashqan

23 TAYTA DIOSMI kayno nimarqan: 2 “Runapa tsurin, juk kutichömi ishkay warmi wamrakuna tsay nanala karqan.* 3 Jipashyarmi paykunaqa Egiptucho jukwan jukwan kakurqan. Chuchunkunatapis lapiparmi perditsipäkurqan. 4 Mayor kaqpami jutin karqan Ahola y shulka kaqpanami jutin karqan Aholiba. Ishkanpis warmïkuna kaptinmi olqupis warmipis tsurïkuna karqan. Aholami Samaria marka y Aholibanami Jerusalén marka kaykan.

5 “Aholaqa warmï kaykarmi vecïnun Asiria runakunata waynäkurqan. 6 Paykuna lapanpis karqan granäti röpan jatishqa y cawallunkuna muntashqami. Tsaynöpis karqan capitán, mandaqkuna y kamaraq mözukunami. 7 Aholaqa ali chölunnin Asiria runakunawan kakushpanmi ïdulunkunata adorar pasaypa jutsata rurashqa.

8 “Egiptucho jipashlaraq kaykar jukwan jukwan kakushqannölami Asiria runakunawanpis kakurqan. Chuchunkunata Egipto runakuna lapipar munashqanta rurashqannölami Asiria runakunawanpis munashqanta rurakurqan. 9 Tsaymi waynäkushqan Asiria runakunapa munayninman kachaykurqä. 10 Tsay runakunami payta qarapacharkur espädawan wanutsirqan. Nirkurmi wawankunata warmita olqutapis apakärirqan. Tsayno ushakashqanpitami maytsaychöpis warmikuna rimapäkun.

11 “Tsayta rikakurmi nanan Aholibapis pasaypa shanaripakur nananpitapis mas peorraq pïmaywanpis kakurqan. 12 Paypis nanannömi Asiria runakunata waynäkurqan.* Tsay runakunaqa lapanpis kuyaylapaq röpashqa y cawallunkuna muntashqami karqan. Tsaynöpis karqan capitankunala, mandaqkunala y kamaraq mözukunalami. 13 Tsaymi Aholibata nanantanöla rikashqä mana penqakuypa jukwan jukwan kakuqta.

14 “Pïmaywanpis kaykashqanchömi Aholibaqa rikashqa Babilonia* runakunapa reträtunta perqakunacho pukawan dibujaraykaqta. 15 Tsay dibujaraq runakunapa tseqlankunapis kashqa wachkuwan watashqa, umankunapis kuyaylapaq tëlawan watashqa y Babiloniapita shamuq capitankuna niraqlami.

16 “Tsay dibüjukunata rikaykularmi Babilonia runakunawanpis kakuyta munashpan kachata kachakurqan pushamunanpaq. 17 Tsaynöpami Babilonia runakuna chayamuptin jukwan jukwan kakur jutsata rurashqa. Tsayno jutsata rurarmi melanashqanyaq paykunawan kakushqa.

18 “Mana penqakuypa pitapis waynäkuptin nananta rikayta mana munashqänölami Aholibatapis rikayta munashqätsu. 19 Tsay jananmanpis Egiptucho jipashlaraq kaykar pïmaywanpis kakushqanta yarpakurkurmi mana penqakuypa pïmaywanpis kakushqa. 20 Egiptuchöqa pasaypa shanaripakurmi pïmay runakunatapis waynäkushqa. Tsay runakunapa raninpis bürrupanöraqmi y lëchinpis cawallupanöraqmi kashqa. 21 Tsaymi jipashlaraq kaykar Egipto runakunawan kakushqanno pïmaywanpis kakushqa. Tsaychömi chuchunkunatapis lapipashqa”.

22 Tsaymi TAYTA DIOS kayno nin: “Aholiba, kananqa melanashqayki waynaykikuna chikishunaykipaqmi kamakätsishaq. Tsaymi ushakätsishunaykipaq maytsaypitapis shapäkamunqa. 23 Tsay runakuna shamunqa Asiriapita y Babiloniacho kaq Caldeapitami. Tsay caldeo runakunami kanqa Pecod, Soa y Coa partikunapita. Lapanpis kanqa kuyaylapaq mözukuna, capitankuna, mandaqkuna y cawallun muntashqa reqishqa runakunami.

24 “Maytsay nacionkunapitami atska soldädukuna atacashunaykipaq carrëtankunawan shapäkamunqa. Escüdunkuna y armankuna aptashqa y fiërru cascunkuna jatishqami shapäkamunqa. Kachapaptïmi munashqanno castigashunkipaq. 25 Fiyupa rabyashqa karmi kachapäshaq vincishushpayki senqaykita y rinrikita roqushunaykipaq. Wamraykikunatapis olquta warmita qechushushpayki espädawanmi wanutsipäkunqa. Nirkurmi lapan imaykaykikunatapis rupatsir ushapäkunqa. 26 Röpaykikunatapis alhäjaykikunatapis lapantami apakärinqa.

27 “Tsaynöparaqmi Egiptucho kashqaykipita patsa shanaripakur pïmaywanpis kakushqaykino manana kakunkipaqnatsu. Mananami ïdulukunatapis adorankipaqnatsu ni Egipto runakunapaqpis yarparankipaqnatsu”.

28 TAYTA DIOSMI kayno nin: “Chikishqayki nación runakunapa munayninman y melanashqayki runakunapa makinmanmi kachaykushayki. 29 Paykuna chikishushpaykimi imaykaykitapis qechushushpayki qarapachashunkipaq. Penqakuypaq pïmaywanpis lutala kashqayki musyakanqami. 30 Tsayno nakanaykipaq kikikimi jutsayuq kaykanki. Qamqa juk nación runakunawanmi kakushqanki y paykuna adorashqan ïdulukunatami adorashqanki. 31 Nanayki rurashqannölami qampis rurashqanki. Tsaymi nanaykita uputsishqä castïgu cöpäta qamtapis uputsishayki”.*

32 TAYTA DIOSMI kayno nin: “Nanaykita uputsishqä jatunkaray cöpatami uputsishayki.* Tsay cöpaqa anchu y hondumi kaykan. Tsayta upuptikimi pïmaypis jamurpäshushpayki asipäshunkipaq. 33 Tsay cöpaqa nanayki Samaria upushqan mantsakuypaq cöpami kaykan. Tsaymi tsaypita upur shinkashpayki pasaypa lakikunkipaq. 34 Qontsuntintami chipyaq upunkipaq. Nirkurmi tsay cöpata pakirir chuchuykitapis pishtaypa pishtar ushankipaq”. TAYTA DIOSMI tsayno nin.

35 Tsaymi TAYTA DIOS kayno nin: “Noqata qonqaykamar penqakuypaq kawashqaykipitami fiyupa nakankipaq”.

36 TAYTA DIOS kaynömi nimarqan: “Runapa tsurin, Ahola y Aholiba jutsata rurashqanpita qayapay. 37 Paykunaqa ïdulukunata adorashpanmi adulteriu jutsata ruraqno karkaykan. Tsaynöpis ïdulukunata adorar wamrankunata *altarcho rupatsishpanmi wanutsikuq karkaykan. 38 Mana penqakuq karmi wamrankunata wanutsishqan junaqla adoramänanpaq templüman yaykapäkushqa. Tsaynöpami templüta *impüruyätsishqa. Jamay junaqtapis manami respitantsu. 39 Yapaymi kayno nï: Ïdulukunata adorar wawankunata rupatsishqan junaq adoramänanpaq yaykurmi templüta manakaqman churapäkushqa. ¡Templütami impüruyätsishqa!

40 “Tsaynöpis karucho taq runakunata qayatsinanpaqmi tsay warmikuna kachata kachapäkushqa. Qayatsishqan runakuna chayaykuptinmi tsay warmikuna armakurir nawinta pintakärishqa y kamaraqla kananpaq adornunkunatapis jatikärishqa. 41 Kuyaylapaq cäma jananman tsay runakunawan jamaykurmi nawpancho kaykaq mësaman *sagrädu inciensuta y perfümita churapäkushqa. 42 Wayinchömi fiestata rurar qaparashqanpis mayakämushqa. Chunyaq jirkapita shamuq runakunapis tsayman chayaykurmi brasilëtakunata y kuyaylapaq corönakunata jatipashqa.

43 “Tsaymi yarpaynilächo kayno nirqä: ‘*Wayrapakuq chakwas warmikunawan kakuyta munarqa kakutsunpis’. 44 Tsay yarpashqänölami Aholaman y Aholibamanqa atska runakuna shapäkamushqa. Mana penqakuq warmi kaptinmi juknin jukninpis paykunawan kakushqa. 45 Tsayno kashqanpitami jutsaynaq runakuna tsay warmikunata juzgapäkunqa. Runanta jarukuq warmi kashqanpita y wanutsikuq kashqanpita juzgarmi condenanqa.* Wanutsikuq kaptin makinkunapis yawarlanami kaykan”.

46 Tsaymi TAYTA DIOS kayno nin: “Paykunata atacananpaq tsaytsika runakunata kachamuptïmi lapan imaykantapis apakärinqa. 47 Saqmar ushapäkunqa. Espädankunawanmi tuksipäkunqa. Wamrankunatapis olquta warmitami wanutsipäkunqa. Wayinkunatapis rupatsir ushapäkunqa. 48 Tsaynöpami kay nacioncho melanaypaq kaq mana ali ruraykunata ushakätsishaq. Tsayta rikakur wakin warmikunapis manami tsayno kanqanatsu. 49 Tsay warmikuna ïdulukunata adorashqanpitami castigashaq. Tsayraqmi TAYTA DIOS kashqäta musyapäkunkipaq”.