Apocalipsis

Libru qalaykunan

1 Kay libruchömi qelqaraykan Jesucristuta Tayta Dios revelashqan. Jesucristumi *angilninta kachamur tsay revelacionta sirviqnin Juanta revelarqan. Tsayno revelarmi sirviqninkunata imapis pasananpaqna kaqkunata tantiyatsirqan. 2 Juannami tsay revelacionta qelqar Tayta Dios nishqankunata, Jesucristo nishqankunata y lapan rikashqankunata qelqashqa.

3 Kushishqami kanqa kay qelqaraykaqkunata liyiqkuna y liyipashqanta mayar cäsukuqkunaqa. Kay qelqaraykaqkunaqa cumplikänanpaqnami kaykan.

Qanchis iglesiakunacho juntakaykaq wawqi panikunata winchikushqan

4 Asia provinciacho kaykaq qanchis *iglesiakunacho juntakaq wawqi panikuna:

Noqa Juanmi qamkunapaq qelqaykämü. Unaypita kawaq, kananpis kaykaq y shamunanpaq kaykaq Tayta Dios y trönunpa nawpancho kaykaq qanchis espïritukunapis* kuyapäshushpayki ali kawapäkunaykipaq yanapaykuläshunki.*

5 Jesucristupis ali kawapäkunaykipaq qamkunata yanapaykuläshunki. Paymi Tayta Dios munashqannöla wilakuyninta wilakushqa y wanushkunapita puntata kawarimushqa.* Kay patsacho lapan reykunapitapis mas munayniyuqmi kaykan.* Paymi kuyamashpantsi yawarninta jichar lapan jutsantsita maylamashqantsi.

6 Mandamaqnintsi rey kashpanmi shuntamashqantsi makincho kanantsipaq. Tsaynöpis churamashqantsi Papänin Tayta Diosta sirviq cürakuna kanantsipaq.* ¡Jesucristo imaypis alabashqa kaykulätsun! ¡Pay japalan mandamaqnintsi kaykulätsun! Amén.

8 Unaypita kawaq, kananpis kaykaq y shamunanpaq kaykaq munayniyuq Tayta Dios kaynömi nin: “Alfa y Omegami noqa kaykä.* [Qalaykunan y ushananmi kaykä]”.*

Jesucristuta Juan rikashqan

9 Noqaqa Jesucristuman yärakuq mayiki Juanmi kaykä. Qamkunanölami Jesucristo *mandaykashqancho kaykä. Nakatsishushqaykinölami noqatapis Jesucristuman yärakushqäpita nakatsipäkaman. Qamkunanölami mana ajayaypa shuyäkuykä paypa nawpanman chayanäpaq. Tayta Diospa wilakuyninta wilakushqäpita y Jesucristo salvamaqnintsi kashqanta wilakushqäpitami Patmos islacho prësu kaykä.

10 Tsaycho kaykarmi domingu junaq Espíritu Santupa munaynincho kar mayarqä *cornëta tukamuqnöraq qepächo kayno nimuqta: 11 “[Alfa y Omegami noqa kaykä. Qalaykunan y ushananmi kaykä.] Revelacioncho rikatsishqäkunata juk rölluman qelqarkur apatsiy [Asia provincia] qanchis markakunacho kaykaq *iglesiakunapaq. Tsay markakuna kaykan Éfeso, Esmirna, Pérgamo, Tiatira, Sardis, Filadelfia y Laodiceami”.

12 Qepächo parlamuqta mayarmi tikraykurqä pï kashqantapis rikanäpaq. Tsaychömi rikarqä qoripita rurashqa qanchis candelabrukuna rataykaqta.* 13 Tsay candelabrukuna chawpinchömi rikarqä runapa tsurin niraqta.* Paymi chaki puntanyaq röpan jatishqa kaykarqan. Qasqunpami qoripita rurashqa wachkuwan wataraykarqan.* 14 Aqtsanpis yoraq milwano y rajuno yoraqmi karqan.* Nawinnami ninanöraq atsikyarqan. 15 Chakinkunapis warishqa broncinöraqmi chipchipyarqan.* Parlashqanpis atska yaku aywar qaparaqnöraqmi karuman mayakarqan.* 16 Alawqa kaq makinchömi qanchis qoylarkunata tsarararqan. Shiminpitanami ishkan lädunpa afilashqa espäda yarqamurqan. Qaqlanpis intinöraqmi chipchipyarqan.

17 Payta rikaykurmi nawpanman wanushqano ishkirqä. Tsaymi alawqa kaq makinwan yataykamar kayno nimarqan: “Ama mantsakamaytsu. Noqami qalaykunan y ushanan kaykä.* 18 Imayyaqpis kawaqmi kaykä. Tsayno kawanäpaqmi wanutsimashqanpita kawarimushqä. [Amén.] Noqami tsararaykä wanushkunapa almankuna kaykashqan llävita.* 19 Lapan rikashqaykita qelqay. Kanan pasaykashqanta y pasananpaq kaqkunatapis lapanta qelqay.

20 “Kananmi tantiyatsishayki alawqa kaq makïcho rikashqayki qanchis qoylarkuna y qoripita qanchis candelabrukuna ima kashqantapis. Qanchis qoylarkuna kaykan tsay qanchis iglesiakunapa *angilninkunami. [Rikashqayki] qanchis candelabrukuna kaykan tsay qanchis markakunacho kaykaq iglesiakunami”.