Isaías
Sirviqninpaq Tayta Dios nishqan
42 Tayta Dios kaynömi nin:
“Sirvimaqnï imano kashqantapis tantiyakäriy.
Payta noqami yanapaykä.
Payta noqami akrashqä.
Paypitami kushishqa kaykä.*
Espïritütami payman kachamushqä.
Tsaymi maytsay nación runakunatapis ali kawapäkunanpaq yanapanqa.
2 “Payqa manami pitapis olqüpanqatsu ni qayapanqatsu.
Cällikunachöpis manami olquraykar purinqatsu.
3 Latkishqa shoqushtapis manami pakinqatsu.
Upinaykaq atskitapis manami upitsinqatsu.*
Payqa lapantapis alimi juzganqa.
4 “Kay patsacho ali kawapäkunanpaqmi shumaq yachatsinqa.
Tsayta manaraq yachatsirqa manami jamaytapis tarinqatsu.
Karu nacioncho taqkunapis pay yachatsishqanta mayaytami munanqa”.*
5 Tayta Diosmi jana patsata kamarkur qoylarkunata intërupa mashtamurqan.
Paymi kay patsata y kay patsacho wayuqkunatapis kamarqan.
Paymi runakunatapis kawayta qon.*
Paymi sirviqninta kayno nin:
6 “Noqa Tayta Diosmi qamta qayashqä munashqäta ruranaykipaq.
Makipita janchashqa puritsirmi lapancho yanapashayki.
Qamta churashayki Israel runakunawan *pactu rurashqäta cumplinaykipaqmi.
Tsaynöpis churashayki maytsay nacionkunapaqpis atski kanaykipaq*,
7 qaprakunata aliyätsinaykipaq,
prësukunata carcilpita jorqamunaykipaq
y tsakäpakushqano kawaqkunata atsikyaqman jorqunaykipaqmi.
8 “Noqapa jutïqa *Yahwehmi.
Noqalata runakuna adorapäkamänantami munä.*
Manami ima ïdulutapis adorapäkunanta munätsu.
9 Nawpata wilakatsishqänölami lapanpis kashqa.
Kananqa yapaymi imapis pasananpaq kaqkunata wilakaykätsï.
Pipis manaraq musyaptinmi qamkunata musyaykätsï”.
Salvakuq kashqanpita Tayta Diosta alabashqan
10 Mushuq alabanzata cantar Tayta Diosta alabapäkuy.
Mayjina karucho taqkunapis payta alabapäkutsun.
Lamar jananpa *büquiwan pasaqkunapis payta alabapäkutsun.
Lamar rurincho kawaqkunapis payta alabapäkutsun.
Costacho taqkunapis payta alabapäkutsun.*
11 Tsaki jirkacho kaykaq markakunapis alabapäkutsun.
Cedar runakunapis alabapäkutsun.
Sela markacho taq runakunapis alabapäkutsun.
Maytsaymanpis mayakänanpaq jirka puntanman witsarkur alabapäkutsun.
Kushikuypita alabapäkutsun.
12 Costacho kaykaq markakunachöpis Tayta Diosta alabapäkutsun.
13 TAYTA DIOSQA ali chölu soldädunömi pelyananpaq shamunqa.
Qaparar atacashpanmi contrankunata ushakäratsinqa.
14 Tayta Dios kaynömi nin:
“Atska watami upälakur kuyashqä runakunata mana salvashqätsu.
Chikiqninkuna nakatsiptin manakamaptinpis manami imatapis rimakushqätsu.
Kananmi itsanqa kuyashqä runakunata contrankunapita salvashaq.
Warmi wachar qaparashqannömi qaparäshaq.
15 Paykunata salvar nacionninman kutitsinäpaqmi jirkakunatapis jirkankunatapis ushakätsishaq.
Tsaycho winaq yörakunatapis lapantami tsakitsishaq.
Mayukunatapis chunyaq tsaki jirkamanmi tikratsishaq.
Qochakunatapis tsaki alpamanmi tikratsishaq.
16 “Qaprakunatapis* mana reqishqan nänipami pushashaq.
Imaypis mana purishqan nänipami puritsishaq.
Paykuna aywananpaq tsakaytapis atsikyaqmanmi tikratsishaq.
Mana ali nänitapis shumaqmi pampatsashaq.
Tsaykunata rasunpami rurashaq.
17 “Tsayta musyarmi ïdulukunaman yärakuqkuna penqakärinqa.
Ïdulukuna diosnin kashqanta yarparpis pasaypa penqakushqami aywakärinqa.*
Israel runakuna mana tantiyakuq kashqan
18 “Israel runakuna, qamkunaqa upano y qapranömi karkaykanki.
Upano karpis nishqäta cäsukäriy.
Qaprano karpis shumaq rikapäkuy.
19 Sirvimaqnï karpis qamkunaqa qaprapitapis mas qaprami karkaykanki.
Wilakuqnï karpis qamkunaqa upapitapis mas upami karkaykanki.
20 Ima pasashqanta rikarpis manami yarpachakärinkitsu.
Nishqäkunata mayaykarpis manami tantiyapäkunkitsu”.
21 Salvakuq karmi Tayta Dios munan kuyashqan runakuna leyninkunata shumaq yachakur cäsukunanta.
22 Tsayno kaptinpis manami cäsukushqatsu.
Tsaymi Tayta Dios castigar paykunata suwapänanpaq contran runakunata kacharqan.
Kananqa contrankunata mantsakurmi wakinqa machaykunaman pakakärin.
Wakinnami calapösucho wichqarpaykan.
Prësu apakäriptin manami pipis kantsu michänanpaq.
Lapan imaykankunata apakäriptinpis manami pipis kantsu qechüshinanpaq.
23 Tsayno kaykaptinpis ¿mayqalaykiqa imapita nakashqaykitapis tantiyakunkitsuraq?
Wara warantinkuna ima pasananpaq kashqanta tantiyakur ¿mayqalaykiqa cäsukunkitsuraq?
24 ¿Pitaq kamakätsishqa chikimaqnintsikuna vincimashpantsi imaykantsikunatapis apakunanpaq?
Tsayno pasamänantsipaq Tayta Diosmi kamakätsishqa.
Jutsata rurarmi payta rabyanätsishqantsi.
Yätsishqankunatapis y mandamientunkunatapis mana cäsukuypami kawashqantsi.
25 Tsaymi fiyupa rabyashpan soldädukunata Tayta Dios kachamushqa atacamänantsipaq.
Tsay soldädukunami imaykantsitapis rupatsipäkushqa.
Tsayno kaptinpis manami tantiyakushqantsitsu.
Nina ushamaptintsipis manami cäsukärishqantsitsu.