Éxodo
Sagrädu Tolduta rurananpaq Bezaleelta y Aholiabta akrashqan
31 Moisésta TAYTA DIOS kayno nirqan: 2 “Uripa tsurin y Hurpa wilkan Bezaleelta noqami akrashqä. Judá trïbupitami pay kaykan. 3 Bezaleelman Espïritüta kachamurmi habilidäta qoshqä. Tsaymi payqa ima ruraytapis shumaq yachan. 4 Qoripita, qellaypita y broncipita kuyaylapaq kaqkunata rurananpaqpis habilidänin kanmi. 5 Kuyaylapaq rumikunatapis laqlayta yachanmi. Tsararänanta shumaq rurarkurmi kamaraqla kananpaq siguratsin. Tsaynömi qerutapis laqlayta yachan y tukuy niraq kuyaylapaq kaqkunatapis rurayta yachan. 6 Payta yanapananpaqmi Dan trïbupita Ahisamacpa tsurin Aholiabta churashqä. Tsaynölami nishqäkunata ruratsinaykipaq qamkunacho kaq lapan yachaq runakunatapis habilidäta qoshqä. 7 Paykunami rurapäkunqa Tinkunantsi Tolduta, *Pactu Babulta, Pactu *Babulpa tsapananta y Tinkunantsi Toldupa lapan manëjunkunatapis. 8 Tsaynöpis rurapäkunqa mësata manëjuntinta, qoripita candelabruta manëjuntinta, inciensuwan qoshtatsikuna *altarta, 9 sacrificiuta rupatsina altarta manëjuntinta y jatun lavatoriuta jamakunantinta. 10 Tsaynöpis rurapäkunqa Aarón jatikunanpaq *sagrädu röpata y tsurinkuna jatikunanpaq kaq röpakunata. 11 Tsaynöpis rurapäkunqa sagrädu aceitita y Tinkunantsi Toldupaq inciensuta. Qamta yätsishqänölami lapantapis rurapäkunqa”.
Jamay junaqpaq tantiyatsishqan
12 TAYTA DIOS mastapis Moisésta kayno nirqan: 13 “Israel runakunata wilanki jamay junaqta respitananpaq. Jamay junaqqa imaypis señal kanqa qamkunapaq y qamkunapita miraqkunapaqpis. Tsaymi tsay junaqta respitar tantiyapäkunkipaq *santu kapäkunaykipaq qamkunata akrashqäta. 14 Jamay junaq *sagrädu kaptin lapayki respitanki. Tsay junaqta mana respitaq kaqtaqa wanutsipäkunki. Tsay junaqcho ima aruytapis aruq kaqtaqa Israel runakunapita qarqupäkunki.
15 “Soqta junaqla arupäkunki. Qanchis kaq junaqqa sagrädu kaptin jamapäkunki.* Pipis jamay junaqcho aruq kaqtaqa wanutsipäkunki. 16 Tsayno kaptinqa Israel runakuna imaypis jamay junaqta respitanqa. Tsayno respitarmi paykunawan *pactu rurashqäta cumplipäkunqa. 17 Jana patsata y kay patsata soqta junaqcho kamarkurmi qanchis junaqcho jamarqä. Tsaymi Israel runakuna cäsumashqanta musyanäpaq tsay junaq señal kanqa”.*
18 Sinaí puntacho Moisésta tantiyarkatsirmi ishkay läja rumikunaman dëdunwan qelqashqan mandamientunkunata Tayta Dios entregarqan. Tsay mandamientunkuna karqan paykunawan Tayta Dios rurashqan pactuta cumplipäkunanpaqmi.