Salmos
Tayta Diosta alabashqan
135 ¡Aleluya!
¡TAYTA DIOSTA alabapäkuy!
Sirviqninkuna, TAYTA DIOSTA alabapäkuy.
2 TAYTA DIOSPA wayincho kaykaqkuna, payta alabapäkuy.
Tayta Diosnintsipa wayin patiucho kaykaqkuna, payta adorapäkuy.
3 Alilata ruraq kashqanpita TAYTA DIOSTA adorapäkuy.
Kuyakuq kashqanpita salmukunata cantar alabapäkuy.
4 Jacobpita miraq runakunatami paypa kananpaq TAYTA DIOS akrarqan.
Israel runakunatami akrarqan herencian kananpaq.
5 Noqa musyämi TAYTA DIOS munayniyuq kashqanta.
Payqa lapan dioskunapitapis mas munayniyuqmi kaykan.
6 Jana patsacho, kay patsacho, lamarcho y lamar rurin jiwjiwyaykaqkunachöpis TAYTA DIOSQA munashqantami ruran.
7 Kay patsapa kuchunpitami pukutayta sharkatsin.
Tamyamunanpaqpis räyutami pashtatsimun.
Churaraykätsishqanpitami wayratapis jorqamun.*
8 Egipto runakunapa qechpa tsurinkunatami wanutsirqan.
Uywankunapa punta kaq wawankunatapis wanutsirqanmi.
9 Faraón y mandäshiqninkuna rikananpaqmi Egiptucho mantsariypaq kaqkunata rurarqan.*
10 Atska nacionkunachömi runakunata wanutsirqan.
Munayniyuq reykunatapis ushakätsirqanmi.
11 Tsay reykunami karqan amorreo runakunapa mandaqnin Sihón, Basáncho taq rey Og y cananeo runakunapa mandaqnin reykuna.*
12 Tsay runakunapa nacionninkunatami kuyashqan Israel runakunata qoykurqan posisionnin kananpaq.
13 TAYTA DIOS, mana ushakaqmi kaykanki.
Qamtaqa imayyaqpis yarparäshunkipaqmi.
14 TAYTA DIOSQA kuyashqan runakunata yanapanqami.
Sirviqninkunataqa kuyapanqami.*
15 Juk lädu nación runakuna adorashqan ïdulukunaqa qorilapita y qellaylapitami kaykan.
Tsaykunataqa runakunalami rurapäkun.
16 Shimin kaptinpis manami rimantsu.
Nawin kaptinpis manami rikantsu.
17 Rinrin kaptinpis manami mayantsu.
Manami jämayninpis kantsu.
18 Ïdulu munayniynaq kashqannömi ïdulukunata ruraqkunapis karkaykan.
Ïdulukunaman yärakuqkunaqa ïdulunölami lapan karkaykan.*