Levítico
Cürakuna imano kananpaq nishqan
21 Moisésta TAYTA DIOS kayno nirqan: “Aarónpita miraq cürakunata kayno niy: ‘Cüra *impüru mana rikakunanpaq aylun wanuptinpis ayanta ama yatanqatsu. 2 Mamanpa, taytanpa, tsurinpa, wawqinpa ayantami itsanqa yatanman. 3 Virginlaraq paninpa ayantapis yatanman. Impüru rikakunan kaptinpis paykunapa ayantaqa yatanmanmi. 4 Warminpa aylun wanuptinmi itsanqa impüru mana rikakunanpaq ayanta ama yatanqatsu.
5 “ ‘Pï wanuptinpis lakikur aqtsanta ni shaprantapis cüraqa ama rutukunqatsu. Qarantapis pishtaypa pishtar ama kutsukunqatsu.* * 6 Tsaypa trukanqa Dios munashqanta rurar cürakuna *santu kawapäkunqa. Runakuna apapäkamushqanta *altarcho rupatsinanpaqmi cürakunata TAYTA DIOS akrashqa. Tsay rupatsishqankunaqa TAYTA DIOSPA mikuyninmi kaykan. Tsayno kaykaptinqa TAYTA DIOSPAQ santu kapäkunqa.
7 “ ‘Cürakunataqa Tayta Diosmi akrashqa santu kananpaq. Tsayno kaykaptinqa ama tätsuntsu *wayrapakuq warmiwan, tsaripakushqa warmiwan o runanpita rakikashqa warmiwanqa.
8 “ ‘Cürakuna santu kashqanta Israel runakuna tantiyakäritsun. Paykunata respitapäkutsun noqapaq apapäkamushqanta altarcho rupatsiq kashqanpita y noqa santu kashqäpita. Noqami qamkunata akrashqä santu kapäkunaykipaq.
9 “ ‘Cürapa jipash tsurin wayrapakuq warmi rikakurqa papänintami penqayman churaykan. Tsay niraq jipashtaqa kawaykaqta rupatsipäkunki.
10 “ ‘Mandaq cüralami *sagrädu röpataqa jatikunqa. Tsayta jatikunqa mandaq cüra kananpaq umanman sagrädu aceitita winapashqa kaptinmi. Tsaymi wanupakurpis tinsha uma mana purinqatsu ni röpantapis rachinqatsu. 11 Maman wanuptinpis o taytan wanuptinpis tsutaraykashqan kaqman ama yaykunqatsu. Tsayman yaykurqa impürumi rikakunqa. 12 Sagrädu aceitita umanman winapashqa kaykar ayaman aywarqa Tayta Diospa *Sagrädu Tolduntapis impüruyätsinqami. Noqaqa TAYTA DIOSMI kaykä.
13 “ ‘Mandaq cüraqa virginlaraq jipashta warminpaq ashinqa. 14 Manami tanmantsu viüdawan, runanpita rakikashqa warmiwan, tsaripakushqa warmiwan ni wayrapakuq warmiwanpis. Warmita ashirqa Leví trïbupita virginlaraq jipashta ashinqa. 15 Warmin tsayno kaptinqa paypita miraqkunata mana jamurpanqatsu. Mandaq cürataqa noqa TAYTA DIOSMI akrashqä santu kananpaq’ ”.
Sänu kaqkunala cüra kananpaq nishqan
16 Mastapis Moisésta TAYTA DIOS kayno nirqan: 17 “Aarónta kayno ninki: ‘Qampita miraqkuna sänu kaqkunalami cüra kanqa. Paykunalami TAYTA DIOSPAQ runakuna apapäkamushqanta *altarcho rupatsinqa. Tsay rupatsishqanqa TAYTA DIOSPA mikuyninmi kaykan. 18 Tsawraqa mandaq cüra kananpaq manami yaykunmantsu qaprakuna, weqrukuna, sira cärayuqkuna, makllukuna, 19 chankan pakishkuna, rikran pakishkuna, 20 kurkukuna, takshakuna, nübish nawiyuqkuna, qarachukuna, chupu qeshyawan qeshyaqkuna y runtun däñashkuna. 21 Aarónpita miraqkuna sänu mana karqa TAYTA DIOSPAQ apapäkamushqanta altarcho manami rupatsinqatsu. Sänu kaqkunalami rupatsinqa. 22 Altarcho mana rupatsirpis TAYTA DIOSPAQ apamushqan *sagrädu mikuyta y aytsatami itsanqa mikupäkunqa. 23 Tsaynöpis cortïnata ama pasanqatsu, Lugar Santïsimumanpis ama yaykunqatsu ni altarmanpis ama witinqatsu. Tsayman witirqa *Sagrädu Tolduta manami respitaykantsu. Noqa TAYTA DIOSMI paykunata akrashqä santu kananpaq’ ”.
24 Tayta Dios tsayno nishqantami Moisés wilarqan Aarónta, Aarónpa tsurinkunata y lapan Israel runakunata.