Isaías
Ayünu imano kashqanpis
58 Tayta Dios kayno nimarqan:
“¡Mana mantsakuypa lapan kalpaykiwan qayakuy!
¡*Cornëta waqaqnöraq qayakushqayki mayakätsun!
¡Jacobpita miraq kuyashqä runakunata jutsa rurashqanta tantiyatsiy!
2 Paykunaqa munashqäno kawayta munarmi waran waran *ashipäkaman.
‘Dios munashqanno kawapäkushun’ nishpanmi yanapanäpaq manakaman.
Tsayno manakamarpis mandamientükunata cäsukuq tukärinlami.
Manami munashqänötsu kawapäkun.
3 Mana yanapaptïmi kayno nipäkaman:
‘Ayunarkaykaptïpis ¿imanirtaq mana mayamankitsu?
Yarqanayta awantarkaykaptïpis ¿imanirtaq mana cäsumankitsu?’
“Tsayno nimaptinpis kayno nï:
Qamkuna mana ali kawaptikimi ayunaptikipis mana cäsütsu.
Ayunashqayki junaqpis rïcuyänayki kashqami aruqnikikunata mana pägaypa arutsipäkunki.
4 Ayunarpis shimi shimimi rimanakurkaykanki.
Tsaynöpis mana kuyapänakuypami pelyarkaykanki.
Ayunar tsayno kaptikiqa ruwakamashqaykitapis manami cäsushaykitsu.
5 “Qamkunaqa ayunarpis äjusyashqa jaranömi janjampaykachaykanki.
Tsaynöpis qachqa röpayki jatishqami uchpa janancho wequrpaykanki.
¿Tsaynötsuraq munashqäno ayünu junaq kaykan?
6 Noqa munashqäno ayunarqa manakaqta jitapar prësu wichqashqayki runata kacharinki,
runa mayikita ama nakatsinkitsu
y arutsishqayki runakunatapis yüguta paskaqno jamatsipäkunki.
7 Tsaynöpis munä waktsakunata mikuyta melqapänaykita,
wayiynaqkunata patsatsinaykita,
röpaynaqkunata jatipänaykita
y runa mayikita kuyapänaykitami.
8 “Tsayno kapäkuptikimi patsa waraqno qamkunapaq salvación kanqa.
Kushishqa ali kawanaykipaqmi yanapashayki.
Alita ruraq kashqaykimi puntaykita aywanqa.
Qepaykipitami munaynïwan imapitapis tsapäshayki.
9 Manakamaptikiqa kamaripäshaykimi.
Yanapanäpaq qayakamaptikiqa yanapashaykimi.
“Runa mayikita amana nakatsiynatsu ni ashliynatsu.
Pitapis lutalaqa amana tumpaynatsu.
10 Mikanaqkunata qaraykuy.
Lakikuqkunata shakyätsiy.
Tsayno karqa tsakaycho atsikyaqnömi kankipaq.
Tsakäpakushqano kashqaykipis pulan junaqnömi atsikyanqapaq.
11 NOQAMI uysha mitsiqno imaypis ali rikashayki.
Imata nistashqaykitapis kamaripäshaykimi.
Kalpayki kananpaqpis yanapashaykimi.
Tsaynöpis ali parqushqa huertano y imaypis mana tsakiq pukyunömi kankipaq.
12 Unay raqäkunatami altsankipaq.
Unay kaq cimientu janalanmanmi yapay sharkatsinkipaq.
Tsaymi kayno nipäkushunkipaq: ‘Paykunaqa juchushqa perqakunata y wayikunata altsaqmi’ ”.
Jamay junaqpita yachatsishqan
13 “Jamay junaqtaqa respitapäkuy.*
Tsay junaqqa ama imatapis rantiytsu ni rantikuytsu.
Tsaypa trukanqa tantiyakäriy tsay junaq kushikuypaq kashqanta y akrashqä *sagrädu junaq kashqanta.
Tsay junaqta respitashpayki ima ruraytapis kachaykur jamapäkuy.
Shonquyki yarpashqantaqa ama rurapäkuytsu.
Lutankunatapis ama rimapäkuytsu.
14 “Tsaykunata cumplirqa kushishqami kawapäkunkipaq.
Pïmaypis respitashunaykipaqmi churashayki.
Unay ayluyki Jacobta qoykushqä nacioncho kushishqami qamkuna tankipaq”.
Kikin TAYTA DIOSMI tsayno nishqa.