2 Reyes
24 Judá nacioncho Joacim rey kaykashqan witsanmi Babiloniapa mandaqnin rey Nabucodonosor Judá nacionta atacar vincirqan.* Judá nacionta kimsa wata munaynincho tsararaykaptinmi Joacimqa contran sharkurqan. 2 Tsaypitanami asaltantikunata TAYTA DIOS kacharqan Judá nacionta ushakätsinanpaq. Tsay asaltantikuna shamurqan Babiloniapita*, Siriapita, Moabpita y Amónpita. Tsayno pasarqan TAYTA DIOSPA sirviqnin profëtakuna wilakushqannömi.
3 Asaltantikunata TAYTA DIOS tsayno kacharqan Judá nación runakunata nawpanpita qarqunanpaqmi. Tsayno rurarqan rey Manasés tukuy niraq jutsata rurashqanpitami. 4 Manasésqa jutsaynaq runakunata tsaytsikatami Jerusaléncho wanutsirqan. Tsayno wanutsishqanpitami TAYTA DIOS mana perdonarqantsu.
5 Rey Joacim imata rurashqanpis Judá nacionpa mandaqnin reykunapa acta librunchömi qelqaraykan. 6 Joacim wanuykuptinnami tsurin Joaquínna rey karqan.
7 Babilonia nacionpa mandaqnin reyqa Egipto raqrapita hasta Éufrates mayuyaq lapan markakunata munaynincho tsarararqan. Tsayno tsararaptinmi Egipto nacionpa mandaqnin rey soldädunkunawan Judá nacionta mana atacarqannatsu.
Joaquínta y wakin runakunata Babiloniaman prësu apashqan
8 Joaquínqa chunka pusaq watayuq kaykarmi rey kayta qalaykurqan. Payqa kimsa killalami Jerusalénpita mandarqan. Mamanmi karqan Jerusalén markapita Elnatánpa tsurin Nehusta. 9 Joaquínpis taytannölami TAYTA DIOSTA mana cäsukur jutsata rurarqan.
10 Tsay witsanmi Babilonia nacionpa mandaqnin rey Nabucodonosor soldädunkunata kacharqan Jerusalénta atacananpaq. Chayaykurmi Jerusalénta soldädunkuna tumariq tsapapäkurqan. 11 Tsaycho tsaparpaykaptinmi kikin Nabucodonosorpis tsayman chayarqan. 12 Pelyayta mana munarmi rey Joaquínpis, mamanpis, mandäshiqninkunapis, soldädunkunapa capitanninkunapis y yätsiqnin runakunapis rey Nabucodonosorpa munayninman churakarqan. Tsayno pasarqan Nabucodonosor pusaq watana Babilonia nacionpa mandaqnin rey kaykaptinmi.*
13 Jerusalénman yaykuykurnami rey Nabucodonosor templupitapis y palaciupitapis qoripita rurashqa manëjukunata jorqatsirqan. Rey Salomón qoripita ruratsishqan kaqkunata pakirkur templupita apatsirqan. Lapanpis tsayno pasarqan profëtankunawan TAYTA DIOS wilakatsishqannölami.* 14 Tsaynölami rey Nabucodonosorqa Jerusalénpita chunka waranqa (10,000) runakunata Babiloniaman prësu apakurqan. Tsaynölami prësu apakurqan capitankunata, alinnin soldädukunata, *artesänukunata y herrërukunata. Waktsa runakunalatami tsaycho kachaykurqan.
15 Babiloniaman prësu apakurqan rey Joaquínta, mamanta, warminkunata, capitanninkunata y Judá nacioncho taq lapan yachaq runakunatapis.* 16 Tsaynölami prësu apakurqan qanchis waranqa (7,000) soldädukunata y juk waranqa (1,000) artesänukunata y herrërukunata. Lapanpis tsay runakunaqa guërraman aywapäkunanpaq kalpanchönami kaykarqan. 17 Nirkurmi Babilonia nacionpa mandaqnin rey Nabucodonosorqa Joaquínpa tiyun Mataníasta churarqan rey kananpaq. Churarmi jutinta trukatsirqan Sedequías jutin kananpaq.*
Sedequías Judá nacioncho rey kashqan
2 Crónicas 36.11-16; Jeremías 52.1-3
18 Sedequías ishkay chunka juk (21) watayuq kaykarmi rey kayta qalaykurqan.* Payqa chunka juk watami Jerusalénpita mandarqan. Mamanmi karqan Libna markapita Jeremíaspa tsurin Hamutal. 19 Sedequíaspis taytan Joacimnölami TAYTA DIOSTA mana cäsukur jutsata rurarqan. 20 Tsaymi TAYTA DIOS rabyakushpan Jerusaléncho taq runakunata y Judá nacioncho taq runakunata nawpanpita qarqurqan.
Tsaypitanami rey Sedequías Babilonia nacionpa mandaqnin reypa contran sharkurqan.*