2 Crónicas
7 Salomón manakuyta usharkuptinmi ciëlupita nina ratamur rupatsina sacrificiuta y wakin sacrificiukunatapis rupar usharqan.* Tsaynölami TAYTA DIOSPA pukutayninpis templuman juntarqan. 2 Tsayno juntaptinmi templuman yaykuyta cürakuna mana kamäpakurqantsu. 3 Nina urämuqta y TAYTA DIOSPA pukutaynin templuman juntakuykuqta rikarmi Israel runakunaqa adorar pampaman lätakuykurqan. TAYTA DIOSTA alabarmi kayno nipäkurqan:
“¡TAYTA DIOSQA alilata ruraqmi!
¡Kuyapäkuyninqa manami imaypis ushakantsu!”*
4 Tsaypitanami rey Salomón y lapan Israel runakuna TAYTA DIOSPAQ sacrificiukunata rupatsipäkurqan. 5 Tsaymi rupatsipäkurqan ishkay chunka ishkay waranqa (22,000) törukunata y pachak ishkay chunka waranqa (120,000) uyshakunata y cabrakunata. Tsaynömi Tayta Diospaq sharkatsishqan templuta lapan Israel runakunawan Salomón dedicarqan.
6 Sitiunkunaman cürakuna ichiykurmi *levitakunapa nawpancho *cornëtakunata tukarqan. Tsaynölami Tayta Diosta alabananpaq rey David ruratsishqan instrumentukunata tukashpan levitakuna cantarkaykarqan kayno nir: “¡Paypa kuyakuyninqa mana ushakaqmi kaykan!” Tsayyaqmi lapan Israel runakuna ichirpaykarqan.
7 Rupatsina sacrificiukuna, tsaki mikuy ofrendakuna y ali kawakuy sacrificiukuna tsaytsika kaptinmi bronci altar mana ayparqantsu rupatsipäkunanpaq. Tsaymi templu patiu chawpintapis Salomón dedicarqan tsay pampacho rupatsipäkunanpaq.
8 Tsaypitanami lapan Israel runakunawan *Ramäda fiestata Salomón rurapäkurqan. Hamat markaman yaykunapita patsa y Egipto raqra kuchunpita patsami tsay fiestaman atska runakuna shapäkamurqan. 9 Altarta dedicar qanchis junaq fiestata rurashqannömi Ramäda fiestatapis qanchis junaq rurapäkurqan. Tsaynölami Ramäda fiestata rurayta usharkur Diosta adorashpan juk junaq mas fiestata rurapäkurqan. 10 Qanchis kaq killa ishkay chunka kimsa (23) kaq junaqcho fiesta rurayta usharkurmi runakuna kutikärinanpaq rey Salomón despacharqan. Wayinkunapa kushishqa kutirmi TAYTA DIOSTA agradëcikärirqan Davidta, Salomónta y kuyashqan Israel runakunata yanapashqanpita.
Salomónta Tayta Dios promitishqan
11 Yarpashqannömi Salomónqa TAYTA DIOSPA templunta y rey täkunan palaciuta sharkatsiyta usharqan. 12 Tsaypitanami tsakaypa yuriparkur Salomónta TAYTA DIOS kayno nirqan: “Manakamashqaykitami mayashqä. Tsaymi sharkatsishqayki templuta akrashqä tsaycho sacrificiuta rupatsipäkunaykipaq. 13 Tsaymi mana tamyatsimuptï, mikuykunata ushananpaq chukluskunata kachamuptï y pesti qeshyata kachamuptï 14 kuyashqä runakuna jutsa rurashqanta tantiyakur perdonta manakamaptin, *ashimaptin y jutsa ruraykunata kachariptinqa manakamashqanta jana patsapita patsa mayashaq. Jutsa rurashqankunata perdonashpämi nacionninman bendicionnïta churamushaq.
15 “Kay templuman aywaykamur runakuna manakamashqanta mayashaqmi. 16 Kay templucho imayyaqpis tänäpaq akrashqa karmi mana kachaypa imaypis rikashaq.
17 “Qampis taytayki Davidno lapan nishqäta cäsukamar leynïkunata y mandamientükunata cumpliptikiqa 18 paywan *pactuta rurar promitishqänölami qampita miraqkuna imayyaqpis Israel runakunapa mandaqnin rey kanqapaq.*
19 “Leynïkunata y mandamientükunata mana cäsukushpayki juk dioskunata adoraptikiqa 20 qamkunata qoykushqä nacionpita qarqushaykimi. Adorapäkamänaykipaq sharkatsishqa kaptinpis taykashqä templuta kachariykushaqmi. Qamkunata castigaptïmi juk lädu nacioncho taq runakunapis kushipäshushpayki manakaqman churashunkipaq. 21 Kay templu kuyaylapaq kaptinpis raqälana kaykaqta rikaykurmi runakuna mantsakashpan kayno nipäkunqapaq: ‘¡Imanirraq kay nación runakunata y kay templutapis TAYTA DIOS ushakätsishqa!’* 22 Tsayno niptinmi kayno nipäkunqa: ‘Yärakushqan TAYTA DIOSTA qonqakuykur juk dioskunata adorar adorapäkushqanpitami paykunata tsayno pasashqa. Unay aylunkunata Egiptupita Tayta Diosnin jorqaykämuptinpis mana cäsukushqanpitami tsayno castigashqa’ ”.