Mateo
11 Chunka ishkay discïpulunkunata yachatsiyta usharkurnami Galileapa markan markan Tayta Diospa wilakuyninta wilakur Jesús purirqan.
Discïpulunkunata Bautizaq Juan Jesúsman kachashqan
2 Carcilcho kaykarmi Bautizaq Juan mayarqan Jesucristo imata ruraykashqantapis. Tsaymi [ishkay] discïpulunkunata Jesús kaqman kacharqan 3 kayno nir tapumunanpaq: “¿Qamkush kaykanki Tayta Dios kachamushqan Cristo o juktaraqkush shuyarpäshaq?”
4 Tsaymi Jesús kayno nirqan: “Kutiykur Juanta wilapäkuy mayashqaykita y rikashqaykita. 5 Qaprakuna rikannami. Makllukuna purinnami. *Leprawan qeshyaqkuna aliyashqanami. Upakuna wiyannami.* Wanushkuna kawarimushqanami. Waktsakunapis Tayta Diospa ali wilakuyninta mayaykannami.* 6 Yarpashqanno mana ruraptïpis mana ajayaypa noqaman yärakamaq runaqa kushishqami kawanqa”.
7 Juanpa discïpulunkuna kutikäriptinnami runakunata Jesús kayno nirqan: “¿Ima rikaqtaq chunyaq jirkaman aywapäkurqayki? ¿Shoqushta wayra kuyutsiqta rikanaykipaqku? 8 O ¿ima rikaqtaq aywapäkurqayki? ¿Ali röpashqa runata rikaqku aywapäkurqayki? Musyashqaykinöpis reypa wayincho taq rïcu runakunalami ali röpan jatishqa karkaykan. 9 Tsayno kaptinqa ¿ima rikaqtaq aywapäkurqayki? ¿Profëtata rikaqku? Aw, profëta rikaqmi. Noqa kaynömi nï: Paynöqa manami mayqan profëtapis kashqatsu. 10 Juanta kachamunanpaqmi kayno qelqaraykan: ‘Nänita pitsaqno runakunata kamarikatsinanpaqmi wilakuqnïta puntaykita kachashaq’.*
11 “Rasunpami kayno nï: Lapan profëtapitapis Bautizaq Juanqa mas tantiyakuqmi. Tsayno kaptinpis Tayta Dios *mandaykashqanman tsayraq yaykuqkunaqa Juanpitapis masmi tantiyapäkun.
12 “Bautizaq Juan wilakuyta qalaykushqanpita patsami Tayta Dios mandaykashqanta atska runakuna chaskiykurkaykan. Tsayno kaykaptinpis wakin runakunaqa manami munantsu tsay wilakuyta wilakärinanta, sinöqa imanöpapis tsapatami churaparkaykan. 13 Juan manaraq wilakuptinmi Moiséspis y profëtakunapis tsayno kananpaq kashqanta wilakärirqan.* 14 Paykuna wilakärishqanta mana criyipäkuptikipis ‘Elías shamunqami’ nir profëta wilakushqantaqa Juanmi cumplishqa.* 15 Rinriyuq kaqkunaqa nishqäkunata wiyakäritsun.
16 “Kanan tiempu runakunata ¿imamanraq tinkutsïman? Paykunaqa pläzacho puklaq wamrakunanölami karkaykan. 17 Tsay wamrakunami qayarpan kayno nir: ‘Pinkulluta tukaptïpis manami qatswankitsu. Ayapa cantanta cantaptïpis manami waqankitsu’. Tsay wamrakunanölami kanan tiempu runakunapis karkaykan. 18 Juan tantata mana mikuptin y vïnuta mana upuptinmi kayno nipäkun: ‘¡Payqa *supaypa munayninchömi kaykan!’ 19 *Runapa Tsurin mikuptin y upuptinmi kayno nipäkun: ‘¡Kay runaqa mikular upularmi purikun! ¡Impuestu cobraqkunapa y jutsasapa runakunapa yanasanmi!’ Tsayno nipäkuptinpis discïpulükuna Tayta Dios munashqanno kawaptinmi Juanta y noqata Tayta Dios kachamashqan tantiyakaykan”.
Jutsa ruraqkunata juzgananpaq Jesús nishqan
20 Atska milagrukunata Jesús rurashqanta rikarpis jutsa ruraykunata runakuna manami kacharirqantsu. Tsaymi Jesús kayno nirqan: 21 “¡Wawalaw, Corazín runakuna! ¡Wawalaw, Betsaida runakuna! Markaykikunacho milagrukunata rurashqäno Tiro markacho y Sidón markacho* milagrukunata ruraptïqa maynami jutsa ruraykunata kacharishpan qachqa röpata jatikurkur uchpa janancho jamarpanman karqan. 22 Noqa kaynömi nï: Tiro y Sidón runakunata castigashqanpitapis mas peormi juiciu final junaqcho Tayta Dios castigashunkipaq.
23 “Capernaúm runakuna, ¿jana patsaman chayanaykipaq kashqantaku yarparkaykanki? ¡Qamkunaqa *Hadesman qaykushqami kapäkunkipaq! Qamkunacho rurashqä milagrukunata Sodomacho* ruraptïqa jutsakunata kachariptin kananyaqmi tsay marka kaykanman karqan. 24 Noqa kaynömi nï: Sodoma runakunata castigashqanpitapis mas peormi juiciu final junaqcho Tayta Dios castigashunkipaq”.*
Tayta Diosta Jesús manakushqan
25 Tsaychömi Tayta Diosta Jesús manakurqan kayno nir: “Jana patsacho y kay patsacho munayniyuq Papä, qamtami alabä. Manami yachaq tukuqkunatatsu yarpaykashqaykikunata musyatsishqanki, sinöqa wamrano kaqkunalatami tantiyatsishqanki. 26 Tsayno kanantami munashqanki, Papä”.
27 Nirkurnami tsaycho kaykaq runakunata kayno nirqan: “Taytämi lapantapis munaynïman churamushqa.* Tsurin kaptï pay japalanmi noqata reqiman. Tsaynöpis Taytä kaptin noqalami payta reqï. Tsaymi noqa tantiyatsishqä runakunala Taytäta reqin”.*
28 “Utikashqa y lakishqa kaqkuna, lapayki noqaman shapäkamuy. Noqami jamayta qoshayki. 29 Noqapa yügüta matankaykiman churakäriy.* Kuyapäkuq y ali shonqu kashqäta rikakamar noqapita yachakäriy. Noqapita yachakurmi jamayta taripäkunki.* 30 Noqapa yügü ankashlami. Manami sasa apaytsu”.