2 Crónicas
Judá nacioncho Josafat rey kashqan
17 Asa wanuykuptinmi tsurin Josafatna rey karqan. Payqa Israel nacionta ichipänanpaqmi kamarikurqan. 2 Tsaymi Judácho kaykaq ali murallashqa markakunaman y wakin markakunamanpis soldädukunata churarqan. Tsaynölami soldädukunata churarqan papänin Asa acaparashqan Efraíncho kaykaq markankunamanpis.
3 Unay aylun David cäsukushqanno cäsukuptinmi Josafatta TAYTA DIOS yanaparqan. Josafatqa *Baal dioskunatapis manami adorarqantsu. 4 Israel nación runakuna jutsata ruraptinpis payqa manami jutsata rurarqantsu. Tsaypa trukanqa papänin yärakushqan Tayta Diospa mandamientunkunata cäsukurmi kawarqan. 5 Tsaymi TAYTA DIOS yanaparqan Judá nación runakuna lapanpis paypa makincho kananpaq. Tsaynölami Judá runakunaqa imaykatapis mandaqnin rey Josafatpaq apapäkuq. Tsaynöpami Josafat rïcuyarqan y pïmaypitapis respitashqa karqan. 6 Lapan voluntäninwan TAYTA DIOS munashqanno kawashpanmi markakunacho kaykaq *altarkunata y *Asera diösapaq jawishqan raku qerukunatapis Judá nacioncho lapanta ushakätsirqan.
7 Kimsa watana rey kaykarmi Judácho kaykaq markakunaman mandäshiqninkunata Josafat kacharqan Tayta Diospa mandamientunkunata yachatsinanpaq. Tsay mandäshiqkuna karqan Ben-hail, Abdías, Zacarías, Natanael y Micaías. 8 Paykunawan aywananpaqmi Josafat kacharqan *levitakunata. Tsay runakuna karqan Semaías, Netanías, Zebadías, Asael, Semiramot, Jonatán, Adonías, Tobías y Tobadonías. Paykunawanmi aywarqan cüra Elisama y cüra Joram. 9 Paykunami markan markan purir Judá nacioncho taq runakunata TAYTA DIOSPA leyninkuna qelqaraykaq librupita yachatsirqan.
10 Judá nacionpa nawpancho kaykaq nacionkunapis Tayta Diosta *mantsakurmi Josafat mandashqan markakunata mana atacarqantsu. 11 Tsaypa trukanqa wakin filisteo runakunapis regäluta y qellayta apamurmi Josafatta qoykurqan. Arabia nación runakunapis rey Josafatta apapämurqan qanchis waranqa qanchis pachak (7,700) uyshakunata y qanchis waranqa qanchis pachak (7,700) chïvukunata.
12 Tsayno mas munayniyuq rikakurmi Judá nacioncho Josafat sharkatsirqan pakakuna törrikunata y mikuy churakuna markakunata. 13 Tsaynöpami Judá nacioncho kaq markakunata mejoratsirqan.
Jerusalénmanpis ali chölu soldädunkunatami Josafat churarqan. 14 Tsay soldädunkunata aylunpa aylunpa apuntatsiptinmi Judá trïbupita karqan kimsa pachak waranqa (300,000) soldädukuna. Cada batalloncho karqan waranqa (1,000) soldädukuna. Lapan batallonpa capitanninkunapa mandaqnin karqan Adnas.
15 Juk capitán Johanánpa munayninchömi karqan ishkay pachak pusaq chunka waranqa (280,000) soldädukuna.
16 Zicripa tsurin capitán Amasíaspa munayninchömi karqan ishkay pachak waranqa (200,000) ali chölu soldädukuna. Payqa kikinpa voluntäninpitami yaykurqan TAYTA DIOSTA sirvir capitán kananpaq.
17 Benjamín trïbupitami karqan ishkay pachak waranqa (200,000) soldädukuna. Cada ünunpami karqan escüdunkuna y flëchankunapis. Paykunapa capitanninmi karqan Eliada. Payqa pelyayta yachaq ali chölumi karqan.
18 Juk capitannami karqan Jozabad. Paypa munayninchömi karqan pelyananpaq kamarikushqa pachak pusaq chunka waranqa (180,000) soldädukuna.
19 Lapanpis tsay soldädukunaqa Jerusaléncho karqan rey Josafat nishqanta rurananpaqmi. Tsayqa karqan Judá nacioncho corralashqa markakunacho kaykaq soldädukunata mana yupaylapami.