Salmos

28 (1b) TAYTA DIOS, qammi pakakunä qaqa kaykanki.

Tayta, qamlatami manakamü.

Manakamushqäta mayaykalämay.

Mana mayamaptikiqa ¿imapaqnataq kawashaqpis?

 2 *Santu templuyki nawpanpa makïta joqarkurmi manakamü.

Manakamuptï mayaykalämay.

 3 Jutsa ruraq runakunata castigarpis noqata ama castigaykalämaytsu.

Paykunaqa janan shonqulami ali tukun.

Shonqunchöqa mana alikunatami yarparkaykan.

 4 Lutankunata rurashqanman tupu juzgaykulay.*

Jutsata rurashqanman tupu castigaykulay.

 5 Tsay fiyu runakunaqa lapan rurashqaykikunata rikaykarpis manami cäsukärishunkitsu.

Paykunata ushakaykatsilay.

Amana kawapäkutsunnatsu.

 6 TAYTA DIOS alabashqa kaykulätsun.

Lapan manakushqätami mayamashqa.

 7 TAYTA DIOSMI amparakunä y escüdü kaykan.

Lapan shonqüwan yärakuptï paymi yanapaman.

Tsaymi shonqüpis kushikun.

Payta agradëcikurmi alabashaq.

 8 TAYTA DIOSMI kuyashqan kaqkunata imaypis yanapan.

Akrashqan reytapis yanapar tsapanmi.

 9 Qamman yärakamuqkunata salvaykulay, Tayta.

Kuyashqaykikunaman bendicionnikita churaykulay.

Uysha mitsiqno imaypis shumaq cuidaykulay.

Imaypis marqashqala puriykatsilay.