Apocalipsis
Babilonia marka ushakänanpaq nishqan
18 Tsaypitanami rikarqä munayniyuq juk *ángel jana patsapita uraykämuqta. Chipchipyayninmi intëru patsata atsikyaparqan. 2 Tsay angilmi qayakur kayno nimurqan:
“¡Ushakashqanami, ushakashqanami jatunkaray Babilonia marka!*
Kananqa *supaykunalanami tsaycho tarkaykan.
Tsaychöqa melanaypaq *impüru wiskulkuna y tukukunalami waqarkaykan.*
3 Babiloniapa mana ali costumbrinkuna shinkatsikuq vïnunömi karqan.
Tsay vïnutami intëru patsacho runakuna upupäkurqan.
Kay patsacho reykuna mana ali costumbrinkunata Babiloniapita yachakurmi ïdulukunata adorapäkurqan.*
Imatapis rikashqan kaqta Babilonia rantiptinmi negociantikuna pasaypa rïcuyarqan”.
4 Tsaypitanami mayarqä jana patsapita kayno nimuqta:
“¡Kuyashqä runakuna, Babiloniapita aywakäriy!*
¡Jutsata mana ruranaykipaq witikäriy!
Mana witikuptikiqa Babiloniaman castïgu chayamushqannömi qamkunamanpis chayamunqa.
5 Babiloniapa jutsankunaqa jana patsayaqmi chayashqa.*
Lapan jutsankunata Tayta Dios musyaykanmi.
6 Jukta nakatsishqannöla kikintapis castigar nakaykatsilay, Tayta Dios.
Jutsata rurashqanman tupu yapa yaparkur castigaykulay.*
7 Imaykayuqpis karmi pasaypa ali tukur kawarqan.
Tsayno kashqanman tupu nakaykatsilay y lakikuyman churaykulay.
Babiloniaqa shonquncho kaynömi nirqan:
‘Noqaqa reinanömi kaykä.
Manami viüdatsu kä.
Manami imaypis lakikur waqashaqtsu’.
8 Tsayno kashqanpitami pasaypa nakanqa.
Wanuypis, nakaypis y yarqaypis elaqpitami payman chayanqa.
Tsayno nakaykaqtami nina rupar ushanqa.
Babiloniataqa lapanpaq munayniyuq Tayta Diosmi castiganqa”.*
9 Rupashqanpita qoshtay sharkuykaqta rikarmi lapan nacionkunapa mandaqnin reykuna lakikärishpan waqapäkunqa. Tsay reykunaqa Babilonia runakunawan riquëzankunata aypunakurmi ïdulukunatapis adorapäkurqan. 10 Castigashqanta rikarmi mantsakashqa karulapita rikarar kayno nipäkunqa:
“¡Wawalaw, jatunkaray Babilonia marka!
¡Munayniyuqmi karqayki!
¡Kananqa elaqpitami ushakashqanki!”*
11 Tsaymi negociunkunata rantinanpaq pipis manana kaptin lapan negociantikunapis pasaypa waqapäkunqa.* 12 Paykunami rantikunanpaq apapäkuq qorita, qellayta, kuyaylapaq rumikunata, perlaskunata, lïnupita y sëdapita rurashqa granäti y puka tëlakunata, tukuy niraq fïnu tablakunata, kuyaylapaq *marfilpita, qerupita, broncipita, fiërrupita y marmolpita rurashqa adornukunata. 13 Tsaynölami rantikunanpaq apapäkuq canëlata, inciensuta, mïrrata y tukuy niraq ali asyaq* jachakunatapis. Tsaynölami apapäkuq vïnuta, aceitita, harinata, trïguta, wäkakunata, uyshakunata, cawallukunata y carrëtakunatapis. Tsaynölami runakunatapis rantikuq ashmaypaq.*
14 Tsaymi negociantikuna lakikur tsay markata kayno nipäkunqa:
“¡Imaykanöpapis shuntashqayki riquëzaykikuna manami kannatsu!
¡Kuyaylapaq tsararashqaykikuna ushakashqanami!
¡Rïcu kashqaykinöqa manami imaypis kankipaqnatsu!”
15 Tsay markacho rïcuyaq negociantikunami rupaykaqta karulapita rikaykärishpan mantsakashqa waqar* 16 kayno nipäkunqa:
“¡Wawalaw, jatunkaray Babilonia marka!
Tsay marka kuyaylapaq kar lïnupita rurashqa puka y granäti röpashqa warminömi karqan.
Qoriwan, kuyaylapaq rumikunawan y perlaskunawan adornashqa warminömi karqan.
17 ¡Riquëzankunapis elaqpitami chipyaq ushakashqa!”
*Büqui manijaqkuna y büquicho lapan arupakuqkunapis karulapitami rikarpanqa.* 18 Tsay markapita qoshtay sharkuqta rikarmi pasaypa waqar kayno nipäkunqa: “Manami may markapis tsay markano pasaypa kuyaylapaqqa kashqatsu”.*
19 Fiyupa waqar qaparashpanmi alpatapis umankunaman winakur kayno nipäkunqa:
“¡Wawalaw, jatunkaray Babilonia marka!
Tsaychömi *büquiyuq runakuna negociunta rantikur lapanpis rïcuyashqa.
Kananqa elaqpitami pasaypa ushakäkushqa”.*
20 Jana patsacho kaqkuna, ¡kushikäriy! *Apostolkuna, profëtakuna y Diosman lapan yärakuqkunapis, ¡kushikäriy! Qamkunata wanutsishushqaykipitami Tayta Dios tsay markata chipyaq ushakätsishqa.*
21 Tsaypitanami munayniyuq juk ángel mulinu niraq rumita joqarkur lamarman jitarir kayno nirqan:
“Babilonia marka, kaynömi ushakanki.*
Qamtaqa runakuna manami imaypis rikashunkinatsu.*
22 Runakuna cantashqankunapis manami qamcho mayakanqanatsu.
Arpapis, pinkullupis ni *cornëtapis manami mayakanqanatsu.*
Ima aruyta yachaqkunapis manami kanqanatsu.
Mulinu taqrarashqanpis manami mayakanqanatsu.
23 Pipis mana taptin atskipis mananami kanqanatsu.
Casaray fiestapis mananami kanqanatsu.*
Qamcho taykaq negociantikunaqa maytsay negociantikunapitapis mas munayniyuqmi kapäkurqan.
Brüju karmi maytsaychöpis taq runakunata lulapar criyitsishqanki.
24 Qamchömi profëtakunapa, Diosman yärakuqkunapa y maytsay runakunapa yawarnin mashtaraykan”.*