Salmos
Kuyashqan runakunata salvananpaq manakushqan
(1a) Asaf qelqashqan salmumi.
74 (1b) Tayta Dios, ¿pasaypanatsuraq kachariykamashqanki?
Manädaykicho uyshaykino kaykaptïqa ¿imanirtaq pasaypa rabyakurkushqanki?
2 Unaypita akrashqayki runakuna kaykaptï yarparkalämay.
Herenciayki kanäpaqmi salvapäkamarqayki.
*Sión jirkancho tashqayki templu rayku yanapaykalämay.
3 Templucho kaqkunatapis lapantami contraykikuna ushakätsishqa.
Juchutsipäkushqanta rikanaykipaq aywaykalämuy.
4 Templuykita juchurkatsirmi kushikärishpan qaparpashqa.
Bandërankunatapis tsaymanmi jawipäkushqa.
5 Paykunaqa muntita tsaquqnömi templuykita juchutsishqa.
6 Tablakunacho kuyaylapaqta laqlaypa rurashqantapis hächawan y pïcuwanmi ushakätsishqa.
7 Nirkurmi templuykita rupatsipäkushqa.
Täkunayki templuta manakaqman churarmi lapanta juchutsishqa.
8 Tsay runakunami noqakunata elqätsimänanpaq yarpapäkun.
Kay nacionchöqa qamta adoranäpaq juntakänä wayikunatapis lapantami rupatsipäkushqa.
9 Bandëräkuna jawiraykaqtapis mananami rikapäkünatsu.
Profëtakunapis mananami kannatsu.
Manami musyapäkütsu imayyaq tsayno kanäpaq kashqantapis.
10 Tayta Dios, ¡imayyaqraq chikimaqnïkuna achäquita ashiparkaykämanqa!
¡Imayyaqraq wasaykitapis rimarkaykanqa!
11 ¿Imanirtaq noqakunata manana yanapamankinatsu?
¿Imanirtaq makiki oqlashqa rikaraykämanki?
12 Tayta Dios, unaypita patsami mandamaqnï rey kaykanki.
Kay markacho atska kutimi chikimaqnïkunata vincishqanki.
13 Lamar yakutapis munaynikiwanmi ishkayman rakirqayki.*
Lamarcho mantsakuypaq uywakunapa umantapis shaturqaykimi.
14 Leviatán* waräkuypa umankunatapis chamcharirqaykimi.
Nirkurmi chunyaq jirkacho taq uywakuna mikunanpaq jitaparqayki.
15 Mayu kananpaqmi yakutapis pashtatsimurqayki.
Mana tsakiq mayukunatapis tsakitsirqaykimi.
16 Junaqta y tsakaytapis kamashqankimi.
Killata y intitapis kamashqankimi.
17 Patsa maypita mayyaq kananpaqpis señalta churashqankimi.
Usya killatapis y tamya killatapis kamashqankimi.*
18 Contraykikuna ashliykäshunkimi, TAYTA DIOS.
Fiyu runakuna contrayki rimashqanpita ama perdonaytsu.
19 Noqakunataqa ama qonqaykalämaytsu.
Kulkushnömi noqakuna pasaypa mantsakü.
Jirka uywa niraq fiyu runakunapa makinman ama kachaykalämaytsu.
20 Kay nacionchöqa maytsaychöpis lutankunalatami rurarkaykan.
Noqakunawan *pactu rurashqaykita yarpar yanapaykalämay.
21 Nakatsipäkamänanta ama kachapaykulaytsu.
Waktsakuna y humildi kaqkuna alabashunaykipaq yanapaykulay.
22 Tayta Dios, qampa makikicho karkaykaptïqa jukla yanapaykalämay.
Tsay fiyu runakuna waran waranmi qampa contrayki sharkurkaykan.
23 Chikishuqniki runakunaqa contraykimi imaypis rimarkaykan.
Tsayno karkaykashqanta rikaykarqa noqakunata yanapaykalämay.