Job
Yurishqanpita Job pësakushqan
3 Tsaypitanami yurishqanpita lakikushpan 2 Job kayno nirqan:*
3 “¡Imapaqraq yurirqäpis!
‘Olqu wamrami yurishqa’ nishqan tsakay ushakanman karqan.
4 Manaraq yuriptï tsay junaq ushakanman karqan.
Tayta Diospis tsay junaqta ama kamakätsinmantsu karqan.
Yurishqä höraqa patsapis ama waranmantsu karqan.
5 Tsay junaq mana chayamunanpaq fiyupa tsakay tsapakurkunman karqan.
Yanawyaykaq pukutaypis tsapakurkunman karqan.
6 Yurishqä tsakay ama waranmantsu karqan.
Tsay junaqqa ama kanmantsu karqan.
7 Tsay tsakayqa pipis ama yurinmantsu karqan.
Iti yuriptinpis ama kushikunmantsu karqan.
8 Leviatán waräkuyta* mandananpaq munayniyuq brüjukunapis tsay junaqta maldicionanman karqan.
9 Tsay tutaqa qoylarkunapis manakaqlapaq patsa waränanta shuyaranman karqan.
Tsay junaqpaqqa patsapis ama waranmantsu karqan.
Inti jeqamur ama atsikyanmantsu karqan.
10 Kayno mana nakanäpaq tsay junaq mamäpa mädrinnin wichqakanman karqan.
11 “¿Imanirraq mamäpa pachancho kaykälar mana wanukurqätsu?
¿Imanirraq yurishqä höra mana ushakarqätsu?
12 Yuriptï mamäpis melqayninman ama marqamanmantsu karqan ni chuchumanmantsu karqan.
13 Tsay höra wanukurqa imatapis mana mayaypami jitaräküman karqan.
14 Tsaymi jitaräküman karqan wanukuq reykunawan, mayor runakunawan y monumentuta sharkatsiq runakunawan.
15 Tsaynölami jitaräküman karqan atska qorita y atska qellayta palaciuncho tsararaq wanuq runakunawanpis.
16 Shulutano pampaykamanman karqan.
Mamanpa pachalancho wanushqa wamratano pampaykamanman karqan.
17 Wanurqa fiyu runakunapis mana ali ruraykunata kacharinmi,
mayjina aruq karpis jitaräkunnami,
18 autoridäkuna nakatsir arutsishqan runakunapis manami arunnatsu
y capatazkuna olqüpashqantapis manami mayannatsu.
19 Wanurqa waktsapis y rïcupis ushakanmi.
Tsaychöqa ashmaykunapis manami patronpa munayninchönatsu kapäkun.
20 “Nakar kawapäkunanpaq kaykaptinqa ¿imapaqtaq yurinanta Tayta Dios munan?
Pasaypa lakishqa kawapäkunanpaq kaykaptinqa ¿imapaqraq kawananta munan?
21 Nakaqkunaqa wanuyta munarpis manami wanuntsu.*
Pamparaykaq qellayta ashiqno wanuyta ashirpis manami tarintsu.
22 Tsay runakunaqa kushikunqa sepultüraman chayarraqmi.
23 ¿Imapaqnataq Tayta Dios kawatsin lakishqala kawapäkunanpaq kaptinqa?
Kushishqa kawayta munaptinpis Tayta Dios manami kamakätsintsu.
24 “Noqaqa lakishqalami wararküpis qoyarküpis.
Waqaptï weqïpis yakunöraqmi aywan.
25 Kanan nakashqäno manami imaypis nakayta yarparqätsu.
Lapan mantsakushqäkunami kanan pasaykäman.
26 Noqaqa manami jamaytapis ni punuytapis tarïtsu.
Ali kawanäpa trukanqa lakishqalami kawaykä”.