2 Reyes
Rey Sedequíasta Babilonia runakuna prësu tsarishqan
25 Tsaymi rey Nabucodonosor lapan soldädunkunawan Jerusalén tsimpanman chayaykur campamentuta rurapäkurqan.* Tsaypitanami marka murälla waqtanpa alpata qotutsirqan tsaypa witsarkur atacananpaq.
Tsayno pasarqan Sedequías pusaq wata rey kaykaptinmi. Nabucodonosor Jerusalénman chayashqan junaq karqan chunka kaq killacho chunka kaq junaqmi.* 2 Jerusalénta tsayno jiruruypa tsapararqan hasta Sedequías chunka juk watana rey kayta qalaykushqanyaqmi.
3 Runakuna mikunanpaq imapis mana kaptinmi chusku kaq killacho isqun junaq* kaykaptin 4 marka murällata uchkupäkurqan. Babilonia* soldädukuna markata tsaparaykaptinmi Jerusaléncho soldädukuna tsakaypa qeshpir reypa huertanpa pasar ishkay murälla punkupa yarqapäkurqan. Tsaypitanami *Arabá pampapa aywaq nänipa aywakärirqan.
5 Tsayno qeshpiykaptinmi Babilonia soldädukunaqa rey Sedequíasta taripaykur Jericó pampacho tsarirqan. Tsaymi Sedequíaspa soldädunkuna kachariykur wakpa kaypa qeshpir aywakärirqan. 6 Rey Sedequíasta tsayno prësu tsariykurmi Babilonia nacionpa mandaqnin rey Nabucodonosorman apapäkurqan. Nabucodonosorqa kaykarqan Ribla markachömi.* Tsaycho juzgarmi 7 rey Sedequías rikaraykaptin tsurinkunata wanutsipäkurqan. Kikin Sedequíastanami ishkan nawinta jorqurir cadinawan watarkur Babiloniaman prësu apapäkurqan.*
Templuta juchutsishqan y runakunata prësu apakärishqan
2 Crónicas 36.17-21; Jeremías 39.8-10; 52.12-30
8 Nabucodonosor chunka isqun watana Babiloniapa mandaqnin rey kaykaptinmi pitsqa killacho y qanchis kaq junaqcho* Nabuzaradán Jerusalénman chayarqan. Nabuzaradánqa Nabucodonosorpa wardiankunapa capitanninmi karqan. 9 Jerusalénchömi TAYTA DIOSPA templunta*, reypa palaciunta, lapan wayikunata y autoridäkunapa despächunkunata rupatsipäkurqan. 10 Nirkurnami Jerusalén markapa murällanta soldädukuna juchutsipäkurqan. 11 Tsaypitanami Jerusaléncho quëdaq runakunata Babiloniaman Nabuzaradán prësu aparqan. Tsaynöpis aparqan Babilonia reypa favornin sharkuq runakunata y nawpata mana apashqan *artesänukunata. 12 Mas waktsa runakunatami itsanqa jinalancho kachaykurqan chakrakunata arupäkunanpaq y üvakunata uryapäkunanpaq.*
13 Tsaynöpis pakir usharqan templucho broncipita rurashqa jatunkaray columnakunata,* carrëtakunata y lamar nishqan jatunkaray lavatoriuta.* Nirkurnami tsay pakishqan broncita Babiloniaman apakurqan. 14 Tsaynölami apakurqan uchpa shuntakunankunata, pälakunata, lipta jorqukunankunata, wishlakunata y wakin manëjukunatapis. Tsay manëjukunami broncipita rurashqa karqan sacrificiukunata rupatsir manijapäkunanpaq.* 15 Tsaynölami capitán Nabuzaradán apakurqan inciensu qoshtatsikunankunata, tazonkunata y lapantapis qoripita y qellaypita kaqkunata.
16 Apakushqan broncita manami pësaytapis atiparqantsu. Tsay bronci karqan ishkay columnakunapita, lamar nishqan jatunkaray lavatoriupita y carrëtakunapita. Tsaykunata rey Salomónmi TAYTA DIOSPA templuncho kananpaq ruratsirqan. 17 Templu punkucho columnakunaqa pusaq metruno largumi karqan. Columna puntancho ishkay metrunömi broncipita rurashqa tumaypa adornun karqan. Tsay adornu intëru kuchunpa awashqa shikra niraqmi karqan. Warkuränanpaqmi broncipita rurashqa granäda niraqkunapis karqan. Jukaq columnapis tsay niraqlami karqan.
18 Mandaq cüra Seraíastanami wardiakunapa capitannin Nabuzaradán prësu tsarirqan. Paytawanmi prësu tsarirqan mandäshiqnin cüra Sofoníasta y templu punkuta täpaq kimsa runakunatapis. 19 Tsaynölami prësu tsarirqan soldädukunapa capitanninta, reyta yätsiq pitsqa runakunata, sortiyädu shuntaq capitanta y soqta chunka (60) mayor runakunatapis. 20 Babilonia nacionpa mandaqnin rey Nabucodonosor Ribla markacho kaptinmi wardiakunapa capitannin Nabuzaradán lapan tsay prësu tsarishqan runakunata Riblaman apapäkurqan. 21 Tsaychömi Nabucodonosor nirqan tsay runakunata wanutsipäkunanpaq. Tsaynöpami Judá runakunata wakinta wanutsipäkurqan y wakintana juk nacionman apakärirqan.
Judá nacioncho Gedalías gobernador kashqan
Jeremías 40.7-10; 41.1-3, 16-18
22 Tsaypitanami rey Nabucodonosor Judácho quëdaq runakunapa gobernadornin kananpaq Gedalíasta churarqan. Gedalíaspa taytanmi karqan Ahicam y awkilunnami karqan Safán. 23 Gobernadornin kananpaq churashqanta mayaykurmi Gedalíaswan parlananpaq Judá soldädukunapa capitanninkuna Mizpaman aywapäkurqan. Tsay capitankunami karqan Netaníaspa tsurin Ismael, Careapa tsurin Johanán, Netofapita kaq Tanhumetpa tsurin Seraías y Maacapita kaq Jaazanías. Paykunami aywapäkurqan soldädunkuna pushashqa. 24 Chayaykuptinmi Gedalías kayno nirqan: “Ama mantsakushuntsu Babilonia nacionpita shamuq capitankunata. Babilonia nacionpa mandaqnin reypa makincho karqa alimi kawapäkushunpaq”.
25 Tsaypita qanchis killa pasarkuptinnami Ismael jutiyuq runa Mizpa markaman chayarqan chunka runakuna pushashqa. Ismaelqa karqan Elisamapa wilkan y Netaníaspa tsurin. Tsaynöpis karqan Judá nacionpa mandaqnin reykuna aylumi. Chayaykurmi gobernador Gedalíasta, paywan kaykaq Judá runakunata y tsaycho kaykaq Babilonia runakunatapis wanutsipäkurqan. 26 Tsayno ruraykuptinmi Babilonia runakunata mantsakushpan Judácho quëdaq runakunaqa wamrapis awkinpis y soldädukunapis lapan juntakaykur Egiptupa qeshpir aywakärirqan.*
Rey Joaquínta prësu kashqanpita jorqushqan
27 Babiloniapa mandaqnin rey Evil-merodac mandayta qalaykushqan watami Judá nacionpa mandaqnin rey Joaquínta kuyapar carcilpita jorqatsirqan. Tsayno jorqatsirqan Babiloniaman prësu apashqan kimsa chunka qanchis (37) watatana ushaykaptin chunka ishkay kaq killacho ishkay chunka qanchis (27) junaqchömi.* 28 Shakya shakya parlaparmi Joaquíntaqa Babiloniacho prësu kaykaq reykunapita mas ali rikarqan. 29 Tsaynöpami rey Joaquínqa carcilcho kashqan röpanta trukakurir Babilonia nacionpa mandaqnin reywan imaypis juntu mikurqan. 30 Gastunkunapaqpis wanushqanyaqmi waran waran qellayta reypita chaskirqan.