Ezequiel
Jerusaléncho taqkunata castigananpaq nishqan
5 Tayta Dios kaynömi nimarqan: “Runapa tsurin, fïlu naväjawan shapraykita y aqtsaykita rutukuy. Nirkur balanzawan pësarkur kimsa partiman rakiy. 2 Juk parti rakishqayki kaqta churanki adöbi janancho rurashqayki Jerusalén chawpinman. Jerusalénta atacananpaq kashqanta wilaykur rakishqayki aqtsata jinalancho rupatsinki. Jukaq parti rakishqaykita rurashqayki markapa waqtanpa akapalaman ruturkur shikanki. Mas jukaq parti putsuq kaqtana altupa mashtarinki. Tsayno ruranki Jerusaléncho kawaykar quëdaq runakunata espädäta aptakurkur qatikachänäpaq kashqanta musyatsinaykipaq. 3 Juk ishkay aqtsaykitana cäpaykipa kuchunman watanki. 4 Tsay watashqayki aqtsapita wakinta ninaman qaykunki. Tsaynöpami musyapäkunqa Israel runakunapa markankuna rupatsishqa kananpaq kashqanta”.
5 TAYTA DIOSMI kayno nin: “Jerusalén markata noqami churarqä lapan markakunapa y nacionkunapa chawpincho kananpaq. 6 Tsayno churaykaptïpis Jerusalén runakunaqa chukru shonqu kashpanmi mandamientükunata y estatütükunata manakaqman churapäkushqa. Leynïkunata y yätsishqäkunatapis manami cäsupäkuntsu”.
7 Tsaymi TAYTA DIOS kayno nin: “Jerusalén runakuna, mandamientükunata y leynïkunata mana cäsukushpaykimi nawpaykicho taq nación runakunapa leyninkunalatapis mana cumplipäkunkitsu. Paykunapita peormi mana cäsukuq karkaykanki. 8 Tsaymi contrayki rikakur lapan nación runakuna rikaykäshuptiki castigashayki. 9 Melanaypaq ïdulukunata adorapäkushqaykipitami imaypis mana castiganäpaq kaykarpis castigashaykipaq. 10 Tsayno castigaptïmi fiyupa yarqanashpayki wakinniki tsurikikunata mikupäkunkipaq.* Tsurikikunapis wakinnikita mikupäkushunkipaq. Kawaykar quëdaq kaqkunatanami maytsaypapis aywapäkunanpaq qarqushaq.
11 “Fiyupa melanaypaq mana alikunata templücho rurashqaykipitami elqätsishayki. Manami perdonashaykitsu ni kuyapäshaykitsu. Noqa TAYTA DIOSMI tsayno kananpaq jurä. 12 Jinan markachömi wakinniki fiyu qeshyawan wanunkipaq y wakinnikinami yarqaypita wanupäkunkipaq. Wakinnikitami contrayki runakuna marka nawpankunacho wanutsipäkushunkipaq. Wakinnikitanami maytsaypapis aywakunaykipaq espädäta aptakurkur kikï qatikachäshayki. 13 Tsayno castigaptïraqmi fiyupa rabyashqä kachakanqa. Tsayraqmi tantiyakärinki noqa TAYTA DIOS castiganäpaq nishqänöla fiyupa rabyar castigashqäta.
14 “Jerusalén marka, raqälana rikakunaykiyaqmi ushakätsishayki. Tsaynöpami nawpayki nacionkuna y nänipa pasaqkunapis asipäshunkipaq. 15 Pasaypa rabyar fiyupa castigaptïmi jamurpäkushunki y manakaqman churapäkushunki. Castigakuq kashqäta tantiyakurmi lapanpis mantsakanqa. Noqa TAYTA DIOSMI tsayno kananpaq nï.
16 “Wanutsikuq flëchakunatanöraqmi qamkunaman muchuyta kachamushaq. Mikunaykipaq imatapis mana kamaripaptïmi fiyupa yarqaypita wanur ushakankipaq. 17 Qamkunaman muchuyta kachamushqänölami mikukuq fiyu uywakunatapis wamraykikunata mikunanpaq kachamushaq. Pestita, wanutsinakuyta y guërratami qamkunaman kachamushaq.* Noqa TAYTA DIOSMI tsayno nï”.