1 Crónicas
22 Tsaymi David kayno nirqan: “Kaycho TAYTA DIOSPA templunta sharkatsishun. Altartapis kaycho perqashun Israel runakuna sacrificiuta rupatsinanpaq”.
Templuta arutsinanpaq David kamarishqan
2 Nirkurnami TAYTA DIOSPA templunta sharkatsinanpaq rey Davidqa rumikunata laqlatsirqan. Rumikunata laqlananpaqmi Israel nacioncho taq jäpa runakunata qayatsirqan. 3 Tsaynölami fiërrutapis tsaytsikata shuntatsirqan clävukunata ruratsinanpaq y punkukunapa bisagrankunata ruratsinanpaq. Tsaynölami broncitapis tsaytsikata shuntatsirqan. 4 Cedru qerutapis tsaytsikata templupaq qotutsirqan. Tsay qerukunaqa karqan Sidóncho y Tirucho taq runakuna apapäkamushqanmi. 5 Lapanta David tsayno kamarirqan kayno yarparmi: “TAYTA DIOSPA templunqa wakin nacionkunacho kaq templukunapitapis mas kuyaylapaq katsun. Kuyaylapaq kashqanpita maytsaychöpis runakuna parlatsun. Kuyaylapaqta sharkatsinanpaqmi tsurï Salomón wamralaraq kaptin lapan nistashqanta kamarishqalatana kachapäshaq”.
Tsayno yarparmi David manaraq wanur lapanta kamarirqan. 6 Kamariyta usharkurmi Israel runakunata kuyaq TAYTA DIOSPA templunta sharkatsinanpaq tsurin Salomónta yätsir 7 kayno nirqan: “Tayta Diosta adoranantsipaqmi templuta sharkatsiyta yarparqä, hïju. 8 Tsayno yarpaptïpis TAYTA DIOS kayno nimarqan: ‘Qamqa guërracho atska runatami wanutsishqanki. Tsaymi templuta mana sharkatsipämankimantsu. 9 Tsurikimi itsanqa piwanpis mana pelyaq y mana rimanakuq kanqapaq. Tsaynöpis payta tsapäshaq contran nacionkuna mana atacananpaq. Israel runakuna kushishqa y jawkala kawapäkunanpaq yanapaptïmi paypa jutin kanqa Salomón.* 10 Paymi itsanqa templuta sharkatsipämanqa. Payqa tsurïnömi kanqa. Noqanami taytanno kashaq. Paypita miraqkunami Israel nacioncho imayyaqpis rey kanqapaq’.*
11 “Kananqa TAYTA DIOS yanapaykuläshunki promitishqanno templunta sharkatsinaykipaq, hïju. 12 Tsaynöpis tantiyayta y yachayta qoykuläshunki Israel nacionpa mandaqnin rey kashpayki leyninkunata cumplinaykipaq. 13 Tsay leykunata y mandamientukunatami Moisésta TAYTA DIOS entregarqan Israel runakunata yachatsinanpaq. Qampis mandamientunta cumplirqa alimi kawankipaq. Valuray, hïju. Ama mantsakuytsu ni qelanaytsu.*
14 “Rikashqaykinöpis lapan shonqüwanmi TAYTA DIOSPA templunta sharkatsinaykipaq kamarishqä kimsa millón kimsa pachak waranqa (3,300,000) kïlu qorita y kimsa chunka kimsa millón (33,000,000) kïlu qellayta. Broncitapis y fiërrutapis shuntatsishqä pësayta mana atipaypaqtami. Tsaynölami kamarishqä qeruta y rumitapis. Tsaykuna pishiptinqa qamnami yapatsinkipaq. 15 Tsaynöpis makikichömi kaykan rumi laqlaqkuna, albañilkuna, carpintërukuna y ima aruytapis ali yachaq runakuna. 16 Paykunami qoripita, qellaypita, broncipita y fiërrupita imayka adornukunatapis rurayta yachapäkun. TAYTA DIOS yanapaykäshuptikiqa juklana arutsiyta qalaykatsiy”.
17 Tsaypitanami Salomónta shumaq yanapananpaq Israel runakunapa mandaqninkunata rey David kayno nirqan: 18 “TAYTA DIOSNINTSIQA alimi yanapaykäshunki intëru Israel nacioncho jawkala kawapäkunaykipaq. Noqatapis alimi yanapamashqa contrantsikunata vincinäpaq. Tsayno vinciptïmi contrantsi nación runakuna munaynintsicho y TAYTA DIOSPA munayninchöna karkaykan. 19 Kananqa lapan shonquykiwan y lapan voluntänikiwan TAYTA DIOSNINTSITA *ashipäkuy. Tsaynöpis templunta jukla sharkatsipäkuy. Nirkur TAYTA DIOSPA *Pactu Babulninta y *sagrädu manëjukunatapis templunman churapäkunki”.