Jeremías
Manakuptinpis mana perdonananpaq kashqanta Tayta Dios nishqan
15 Tsayno manakuptïmi TAYTA DIOS kayno nimarqan: “Moisés* y Samuel* shamushpan Judá runakunata perdonanäpaq manakamaptinpis manami perdonashaqtsu. Judá runakunata perdonanäpaqqa manami voluntänïpis kannatsu. Paykunataqa manami rikaytapis munätsu.
2 “ ‘Tsayno kaptinqa ¿imataq noqakunata pasamanqa?’ nir tapushuptiki kayno ninki:
“ ‘Qeshyawan wanuqpaq kaqkunaqa qeshyawan wanutsun.
Guërracho wanuqpaq kaqkunaqa guërracho wanutsun.
Yarqaywan wanuqpaq kaqkunaqa yarqaywan wanutsun.
Prësu aywaqpaq kaqkunaqa prësu aywatsun.*
3 “ ‘Noqa TAYTA DIOSMI kayno nï: Kay runakunataqa chusku casta castïguwanmi castigashaq. Tsay castïgukunami kanqa guërracho wanupäkushqan, alqukuna ayakunata qechunakur mikushqan, wiskulkuna rachir mikushqan y jirka uywakuna mikur ushapäkushqan. 4 Tsayno castigashqäta mayarmi maytsay nacioncho taq runakuna fiyupa mantsakanqa. Tsaytaqa rurashaq Ezequíaspa tsurin Manasés* rey kaykar Jerusaléncho jutsata rurashqanpitami.
Jerusalén runakunata castigar ushakätsinanpaq Tayta Dios nishqan
5 “ ‘Jerusalén runakuna, qamkunata castigaptï ¿piraq kuyapäshunki?
¿Piraq lakipäshunki?
¿Piraq tapukunqa imano kashqaykitapis?
6 Noqata qonqaykärimashqaykipitami ushakätsishayki.
Yaparir yaparir kuyapaytapis ajayashqänami.
Noqa TAYTA DIOSMI tsayno nï.
7 “ ‘Trïgu punshata wayra apananpaq jurquëtawan wayraqnömi qamkunataqa markaykikunapita wakpa kaypa qarqushayki.
Wamraykikunata ushakätsiptï tashqayki markakunapis chunyanqami.
Tsayno ushakätsishayki jutsa rurayta mana kacharishqaykipitami.
8 Viüdakunapis lamar kuchuncho aquyshakunapitapis mas atskami kanqa.
Pulan junaq kaykaptinmi mözukunatapis mamantinta ushakätsishaq.
Elaqpitami pasaypa mantsakayman churashaq.
9 “ ‘Qanchis olqu wawayuq warmikunapis wawankunata wanutsiptin pasaypami lakikärinqa.
Kalpan mana kaptin ima ruraytapis mana kamäpakurmi pasaypa penqakärinqa.
Kawaykar quëdaq runakunatapis contrankunami espädawan wanutsipäkunqa.
Noqa TAYTA DIOSMI tsayno nï’ ”.
Runakuna chikipaptin Tayta Diosta Jeremías manakushqan
10 ¡Imapaqraq mamäpis wachaykamarqan!
Pïmaywanpis rimanakularmi qoyarküpis.
Qellayta mana prestaptïpis ni mana prestakuptïpis runakuna maldicionamanmi.
11 TAYTA DIOS, qamta alimi sirvishqä.
Chikimaqnïkuna lakikäriptin y nakapäkuptinpis yanapanaykipaqmi qamta manakamushqä.
Tsayno mana manakushqa kaptïqa maldicionamashqan chayamätsun.
12 Paykunataqa kaynömi nishqanki:
“Norti kaq läducho kaykaq fiërruta y broncita ¿pilaqa pakinmantsuraq?*
13 Jutsata rurapäkushqaykipitami intëru nacionnikicho riquëzaykikunata contraykikunapa makinman entregaykushaq.
Imatapis mana cobraylapami lapanta entregaykushaq.
14 Imaypis mana reqishqayki nacionchömi contraykikunapa ashmaynin kapäkunkipaq.
Qamkunaqa fiyupami rabyanätsimashqanki.
Imatapis nina rupar ushashqanömi qamkunatapis mana kuyapaypa castigashayki”.
15 TAYTA DIOS, qamqa musyankimi pï runakuna chikimashqantapis.
Paykuna chikimaptinpis yanapaykalämay.
Mana wanutsimänanpaq salvaykalämay.
Chikimaqnïkunataqa kikinkunata runakuna chikiykulätsun.
Paykunataqa ama kuyapaytsu.
Tukuyta qayapämaptinpis qam raykumi imatapis mana rimakütsu.
16 Lapanta mandaq TAYTA DIOS, noqaqa makikichömi kaykä.
Parlapämaptikimi ali mikuyta mikuqno lapanta chaskikushqä.
Nimashqaykikunata chaskikuptïmi shonqü pasaypa kushikun.
17 Runakuna juntakar kushikuptinpis paykunawan manami juntakätsu.
Wilakunäpaq akramashqaykipitami juntakänäpa trukanqa juk läduman jamakü.
Jutsata rurapäkuptin qam rabyashqaykinömi noqapis jutsata ruraptin rabyanä.
Tsay rabyanaytaqa qammi shonqüman churamushqanki.
18 ¿Imanirtaq imaypis lakishqala kaykä?
¿Imanirtaq imaypis mana kushikütsu?
¿Imanirtaq noqapaqqa ushnu pözuno elaqpita rikakushqanki?
Jeremíasta yanapananpaq Tayta Dios nishqan
19 Tsayno nir lakikuptïmi TAYTA DIOS kayno nimarqan:
“Noqaman kutimuptikiqa yapay sirvimänaykipaqmi churashayki.
Manakaqkunata parlanaykipa trukan shumaq tantiyaykur parlaptikiqa wilakuynïta wilakunaykipaqmi yapay churashayki.
Mana cäsukamaq runakuna parlashqannöqa ama parlaytsu, sinöqa paykuna rikakushunaykipaq shumaq parlay.
20 “Noqami churashayki broncipita rurashqa murällano kanaykipaq.
Upälakunaykipaq nishuptikipis wilakuynïta wilakunaykipaqmi imaypis yanapashayki.
Qamwan imaypis kaykarmi imapis mana pasashunaykipaq tsapäshayki.*
Noqa TAYTA DIOSMI tsayno nï.
21 Noqami fiyu runakunapa makinpita tsapäshayki.
Wanutsikuq runakunapa makinpitapis salvashaykimi”.