Apocalipsis
Qelqaraykaq taksha rölluta ángel tsararashqan
10 Tsaypitanami rikarqä munayniyuq *ángel pukutaycho jana patsapita uraykämuqta. Uman jananchömi turmanyuy ichiraykarqan. Qaqlanpis intinömi chipchipyarqan. Chankankunapis altuta nina sharkuqnöraqmi karqan. 2 Kicharaykaq taksha röllun aptashqami shamurqan. Alawqa kaq chakinmi lamarman jarurarqan y itsuq kaq chakinnami patsaman jarurarqan. 3 Paymi leonnöraq pasaypa qapararqan. Tsayno qaparaptinmi räyupis qanchis kuti bunrurumurqan. 4 Tsay qanchis räyukuna bunrurumur nishqankunata qelqayta munaptïmi jana patsapita kayno nimarqan: “Tsay mayashqaykita ama qelqaytsu. Imata nimushqantapis ama pitapis wilapaytsu”.
5 Tsaymi lamarcho y pampacho ichiraq ángel alawqa kaq makinta jana patsapa joqarirqan. 6 Tsayno joqarkurmi jana patsatapis, kay patsatapis, lamartapis kamaq y imayyaqpis kawaq* Tayta Diospa jutincho jurar kayno nirqan: “¡Tayta Dios mananami mas shuyanqanatsu! 7 ¡Qanchis kaq ángel *cornëtata tukayta qalaykuptinmi lapantapis Tayta Dios cumpliyta qalaykunqa! ¡Lapanpis pasanqa sirviqnin profëtakunata wilashqannölami!”*
8 Tsaypitanami jana patsapita yapay kayno nimarqan: “Lamarta y patsata jaruraykaq angilman ayway kicharaykaq rölluta chaskinaykipaq”.
9 Tsayno nimaptinmi ángel kaqman aywar tsay rölluta manakurqä. Tsaymi ángel kayno nimarqan: “Kay rölluta mikuy. Mikuptiki abëjapa mishkinnömi mishkinqa. Pachaykichömi itsanqa pasaypa asqanqa”.
10 Rölluta chaskirkurmi mikurqä. Mikuptïmi shimïcho abëjapa mishkinno mishkirqan. Pachächönami pasaypa asqarqan.* 11 Mikurkuptïmi kayno nimarqan: “Runakunata ima pasananpaq kaqkunata yapay wilakuy. Tayta Dios nishqannölami runakunata pasanqa pï casta kaptinpis, maytsay nacionpita kaptinpis, ima idiömata parlaptinpis y rey kaptinpis”.