Apocalipsis
Röllucho qanchis kaq laqaraykaq cërata jorqushqan
8 Röllucho qanchis kaq laqaraykaq cërata Carnish jorquriptinmi jana patsacho pulan hörano pipis mana parlakurqantsu. 2 Nirkurnami rikarqä Tayta Diospa nawpancho qanchis *angilkuna ichirpaykaqta. Paykunami cada ünun *cornëtata chaskirqan.
3 Tsaypitanami Tayta Diospa trönun nawpancho kaykaq *altarman juk ángel chayarqan* inciensu qoshtatsikunan aptashqa. Altarpis y inciensu qoshtatsikunanpis qoripitami karqan. Tsaychömi atska inciensuta chaskirqan Diosman yärakuqkuna manakushqantawan* altarman churananpaq. 4 Altarcho inciensuwan qoshtatsiptinmi yärakuqkuna manakushqan inciensupa qoshtaynin talukashqami Tayta Diosman chayarqan.
5 Tsay angilmi inciensu qoshtatsikunanman altarcho kaykaq shanshata winarkur kay patsaman jitarpamurqan.* Tsaymi atsikyaqpa atsikyar elquy karqan, räyupis mantsakuypami pashtarqan y patsapis fiyupami siksikyarqan.*
Chusku angilkuna cornëtakunata tukamushqan
6 Tsaypitanami *cornëtata chaskiq qanchis *angilkuna tukananpaq kamarikärirqan.
7 Punta kaq ángel cornëtata tukamuptinmi ninawan yawar talushqa runtu tamya patsaman tamyarqan.* Tsaywanmi cäsi pulan patsa rupar ushakarqan. Tsay runtu tamya chayashqan kaqqa yörapis y qewapis lapanmi ushakarqan.
8 Tsaypita ishkay kaq ángel cornëtata tukamuptinmi jatunkaray jirkano rupaykar lamarman kuchparqan. Tsaymi cäsi pulan lamar yawarman tikrarqan.* 9 Yawarman tikrashqan kaqchöqa lapanmi wanurqan. Tsaynölami tsaycho kaykaq *büquikunapis talpukar ushakarqan.
10 Kimsa kaq ángel cornëtata tukamuptinmi jatunkaray rupaykaq qoylar shikwamurqan.* Tsay qoylarmi cäsi pulan mayukunaman y cäsi pulan pukyukunaman chayarqan. 11 Qoylarpa jutinmi karqan Asqaq. Asqaq kaptinmi tsay qoylar chayashqan kaq yakuqa asqaq rikakurqan.* Tsay yakuta upuq kaqkunaqa tsaytsikami wanupäkurqan.
12 Chusku kaq ángel cornëtata tukamuptinmi intipis y killapis qeshyarqan. Tsaymi intipis ni killapis shumaq atsikyarqannatsu.* Tsaynölami cäsi pulan qoylarkunapis mana chipchipyarqannatsu.
13 Tsaypitanami rikarqä juk anka* altupa tumaykaqta. Tsay hörami mayarqä tsay anka fuertipa kayno nimuqta: “¡Wawalaw, wawalaw, wawalaw! Patsacho kawaqkuna ¡imanöraq kanqa! ¡Kimsa angilkunaraqmi cornëtata tukamunan pishiykan!”