Ester
Esterta reina kananpaq churashqan
2 Rabyaynin pasariptinnami rey Asueruqa warmin Vastipaq yarparkur shonqunpis nanayparaq lakikurqan. Tsaynöpis yarparqan nawpanman mana kutinanpaq juk leyta rurashqanta. 2 Tsayno lakikushqanta musyaykurmi mandäshiqninkuna kayno nirqan: “Vastipa trukanta akranaykipaq maytsaypitapis shuntatsimushun kuyaylapaq virgen jipashkunata. 3 Cada mandashqayki provinciakunacho runakunata churashun tsay jipashkunata akraykur pushamunanpaq. Susaman chaykatsimur pushapäkutsun makikicho kaykaq warmikuna tashqan palaciuman. Tsaycho taptinnami yärakushqayki *eunucu Hegaipa makinman churashun wakin warmikikunata cuidashqannöla paykunatapis cuidananpaq. Tsay jipashkuna mas kuyaylapaq kananpaq ima nistashqantapis Hegai kamaripätsun. 4 Tsay jipashkunapitami mayqantapis kuyaylapaq kaqta akranki Vastipa trukan reina kananpaq”.
Tsayno niptinmi rey Asuero kushikur yätsishqannöla jipashkunata shuntamunanpaq kacharqan.
5 Susa markachömi Israel runa Jairpa tsurin Mardoqueo tarqan. Jairpa taytanmi karqan Simei. Simeipa taytanmi karqan Cis. Paykunaqa Benjamín trïbu runakunami karqan. 6 Mardoqueutami atska runakunatawan rey Nabucodonosor prësu aparqan Jerusalénpita Babilonia nacionman. Paykunatawan juntumi Judá nacionpa mandaqnin rey Jeconíastapis prësu aparqan.
7 Mardoqueupami prïma panin karqan Hadasa jutiyuq jipash. Paypa jukaq jutinmi karqan Ester. Payqa kuyaylapaq ali jipashmi karqan. Esterpa maman y taytan wanuykuptinmi Mardoqueuqa legitimakur tsurintano ashmakurqan.
8 Rey Asuero nishqannömi Susa markaman jipashkunata shuntarkur reypa palaciunman apapäkurqan. Nirkurmi tsay jipashkunata y Estertapis Hegaipa makinman churapäkurqan cuidananpaq. 9 Esterwan yachanakurmi Hegaiqa mas kuyaylapaq kananpaq ima nistashqankunata y ali mikuykunata kamariparqan. Nirkurmi Esterta shumaq atiendinanpaq palaciucho kaykaq mas yärakushqan qanchis warmikunata mandarqan. Tsay qanchis warmikunatawanmi Esterta pusharqan palaciucho kaq mas alinnin kaq cuartukunaman tsaycho tänanpaq. Tsay cuartukunaqa karqan reypa warminkuna y *concubïnankuna tashqan palaciuchömi.
10 Mardoqueo yätsishqannömi Esterqa mana wilakurqantsu Israel warmi kashqanta.
11 Ester imano kaykashqantapis musyananpaqmi warmikuna tashqan palaciu patiu punkuman waran waran Mardoqueo aywaq.
12 Tsay palaciuchömi lapan jipashkunata kuyaylapaq kananpaq juk wata shumaq ashmarqan. Tsaymi soqta killa mïrrawan talushqa aceitiwan lushikäriq. Tsaypita soqta killa mastana crëmawan y perfümiwanpis lushikäriq. Tsaypitanami turnun chayamuptin rey Asuero kaqman aywapäkuq. 13 Tashqan wayipita reypa palaciunman aywananpaqmi mas kamaraqla kananpaq röpatapis y alhäjakunatapis kamaripaq.
14 Rey Asueruwan punushqanpita jukaqnin tutanami reypa concubïnankuna tashqan kaq cuartukunamanna jipash aywaq. Tsaychömi Saasgaz jutiyuq eunucu runana paykunata atiendiq. Payqa rey yärakushqan runami karqan. Tsaypita mayqan jipashpis manami kutiqtsu rey Asuero mana qayatsiptinqa. Kuyashqan kaqlatami mayqan jipashtapis qayatsiq.
15 Tsaypitanami Mardoqueupa prïma panin Esterta töcarqan rey Asuerupa nawpanman aywananpaq. Esterqa Abihailpa tsurinmi karqan. Tsayno töcaptinmi mas kamaraqla kananpaq Esterqa jatikurqan eunucu Hegai yätsishqan kaqkunalata. Shakya kaptinmi Estertaqa lapanpis kuyapäkuq. 16 Tsawraqa qanchis watana rey kaykaptin chunka kaq killacho Esterta pusharqan rey Asuero kaqman. Tsay killapa jutinmi kaykan Tebet. 17 Esterta rikaykurmi rey Asueruqa pasaypa kuyakurkurqan. Paytanöqa manami mayqan jipashtapis kuyarqantsu. Tsaymi Estertana Vastipa trukan reina kananpaq corönata jatiparqan.
18 Reina kananpaq Esterta churarmi rey Asueruqa fiestata rurarqan. Tsay fiestamanmi mandäshiqninkunata y yanapaqninkunatapis qayatsirqan. Kushikuypitami mandashqan provinciakunacho impuestuta bäjatsirqan. Tsaynöpis atska regälukunata runakunata aypurqan.
19 Concubïnankuna täkunan cuartukunacho tänanpaq jipashkunata pushaykashqan witsanmi reypa mandäshiqninkuna jamarashqan punkucho Mardoqueo jamaraykarqan. 20 Mardoqueo yachatsishqannölami Esterqa mana wilakurqantsu Israel warmi kashqanta. Mardoqueupa makincho kaykar cäsukushqannölami imaypis Esterqa payta cäsukuq.
Rey Asuerupa contran wilanakärishqanta Mardoqueo mayashqan
21 Juk junaqmi reypa mandäshiqninkuna jamarashqan punkucho jamarar Mardoqueo mayarqan rey Asueruta wanutsinanpaq ishkay runakuna pasaypa rabyashqa wilanakuykaqta. Tsay runakunaqa karqan Bigtán y Teresmi. Paykunaqa karqan tsay punkuta täpaq soldädukunapa capitanninkunami. 22 Tsayno wilanakushqanta mayaykurmi Mardoqueuqa Esterta wilarqan. Tsaytanami Esterqa rey Asueruta wilar kayno nirqan: “Wanutsishunaykipaq wilanakushqantami Mardoqueo wilamashqa”.
23 Tsayno wilanakushqanta shumaq musyaykurnami rey Asuero tsay ishkay runakunata wanurkatsir ayanta qeruman tuyritsirqan. Nirkurmi Mardoqueo tsayno wilakushqanta qelqatsirqan acta libruman.