Apocalipsis
Jana patsacho alabapäkushqan
19 Tsaypitanami mayarqä jana patsacho tsaytsika runakuna kayno nir qayakamuqta:
“¡Aleluya!
¡Tayta Diosnintsimi munayninwan runakunata salvan!
¡Payqa lapanpaq munayniyuqmi kaykan!
[¡Payta pïmaypis alabatsun!]
2 ¡Payqa pitapis shumaqmi juzgan!
Lapan runakunata jutsata ruratsiq *wayrapakuq warmita castigashqanami.
Tayta Diospa sirviqninkunata wanutsishqanpitami kikintana ushakätsishqa”.*
3 Nirkurnami yapay kayno nipäkamurqan:
“¡Aleluya!
Tsay marka rupaptin mana chawaypami qoshtay sharkunqa”.*
4 Tsaypitanami trönuncho jamaraykaq Tayta Diosta adorananpaq nawpancho kaykaq ishkay chunka chusku (24) mayor runakuna y tsaycho kaykaq chusku kawaykaqkuna lätakuykur kayno nipäkurqan: “¡Amén! ¡Aleluya!”
5 Tsayno niptinnami Tayta Dios jamaraykashqan trönunpita kayno nimuqta mayarqä: “¡Tayta Diosnintsita *mantsakuypa sirviqkuna, rïcu karpis waktsa karpis lapayki alabapäkuy!”
Gloriacho casaray fiesta kashqan
6 Tsaypitanami atska runakuna alabaykaqta mayarqä. Tsay alabashqan mayakarqan atska yaku aywar qaparaqno* y räyu bunruruqnöraqmi. Tsay runakunami kayno nipäkurqan:
“¡Aleluya!
¡Lapanpaq munayniyuq Tayta Diosnintsi mandaykannami!*
7 ¡Payta kushishqa alabashun!
Chayamushqanami Carnish casaranan fiesta.
Casarananpaq kaq jipashpis kamarikushqanami kaykan.*
8 Tsay jipashtami fïnu lïnupita rurashqa chipchipyaykaq limpiu röpata jatikunanpaq Tayta Dios kamaripashqa”.
(Tsay röpaqa Tayta Diosman yärakuqkuna alikunata rurashqanmi kaykan.)
9 Tsaymi nawpächo kaykaq *ángel kayno nimarqan: “Kay nishqäta qelqay: ‘Tsay casaray fiestaman qayatsishqan runakuna kushishqami kanqa’ ”.*
Nirkurnami kayno nimarqan: “Kay nishqäkunaqa Tayta Dios nishqankunami kaykan”.
10 Tsayno nimaptinmi angilta adoranäpaq lätakuykurqä. Tsawraqa kayno nimarqan: “¡Noqata ama adoramaytsu! Noqapis qamno y yärakuq mayikikunanölami Tayta Diospa sirviqnin kaykä. ¡Tayta Dioslata adorayqa! Lapan wilakushqäpis Jesucristo alabashqa kananpaqmi kaykan”.
Jesucristo kay patsaman kutimushqan
11 Tsaypitanami jana patsa kichakämuptin* rikarqä yoraq cawalluta. Muntaraqninpa jutinmi karqan Nishqanta Rasunpa Cumpliq. Paymi pitapis mana jananpaypa juzgan. Jutsata ruraqkunata ushakätsinanpaqmi guërratapis ruran.* 12 Nawinkunapis ninanöraqmi atsikyarqan.* Umanchömi atska corönakunata jatirarqan. Tsaychömi juk jutin qelqararqan. Tsay jutitaqa kikilanmi musyarqan. 13 Yawarlana röpan jatishqami kaykarqan. Jutinmi kaykan Diospa Palabran.*
14 Paytami jana patsapita kaq soldädukuna yoraq cawallun muntashqa qatirarqan. Paykunami fïnu lïnupita rurashqa yoraq y limpiu röpan jatishqa karqan.
15 Yoraq cawallun muntaraqpa shiminpitami afilashqa espäda yarqamurqan. Nacionkunata tsay espädawan vincirkurmi fiërru väranta aptakurkur mandanqa. Nacionkunata castigarmi üvata jarukunan pözucho jaruqno castiganqa. Tsayno castigarmi lapanpaq munayniyuq Tayta Dios fiyupa rabyashqanta musyatsinqa.* 16 Sotänancho y mama chankancho juk jutinmi kayno nir qelqaraykarqan: “Reykunapa Reynin y mandaqkunapa Mandaqnin”.*
17 Tsaypitanami rikarqä inti janancho juk *ángel ichiraykämuqta. Tsay *angilmi wiskulkunata qayakur kayno nirqan: “¡Tayta Dios kamarishqan mikuyta mikunaykipaq lapayki shapäkamuy! 18 ¡Runakunapa aytsantami mikupäkunki! ¡Reykunapa, soldädukunapa, soldädupa mandaqninkunapa y muntarashqan cawallunkunapa aytsantapis mikupäkunkimi! ¡Ashmaypatapis, mana ashmaypatapis, rïcupatapis, waktsapatapis lapan runakunapa aytsantami mikupäkunkipaq!”*
19 Tsaychömi rikarqä *anticristuta y lapan nacionkunapa mandaqnin reykuna soldädunkunawan kaykaqta. Paykunami yoraq cawallun muntashqa runawan y soldädunkunawan pelyananpaq juntakarqan. 20 Tsaychömi yoraq cawallun muntashqa runa anticristuta y lula profëtatapis prësu tsarirqan. Manaraq prësu tsariptinmi tsay lula profëta anticristupa nawpancho milagrukunata rurar anticristupa señalninta chaskikuqkunata y ïdulunta adoraqkunata criyitsirqan.*
Tsay lula profëtata y anticristutaqa azufriwan talushqa nina rupaykaq qochamanmi kawaykaqta qaykurqan. 21 Anticristupa soldädunkunatanami yoraq cawallu muntashqa runaqa shiminpita yarqamuq espädawan wanutsirqan. Tsay wanuqkunapa aytsantanami wiskulkuna saksashqanyaq mikupäkurqan.